ސްޓޫޑެންޓް އޮފް ދަ އިޔާރގެ ދެވަނަ ފިލްމުގެ ޝޫޓިން ފަށައިފި
މިފިލްމު ރިލީޒް ކުރަން ނިންމާފައި ވަނީ ނޮވެންބަރު 23 ގައި
ސްޓޫޑެންޓް އޮފް ދަ އިޔާރގެ ތިން ތަރިން---
ހައި ސްކޫލު ލޯބީގެ ފިލްމު "ސްޓޫޑެންޓް އޮފް ދަ އިޔާރ"ގެ ދެވަނަ ބައިގެ ޝޫޓިން ފަށައިފިއެވެ.
ކަރަން ޖޯހާރުގެ މިފިލްމުގެ ޝޫޓިން ފަށާފައި ވަނީ ޓައިގަރް ޝްރޮފް، އަނަންނިޔާ ޕާންޑޭ އަދި ޓާރާ ސްޓޭރިއާ އެކުއެވެ.
މިފިލްމުގެ ޑައިރެކްޓަރު ޕުނީތު މަނޯތްރާ ވަނީ އިންސްޓަގްރާމްގައި ފިލްމު ލީޑް ރޯލްކުޅޭ ތިން އެކްޓަރުން ފިލްމު ސެޓްގައި ތިބި ފޮޓޯއެއް ޝެއާރކޮށްފައެވެ.
"ސްޓޫޑެންޓް އޮފް ދަ އިޔާރ" އަކީ އާލިޔާ ބަޓް، ވަރުން ދާވަން އަދި ޝިދާތް މަލޯތްރާ ކުޅެ ނެރެދިން ފިލްމެއް ނަމަވެސް މީގެ ދެވަނަ ބައިގައި މިއިން އެއްވެސް ތަރިއެއް ނޫޅޭނެއެވެ. މިފަހަރު ފިލްމުން ފެނިގެންދަނީ ޗަންކީ ޕާންޑޭގެ އަންހެން ދަރިފުޅު އަނަންނިޔާ ޕާންޑޭ އަދި ޑިސްނީ ވީޖޭ ޓާރާ ސްޓާރިއާއެވެ.
"ސްޓޫޑެންޓް އޮފް ދަ އިޔާރ" ގެ ފުރަތަމަ ފިލްމެކޭ އެއްގޮތަށް މިފިލްމުން ވެސް ފެނިގެންދާނީ ލޯބީގެ ތިނެސްކަން ވާހަކައެކެވެ. "ސްޓޫޑެންޓް އޮފް ދަ އިޔާރ"ގެ ފުރަތަމަ ބަޔަށް ބޮޑު ތަރުހީބެއް ލިބިގެން ގޮސްފައިވާއިރު މިފިލްމަށް ވެސް ބޮޑު ތަރުހީބެއް ލިބޭނެ ކަމަށް މިފިލްމުގެ ޓީމުން ބުނެއެވެ.
މިފިލްމު ރިލީޒް ކުރަން ނިންމާފައި ވަނީ ނޮވެންބަރު 23 ގައެވެ. މިފިލްމަށް ހަރަދުކުރަނީ މަޝްހޫރު ޑިރެކްޓާރ ކަރަން ޖޯހަރު، ހައިރޫ ޔަޝް ޖޯހަރު، އެޕޫރުވާ މެހެތާއެވެ.
