ނުކުޅެދުންތެރިކަން ހުންނަ މީހުންގެ ހައްގުތައް ކަށަވަރުކުރުމާ ގުޅޭ ޚާއްސަ ފޯރަމެއް ފަށައިފި
23 ޖޫން 2018 | ހޮނިހިރު 08:38މިފޯރަމްއަކީ އެއްދުވަހުގެ މުއްދަތައް ކުރިއަށް ގެންދާ ފޯރަމެއް
ޔޫއެންޑީޕީއާ، އުރީދޫ މޯލްޑިވްސް އަދި އެޗްޑީސީން ގުޅިގެން ކުރިއަށް ގެންދާ ފޯރަމެއް...
ނުކުޅެދުންތެރިކަން ހުންނަ މީހުންނަށް އެހެން މީހުންނެކޭ އެއްފަދައިން މުޖުތަމައުގެ ކަންކަން ފަހިކޮށްދިނުމާއި ގުޅޭ ގޮތުން މަޝްވަރާ ކުރުމަށް ޚާއްސަ ފޯރަމެއް ފަށައިފި އެވެ.
މިއަދު ހޮޓެލް ޖެންގައި ބާއްވާ މިފޯރަމް ޝަރަފުވެރި ކޮށްދެއްވީ ޖެންޑާރ މިނިސްޓަރު މިނިސްޓަރު ޒެނީޝާ ޝަހީދު ޒަކީ އެވެ.
އެއްދުވަހުގެ މުއްދަތަށް ކުރިއަށް ގެންދާ މިފޯރަމްއަކީ ޔޫއެންޑީޕީއާ، އުރީދޫ މޯލްޑިވްސް އަދި އެޗްޑީސީގެ ފަރާތުން ކުރިއަށް ގެންދާ ފޯރަމެކެވެ.
މިފޯރަމްއާ ބެހޭ ގޮތުން ޖެންޑާރ މިނިސްޓަރު ޒެނީޝާ ވިދާޅުވީ މިއަދު ކުރިއަށް ގެންދާ މިފޯރަމްގައި ނުކުޅެދުންތެރިކަން ހުންނަ މީހުން އެހެން މީހުންނެކޭ އެއްފަދައިން ހަމަހަމަ ފުރުސަތުތެކެއް ހޯދައިދިނުމާ ބެހޭ ގޮތުން ފުޅާ ދާއިރާއެއްގައި މަޝްވަރާކުރާނެ ކަމަށެވެ. އަދި މިމަޝްވަރާގެ ދަށުން ވަރަށް ފުރިހަމަ ނަތީޖާތަކެއް ނެރެވޭނެ ކަމަށް މިނިސްޓަރު ވިދާޅުވިއެވެ.
ރާއްޖޭގައި ނުކުޅެދުންތެރިކަން ހުންނަ ފަރާތްތަކާއި މެދު ޚާއްސަ އުސޫލަކުން އަމަލުކުރެވޭނެ ނިޒާމަކާއި، ސިޔާސަތުތަކެއް ތައާރަފްކުރެވިފައިވާކަން ފާހަގަ ކުރައްވައި މިނިސްޓަރު ޒެނީޝާ ވިދާޅުވީ 2013 ވަނަ އަހަރުގެ ތެރޭގައި އިފްތިތާހް ކުރެވުނު ނުކުޅެދުންތެރިކަން ހުންނަ މީހުންގެ ހައްގުތައް ހިމާޔަތް ކުރުމުގެ ސިޔާސަތާއި، އެމީހުންނަށް ދެވޭ ޚިދުމަތުގެ ފެންވަރު ރަނގަޅު ކުރުމަށް އަމާޒުހިފާފައިވާ ކަމަށެވެ.
އެހެންކަމުން މުއާސަލާތީ ވަސީލަތްތައް ހަރުދަނާ ކުރުމާއި، ސަރުކާރު އިދާރާތަކަށް ފަސޭހައިން ވަދެނުކުމެވޭނެ މަގުފަހި ކޮށްދިނުމަށް އިމާރާތްތަކުގެ ޑިޒައިންނަށް ބަދަލުގެނައުމަކީ މިސިޔާސަތުގައި ހިމެނިފައިވާ ކަންކަން ކަމަށް މިނިސްޓަރު ފާހަގަކުރެއްވި އެވެ.
" އެހެންނަމަވެސް ދިވެހިރާއްޖޭގައި ގިނަ އިމާރާތްތައް ކުރިން ޑިޒައިންކޮށްފައި ހުރީ މިފަދަ ވިސްނުމުގައި ނޫންކަމަށް ވާތީ މިދެންނެވި ގޮތަށް ކަންކަން ފުރިހަމަ ކުރުމަށްޓަކައި ވަރަށް ބޮޑެތި ދަތިތަކާ ކުރިމަތިލާންޖެހޭ. އެހެންކަމުން ހުޅުމާލެފަދަ އަލަށް ބިނާ ކުރެވޭ ސިޓީއެއްގައި ނުކުޅެދުންތެރިކަން ހުންނަ ފަރާތްތަކަށް ފުރިހަމަ ގޮތުގައި ބޭނުން ހިފޭނެ ތަނެއްގެ ގޮތުގައި ޑިޒައިން ކުރުމަކީ އެފަރާތްތަކުގެ ހައްގުގައި އަޅުގަނޑުމެންނަށް ކޮށްދެވޭނެ ވަރަށް މުހިންމު މަސައްކަތެއް. އަދި މުޖުތަމައުގައި ނުކުޅެދުންތެރިކަން ހުންނަ ފަރާތްތަކުގެ ބައިވެރިވުން އޮތުމަކީ މުޅިގައުމުގެ ތަރައްގީއަށް އޮތް ކުރިއެރުމެއްކަން ޔަގީން." މިނިސްޓަރު ޒެނީޝާ ވިދާޅުވި އެވެ.
މިނިސްޓަރު ޒެނީޝާ ވިދާޅުވީ ތަރައްގީ ކުރެވެމުންދާ ސްމާޓް ސިޓީ ޕްރޮޖެކްޓްގެ ސަބަބުން އެހެން މީހުންނެކޭ އެއްފައިން ނުކުޅެދުންތެރިކަން ހުންނަ މީހުންނަށް ވެސް ކައިރި މުސްތަގުބަކެއްގައި ހަމަހަމަ ދިރިއުޅުމުގެ ފުރުސަތު ލިބިގެން ދިއުން ކަމަށެވެ.
