ސައުދީގެ ކުޅުންތެރިން ދަތުކުރި ފްލައިޓްގެ އިންޖީނުގައި ރޯވެއްޖެ

ފީފާ ވާރލްޑް ކަޕްގައި ވާދަކުރާ ސައުދީ އަރަބިއްޔާގެ ގައުމީ ޓީމުގެ ކުޅުންތެރިން ދަތުރުކުރި ފްލައިޓްގެ އިންޖީނުގައި ރޯވެއްޖެއެވެ.

އެ ކުޅުންތެރިން ދަތުރުކުރަމުންދިޔައީ މުބާރާތުގެ ދެވަނަ މެޗު ކުޅުމަށް މޮސްކޯއިން އެގައުމުގެ ދެކުނުގައި އޮންނަ ސިޓީއެއް ކަމަށްވާ ރޮސްޓޯވް އޮން ޑޮންއަށެވެ.

އާންމުވެފައިވާ ފޮޓޯތަކުން، ކުޅުންތެރިން ދަތުރުކުރަމުންދިޔަ ފްލައިޓްގެ އިންޖީންގައި ރޯވެފައިވާ މަންޒަރު ފެނެއެވެ. އިންޖީނުގައި ރޯވީ ރޮސްޓޯވްގެ އެއާޕޯޓްގައި ޖައްސަންދިޔަ ވަގުތު ކަމަށް މީޑިއާތަކުން ބުނެއެވެ. މި ފްލައިޓަކީ ރަޝިއަން އެއާލައިންސްގެ އެއާބަސް އޭ319-100 މަރުކާގެ ބޯޓެކެވެ. މި ބޯޓަކީ 12 އަހަރު ދުއްވާފައިވާ ބޯޓެއް ކަމަށް ރިޕޯޓްތައް ބުނެއެވެ.

ސައުދީގެ ފުޓްބޯޅަ ފެޑެރޭޝަނުން ނެރުނު ބަޔާނެއްގައި ބުނެފައި ވަނީ ހުރިހާ ކުޅުންތެރިންވެސް ތިބީ ސަލާމަތުން ކަމަށާއި އެއީ އިންޖީނަށް ދިމާވި ޓެކްނިކަލް މައްސަލައެއްގެ ސަބަބުން ކުރިމަތިވި ކަމެއް ކަމަށެވެ. ހުރިހާ ކުޅުންތެރިންވެސް މިވަގުތުތިބީ އެކުޅުންތެރިން ތިބުމަށް ހަމަޖެހިފައިވާ ހޮޓެލްގައި ކަމަށް ސައުދީ ފެޑެރޭޝަނުން ނެރުނު ބަޔާނުގައިވެއެވެ.

އެކުޅުންތެރިން ބޯޓުން ފޭބި ވަގުތު ނަގާފައިވާ ފޮޓޯތަކުންވެސް އެއްވެސް ކުޅުންތެރިއަކަށް ގެއްލުމެއް ވެފައިވާ މަންޒަރު ފެންނާކަށް ނެތެވެ.

ރޮސްޓޯވްއަށް ސައުދީގެ ކުޅުންތެރިން ދަތުރުކުރީ ގްރޫޕް ފިޔަވަހީގެ ދެވަނަ މެޗުގައި އުރުގުއޭ އާއި ދެކޮޅަށް ކުޅުމަށެވެ. ސައުދީ ކުޅުނު ފުރަތަމަ މެޗުން އެ ޓީމު ވަނީ 5-0 މުބާރާތް ބާއްވާ ގައުމު ކަމަށްވާ ރަޝިއާ އަތުން ބަލިވެފައެވެ.