ޖަޒީރާ ޕޯސްޓަރު ހަރުކުރުމަށް ފުލުހުން ހުރަސް އަޅައިފި
25 ޖޫން 2018 | ހޯމަ 14:20ފުލުހުން ވަނީ ޕޯސްޓަރު ހަރުކުރާ ސަރަހައްދަށް މާކުރިން ގޮސްފައި
އެމްޑީޕީގެ ސަޕޯޓަރުން ޕޯސްޓަރު ހަރުކުރަން ހަމަޖެއްސި ސަރަހައްދުގައި ފުލުހުން ފޯރި މަރަނީ
އެމްޑީޕީން ޖޫން 25 ވަނަ ދުވަހު ހިންގަން ހަމަޖައްސާފައިވާ ހަރަކާތްތަކުގެ ތެރޭގައި ކުރިއަށް ދިޔަ "ޖަޒީރާ ރާއްޖޭ"ގެ ޕޯސްޓަރުތައް ހިއްޕުމުގެ ހަރަކާތައް ފުލުހުން ހުރަސް އަޅައިފިއެވެ.
އަލިކިނލެގެފާނު މަގާއި މަޖީދީ މަގާ ދިމާވާ ކަންމަތީގައި ހަރުކުރާ މި ޕޯސްޓަރުތައް ހިއްޕުމަށް ހަވީރު 16:00 ގައި އެމްޑީޕީގެ ސަޕޯޓަރުން އެއްވި އިރު ފުލުހުން ވަނީ މާކުރިން އެތަނަށް ގޮސް ފޯރިމަރަން ފަށާފައެވެ. އެއާއެކު ސަޕޯޓަރުން ޕޯސްޓަރުތައް ހިއްޕުމަށް އުޅުމުން އެކަމަށް ފުލުހުން ވަނީ ހުރަސް އަޅާފައެވެ.
އެހެންކަމުން އެމްޑީޕީގެ ސަޕޯޓަރުން ވަނީ އެތަނުން އެހެން ސަރަހައްދަކަށް ދިއުމަށް މިސްރާބު ޖަހާފައެވެ. ފުލުހުން ވެސް ވަނީ ސަޕޯޓަރުން ފަހަތުން މަޖީދީ މަގުން އާޓިފިޝަލް ބީޗާއި ދިމާލަށް ހިނގައި ގަނެފައެވެ. އެހްނ ނަމަވެސް ވަކި ހިސާބަކަށް ދިއުމަށް ފަހު ފުލުހުން ވަނީ ހުއްޓާލާފައެވެ. އެމްޑީޕީގެ ސަޕޯޓަރުން ވަނީ މަޖީދީމަގުން ގޮސް ހަދީބީ މަގަށް ލަބާލައި ޕިއްޒާ މިއާ ކަންމައްޗަށް މަޑުކޮށްފައެވެ. އެ އަށް ފަހު ޕިއްޒާ މިއާ ކައިރީގައި ހުރި ފާރެއްގައި ވަނީ ޕޯސްޓަރުތައް ހިއްޕާފައެވެ.
ޕޯސްޓަރު ހިއްޕުމުގައި އެމްޑީޕީގެ ރައްޔިތުންގެ މަޖްލިސް މެމްބަރުންނާއި މާލެ ސިޓީ ކައުންސިލަރުންގެ މެމްބަރުންގެ އިތުރުން އެ ޒުވާން އެކްޓިވިސްޓުން ވެސް ވަނީ ބައިވެރިވެފައެވެ.
އެއަށް ފަހު ސަޕޯޓަރުން ވަނީ އަލޯރާ ފަރުނީޗަރު ކައިރީގައި ހުރި ގެއެއްގެ ފާރުގައި ޕޯސްޓަރުތައް ހިއްޕާފައެވެ.
އެތަނުގައި ޕޯސްޓަރުތައް ހިއްޕައި ނިމުނު ތަނާހެން ވޭނަކުން އައި ފުލުހުންތަކެއް ވަނީ އެމްޑީޕީގެ ސަޕޯޓަރުން އެތަނުން ފަހާލުމުގެ މަސައްކަތް ފަށާފައެވެ. ފުލުހުން ވަނީ އެ މީހުން ފަހަތަށް ޖައްސާފައެވެ. އަދި އެއްވި މީހުން ވަނީ އެ ސަރަހައްދު ދުކޮށް ގޮސްފައެވެ.
އެމްޑީޕީން ޖޫން 25 ގައި ހިންގަން ރޭވި ހަރަކާތްތަކުގެ ތެރޭގައި ޖޮއިންޓް ޕާލިމެންޓްރީ ގްރޫޕްގެ ބައްދަލުވުމާއި، ރައީސް ނަޝީދުގެ ދޮރުން ދޮރަށް ކެމްޕައިނާއި، އަތޮޅުތަކުގެ ކެމްޕެއިން ޓީމްތަކުގެ މީޓިންގ ވެސް ހިމެނެއެވެ.
