ބޭރު ގައުމެއްގެ ހިމާޔަތް ހޯދާފައިވާ ފަރާތްތަކަށް ވެސް ރިޔާސީ އިންތިހާބުގައި ވާދަނުކުރެވޭ ގޮތަށް ކޮމެޓީން ފާސްކޮށްފި
ބޭރުގައުމެއްގެ ރައްޔިތުކަން ދޫކޮށްލިތާ 10 އަހަރު ވާންޖެހޭ
ކުރީގެ ރައީސް މުހައްމަދު ނަޝީދާއި ޖުމްހޫރީ ޕާޓީގެ ލީޑަރު ގާސިމް އިބްރާހީމް: ދެ ބޭފުޅުންނަށް ވެސް އިންތިޚާބުގައި ވާދަނުކުރެވޭ ގޮތަށް ހެދުމަށް ސަރުކާރުން ވަނީ މަސައްކަތް ފަށާފައި
ބޭރު ގައުމެއްގެ ހިމާޔަތް ހޯދާފައިވާ ފަރާތްތަކަށް ރިޔާސީ އިންތިޚާބުގައި ވާދަ ނުކުރެވޭ ގޮތަށް ރިޔާސީ އިންތިހާބުގެ ގާނޫނު އިސްލާހު ކުރުމަށް ކޮމެޓީން ފާސްކޮށްފިއެވެ.
ރައްޔިތުންގެ މަޖިލީހުގެ މިނިވަން މުއައްސަސާތަކާ ބެހޭ ކޮމެޓީން އަންގާރަ ދުވަހު ބޭއްވި ކޮމެޓީގެ ބައްދަލުވުމުގައި ރިޔާސީ އިންތިހާބުގެ ގާނޫނަށް ސަރުކާރު ހިންގާ ޕާޓީ ޕީޕީއެމް ޕާލަމެންޓްރީ ގްރޫޕްގެ ލީޑަރު އަހުމަދު ނިހާނު ހުސައިންމަނިކު ހުށަހެޅުއްވާފައިވާ އިސްލާހު ދިރާސާ ކުރެއްވިއިރު، އަންގާރަ ދުވަހުގެ ޖަލްސާގައި ސަރުކާރަށް ނިސްބަތްވާ ބައެއް މެމްބަރުން ވަނީ ހުށަހެޅުންވި އިސްލާހުތަކަށް ވެސް ރިއާޔަތް ކޮށްފައެވެ.
ރިޔާސީ އިންތިހާބުގެ ގާނޫނަށް ނިހާނު ހުށަހަޅުއްވާފައިވާ އިސްލާހުގައި ވަނީ ރިޔާސީ އިންތިހާބަށް ކުރިމަތިލާ މީހެގައި ހުންނަަންޖެހޭ ޝަރުތުތަކުގެ ތެރޭގައި ގާނޫނުއަސާސީގެ 109 ވަނަ މާއްދާގެ (ހ)ގައި އެމީހަކީ، ދިވެހި މަންމައަކާއި ދިވެހި ބައްޕައަކަށް އުފަން ދިވެހި ރައްޔިތަކު ކަމުގައިވުން، އަދި ބޭރު ގައުމެއްގެ ރައްޔިތަކު ކަމުގައި ނުވުން ކަނޑައަޅާފައިވާ ކަމަށްޓަކައި، ރިޔާސީ އިންތިހާބަށް ކުރިމަތިލާ މީހަކު އެއްވެސް އިރެއްގައި ބޭރު ގައުމެއްގެ ރައްޔިތަކު ކަމުގައި ވެފައިވާ ނަަމަ، އެފަދަ މީހަކަށް ރިޔާސީ އިންތިހާބުގައި ވާދަކުރެވޭނީ، އެމީހަކު ބޭރު ގައުމުގެ ރައްޔިތުކަން ދޫކޮށްލިތާ މަދުވެގެން 10 އަހަރު ފަހުން ކަމަށެވެ.
