ފްލައިބޯޑް ވާރލްޑް ޗެމްޕިއަންޝިޕްގެ ޖޫނިއަރ ކެޓަގަރީއިން ޔައިޝްއަށް ފަސްވަނަ
19 ޖޫން 2018 | އަންގާރަ 00:03މި ކެޓަގަރީގައި ވާދަކުރަނީ އުމުރުން 13 އަހަރާއި 18 އަހަރުގެ ފްލައިބޯޑަރުން
މި މުބާރާތުން ރާއްޖެއަށް ފަސްވަނަ ހޯދައިދިން ޔައިޝް - އޭނާއަކީ މުހިއްޔުއްދީން ސްކޫލްގެ ދަރިވަރެއް
ވާރލްޑް ފްލައިބޯޑް ޗެމްޕިއަންޝިޕްގެ ޖޫނިއަރ ކެޓަގަރީއިން ފަސްވަނަ މިމުބާރާތުގައި ރާއްޖެ ތަމްސީލުކުރި އެތުލީޓު، މުހައްމަދު ޔައިޝް ހޯދައިފިއެވެ.
ޔައިޝް މިމުބާރާތުގެ ޖޫނިއާރ ކެޓަގަރީއިން ފަސްވަނަ ހޯދާފައިވާއިރު މި ކެޓަގަރީގައި ވާދަކުރަނީ އުމުރުން 13 އަހަރާއި 18 އަހަރުގެ ފްލައިބޯޑަރުންނެވެ. ހަމައެހެންމެ މިއީ ވާރލްޑް ޗެމްޕިއަންޝިޕްގައި ޖޫނިއަރ ކެޓަގަރީ ތައާރަފް ކުރެވުނު ފުރަތަމަ ފަހަރަށްވާއިރު މިއީ ރާއްޖޭގެ ޖޫނިއަރ އެތުލީޓަކު މިމުބާރާތުގެ ވާދަކުރި ފުރަތަމަ ފަހަރުވެސްމެއެވެ. އުމުރުން 15 އަހަރުގެ ޔައިޝް އަންނަނީ މުހިއްޔުއްދީން ސްކޫލްގެ ގްރޭޑް 10 އެއްގައި ތައުލީމް ހާސިލްކުރަމުންނެވެ.
ފްލައިބޯޑިންގައި ޔައިޝްގެ އެދުރެއްގެ ގޮތުގައި ހަރަކާތްތެރިވަނީ ރާއްޖެއާއި ދުނިޔޭގައި ވެސް މިކުޅިވަރުގައި ފާހަގަކޮށްލެވޭ ރާއްޖޭގެ އިބްރާހިމް ހުސައިން (އިއްބަޑޭ) އެވެ. އޭނާ ވެސް ވަނީ މިހަރުގެ ވާރލްޑް ޗެމްޕިއަންޝިޕްގައި ވާދަކޮށް ޕްރޮފެޝަނަލްސް ކެޓަގަރީއިން 17 ވަނަ ހޯދާފައެވެ. އިއްބަޑޭ ވަނީ މީގެކުރިން ފްލައި ބޯޑް ވާރލްޑް ކަޕްގައި ދުނިޔޭގެ 46 އެތުލީޓަކާއި ވާދަކޮށް 26 ވަނަ ހޯދާފައެވެ. ހަމައެހެންމެ އޭނާވަނީ ޔޫރަޕިއަން ފްލައިބޯޑިން ޗެމްޕިއަންޝިޕްގެ ތިންވަނަ ވެސް މީގެކުރިން ހޯދާފައެވެ.
ޔައިޝްގެ މިކާމިޔާބާއެކު ގިނަ ބަޔެއްގެ ތައުރީފް އޭނާއަށް ދަނީ ލިބެމުންނެވެ.
