އަލިދޫގެ ކުއްޔާއި ޖޫރިމަނާގެ ގޮތުގައި 29 މިލިއަން ޑޮލަރު ދައްކަން ޔޮޓް ޓުއާސްއަށް ހުކުމްކޮށްފި

ޓޫރިސްޓް ރިސޯޓެއްގެ ގޮތުގައި ތަރައްގީ ކުރުމަށް ދޫކޮށްފައިވާ ހއ. އަލިދޫގެ ކުއްޔާއި ޖޫރިމަނާގެ ގޮތުގައި 29 މިލިއަން ޑޮލަރު (447 މިލިއަން ރުފިޔާ) ދެއްކުމަށް ރައްޔިތުންގެ މަޖިލީހުގެ ކާށިދޫ ދާއިރާގެ ކުރީގެ މެމްބަރު އަބްދުﷲ ޖާބިރުގެ ޔޮޓް ޓުއަސް މޯލްޑިވްސްގެ މައްޗަށް ސިވިލް ކޯޓުން ބުދަ ދުވަހު ހުކުމްކޮށްފިއެވެ.

ސިވިލް ކޯޓުން ކުރި ހުކުމްގައި ބުނެފައި ވަނީ އަލިދޫގެ ކުލީގެ ގޮތުގައި 5.6 މިލިއަން ޑޮލަރު (86.3 މިލިއަން ރުފިޔާ) ދައްކަންޖެހޭ ކަމަށާއި ޖޫރިމަނާގެ ގޮތުގައި 23.4 މިލިއަން ޑޮލަރު (360.8 މިލިއަން ރުފިޔާ) ޔޮޓް ޓުއަސްއިން ދައްކަން ޖެހޭނެ ކަމަށެވެ. އެ ކުންފުންޏަށް އަލިދޫ ދޫކޮށްފައި ވަނީ 2005 ވަނަ އަހަރުގެ މެއި މަހުގެ ފަސް ވަނަ ދުވަހު ސަރުކާރާ އެކު ވެފައިވާ ލީސް އެގްރިމެންޓެއްގެ ދަށުން ކަމަށް ވެސް ހުކުމްގައި ބުނެފައިވެއެވެ. އެ ގްރިމެންޓުގެ ދަށުން ދައްކަންޖެހޭ ކުއްޔާއި ޖޫރިމަނާގެ ގޮތުގައި ޖުމްލަ 29 މިލިއަން ޑޮލަރު (447 މިލިއަން ރުފިޔާ) ދައުލަތަށް ދައްކަންޖެހި ނުދައްކާ އޮތްކަން ޝަރީއަތަށް ހުށަހަޅާފައިވާ ލިޔުންތަކުން ސާވިތުވާ ކަމަށް އެ ހުކުމްގައިވެއެވެ.

އިނގިރޭސީވިލާތުން ސިޔާސީ ހިމާޔަތް ހޯއްދެވުމަށްފަހު، އަވަށްޓެރި ސްރީލަންކާގައި ދިރިއުޅުއްވާ ޖާބިރުގެ ޔޮޓް ޓުއާސުން ހިންގަމުންދިޔަ އަލިދޫ ރިސޯޓު ބަންދުކޮށްފައިވާތީ އެ ރިސޯޓުގެ ކުއްޔާއި ޖޫރިމަނާ އެ މުއްދަތުގައި ނުހިނގާނެ ކަމަށް ކަނޑައަޅަން ވަގުތީ އަމުރެއް ނެރެދިނުމަށް އެ ކުންފުނީގެ ފަރާތުން ސިވިލް ކޯޓަށް ހުށަހެޅިއެވެ. ނަމަވެސް އެ ކޯޓުން ކަނޑައަޅާފައި ވަނީ ޔޮޓް ޓުއާސް އިން އެދުނު ގޮތަށް އަމުރެއް ނެރެދެވެން ނެތް ކަމަށެވެ.

ދައުލަތުގެ ފަރާތުން މޯލްޑިވްސް އިންލަންޑް ރެވެނިއު އޮތޯރިޓީ (މީރާ)އިން އުފުލި ދައުވާއާ ގުޅިގެން ޝަރީއަތް ހިންގުމަށްފަހު ސިވިލް ކޯޓުގެ ގާޒީ އަލީ އަބްދުﷲ ކުރެއްވި ހުކުމުގައި ބުނެފައި ވަނީ މީރާއަށް ދައްކަންޖެހޭ ފައިސާ ހޯމަ ދުވަހުން ފެށިގެން، އެއް އަހަރު ދުވަހުގެ ތެރޭގައި އެ ފައިސާ ދައްކައި ހަލާސްކުރުމަށެވެ.

އެ ފައިސާ ދައްކައި ހަލާސް ކުރުމާ ހަމައަށް އަރަމުންދާ ޖޫރިމަނާ ވެސް ދެއްކުމަށް އެ ހުކުމްގައި ބުނެފައިވެއެވެ.

މޫސުން ގޯސްވުމުގެ ސަބަބުން ލިބުނު ގެއްލުންތަކާ ގުޅިގެން 2014 ވަނަ އަހަރުން ފެށިގެން އަލިދޫ ރިސޯޓު ވަނީ ބަންދުކޮށްފައެވެ. އެލައިޑުން އިންޝުއަރެންސްކޮށްފައިވާ އެ ރިސޯޓަށް ލިބުނު ގެއްލުމުގެ ބަދަލު، އެލައިޑުން ނުދިނުމުން އެ ކުންފުންޏާ ދެކޮޅަށް ޔޮޓް ޓުއާސްއިން ވަނީ ދައުވާ އުފުލާފައެވެ.