ނިހާނު ހުށަހެޅުއްވި އެ އިސްލާހާއެކު ބޭރު ގައުމެއްގެ ހިމާޔަތް ހޯދާފައިވާ މީހަކަށް ރިޔާސީ އިންތިހާބަށް ކުރިމަތި ލެވޭނީ ހިމާޔަން ދޫކޮށްލިތާ 10 އަހަރު ވުމަށް ފަހުގައި ކަމަށް ބަޔާން ކުރާ އިސްލާހެއް އެ ބިލަށް އިތުރުކުރަން ހުށަހަޅާފައިވެއެވެ.
"ބޭރު ގައުމެއްގެ ހިމާޔަތް ހޯދާފައިވާ މީހެއް ރިޔާސީ އިންތިހާބަށް ވާދަ ކުރެވޭނީ އެ ހިމާޔާތް ދޫކޮށްލިތާ 10 އަހަރަށް ފަހު. އަދި ބޭރު ގައުމެއްގެ ޕާސްޕޯޓް ގެންގުޅެފައިވާ މީހެއް އެ ޕާސްޕޯޓް ދޫކޮށްލިތާ 10 އަހަރުވުން، މިއީ ވެސް ގެންނަންޖެހޭ ވަރަށް މުހިއްމު ދެ އިސްލާހު،" މަޖިލީހުގެ ޖަލްސާގައި ވާހަކަ ދައްކަވަމުން އަލީ އާރިފް ވިދާޅުވިއެވެ.
އަލީ އާރިފް ހުށަހެޅުއްވި އެއިސްލާހަކީ ސީދާ ރައީސް ނަޝީދާއި ޖުމްހޫރީ ޕާޓީގެ ވެރިޔާ ގާސިމް އިބްރާހީމަށް އަމާޒުކޮށް ހުށަހަޅާފައިވާ އިސްލާހެއް ކަމަށް ސިޔާސީ ފަރާތްތަކުންނާއި ރައްޔިތުން ބުނެއެވެ.
ނިހާނުގެ އިސްލާހާ އެކު ބޭރު ގައުމެއްގެ ހިމާޔަތް ހޯދާފައިވާ މީހަކަށް ވެސް ރިޔާސީ އިންތިހާބަށް ކުރިމަތި ނުލެވޭ ގޮތަށް ކޮމެޓީން ވަނީ ފާސްކޮށްފައެވެ.
އިސްލާހު ގެނައުމުގެ މިބިލް ދެން ދާނީ ކޮމެޓީތަކުން ހުށަހަޅާ ކަންކަމުގެ އެޖެންޑާގެ ދަށުން މަޖިލީހުގެ ޖަލްސާ އަށެވެ. މަޖިލީހުގެ ޖަލްސާއަށް ކޮމެޓީގެ އެ ރިޕޯޓް ހުށަހެޅާ މަރުހަލާގައި ވެސް އެ ރިޕޯޓަށް މެމްބަރުންނަށް އިސްލާހު ހުށަހެޅިދާއެވެ.
އެބިލް ފާސްވާނީ މަޖިލީހުން ނިންމާ ގޮތެއްގެ މަތިން ވޯޓަށް އަހައި، ވޯޓުގައި ބައިވެރިވާ މެމްބަރުންގެ އަޣްލަބިއްޔަތުންނެވެ.
ނަމަވެސް މިހާރު ހިނަގަމުންދާ މަޖިލީހުގެ ޖަލްސާތައް ކުރިއަށް ގެންދަނީ މަޖިލީހުގެ ގަވާއިދާ ހިލާފަށް ކަމަށް ބުނެ، އިދިކޮޅު ސިޔާސީ ޕާޓީތަކަށް ނިސްބަތްވާ މެމްބަރުން ބައިވެރިއެއް ނުވެއެވެ. އިދިކޮޅު މެމްބަރުން ޖަލްސާތައް ބޮއިކޮޓް ކުރީ ގަދަބާރުން މަޖިލީހުގެ ރައީސް ކަމުގެ މަގާމުގައި ފުވައްމުލަކު ދެކުނު ދާއިރާގެ މެމްބަރު އަބްދުﷲ މަސީހު މުހައްމަދު އިންނަވާތީ ކަމަށް ބުނެއެވެ.
