ލަމް ކާމިޔާބު ޑްރާމާއެއް!
ހަތަރު އެޕިސޯޑްގެ މައްޗަށް އެކުލޭ ސީރީޒްއެއް
މިދިޔަ ރޯދަމަހު ރާއްޖެ ޓީވީން ދެއްކި ޑްރާމާ ސީރިއަލް "ލަމް" ވެގެން ގޮސްފައި ވަނީ ބެލުންތެރިންގެ މަގްބޫލުކަން ލިބިގެން ދިޔަ ޑްރާމާއަކަށެވެ.
ރާއްޖެ ޓީވީ ހެޑް އޮފް ޕްރޮގްރާމްސް އާމިރު ސަލީމް ޑައިރެކްޓް ކޮށްފައިވާ މިޑްރާމާއަކީ މުޖްތަމައުގައި ހިނގާ ނޭދެވޭ ކަންކަމުގެ މައްޗަށް މީހުން ހޭލުންތެރިކުރުވުމުގެ ގޮތުން ތައްޔާރު ކޮށްފައިވާ ޑްރާމާއެކެވެ.
ހަތަރު އެޕިސޯޑްގެ މައްޗަށް އެކުލެވޭ މި ޑްރާމާގައި އިޖްތިމާއީ ބައެއް މައްސަލަތަކާއި އާއިލީ ގުޅުމާއި ލޯބި ފެނިގެންދެއެވެ.
މި ޕިލްމުގެ ކާސްޓުންގެ ތެރޭގައި ހިމެނެނީ މަޒްހަބު އަބްދުލް ގައްޔޫމާއި، އަލީ އާޒިމް (ދޮން އައްޔަ) ގެ އިތުރުން މިދާއިރާއަށް އަލަށް ތަޢާރަފްވި އައިޝާ އަލީ، އައިމިނަތު ޝަމާނާ، ސާނިއާ އަހުމަދު އަދި މުހައްމަދު ޝުހާދުއެވެ.
ރާއްޖެ ޓީވީގެ ޗީޕް ކެމެރާމަން މުހައްމަދު އަނިލް ކެމެރާކޮށްފައިވާ މިޑްރާމާގެ 99 ޕަސެންޓް މަންޒަރު ނަގާފައި ވަނީ އއ. ރަސްދޫގައެވެ. ބައެއް މަންޒަރުތައް މާފުށީގައި ވަނީ ނަގާފައެވެ.
މި ޑްރާމާގެ ބެކް މިއުޒިކް ހަދާފައި ވަނީ މުހައްމަދު އިކްރާމެވެ.
ރާއްޖެ ޓީވީން ތައްޔާރުކޮށްފައިވާ މި ޑްރާމާއަކީ އާމިރު ސަލީމްގެ ފުރަތަމަ ޑައިރެކްޝަން ސީރީޒްއެވެ. އަދި މިމަސައްކަތާ ދޭތެރޭ ވަރަށް ހިތްހަމަޖެހޭ ކަމަށް އާމިރު ވިދާޅުވިއެވެ.
ހަތް ދުވަހުގެ ތެރޭގައި ޝޫޓިން ނިންމާފައިވާ މި ޑްރާމާ ސީރީއަށް ވަނީ ސޯޝަލް މީޑިއާގައި ވެސް ބެލުންތެރިންގެ ބޮޑު ތަރުހީބެއް ލިބިގެން ގޮސްފައެވެ.
