ވާރލްޑް ކަޕް: ކުޑަކުޑަ އައިސްލޭންޑުން އާޖެންޓީނާ ހިފަހައްޓައިފި

ފީފާ ވާރލްޑް ކަޕްގައި އައިސްލޭންޑާއި ވަރުގަދަ އާޖެންޓީނާ ކުޅުނު މެޗު އެއްވަރުވެގެން ނިމިއްޖެއެވެ.

ރަޝިއާގެ މޮސްކޯގައި ހުންނަ އޮކްރައިޓީ އެރީނާގައި ކުޅުނު މި މެޗު ނިމިފައިވަނީ 1-1 ގެ ނަތީޖާއަކުން އެއްވަރުވެގެންނެވެ. މި މެޗު ވެގެންދިޔައީ ވާރލްޑް ކަޕްގެ ތާރީހުގައި ވެސް އައިސްލޭންޑް ކުޅުނު ފުރަތަމަ މެޗަށެވެ. މި މެޗު ވެގެންދިޔައީ މި ދެ ޓީމުގެ މެދުގައި ކުޅެވުނު ފުރަތަމަ މެޗަށެވެ. މިއަހަރުގެ ވާރލްޑް ކަޕް ވެގެންދިޔައީ އައިސްލޭންޑުގެ ތާރީހުގައި ވެސް އެ ޓީމު ކޮލިފައިވި ބައިނަލްއަގްވާމީ ބޮޑު ދެވަނަ މުބާރާތަށެވެ. ހަމައެހެންމެ މި މެޗާއެކު އައިސްލޭންޑް ވެގެންދިޔައީ ވާރލްޑް ކަޕްގެ ތާރީހުގައި ވެސް ކުޅުނު އެންމެ ކުޑަ ޓީމަށެވެ.

ފުރަތަމަ ހާފު ފެށިގެން އާޖެންޓީނާއިން މެޗު ކޮންޓްރޯލް ކޮށްގެން ކުޅުނުއިރު އެޓީމުން ވަނީ އައިސްލޭންޑްގެ ހާފަށް ބާރުބޮޑުކޮށްފައެވެ. އެހެން ނަމަވެސް އައިސްލޭންޑުގެ ކުޅުންތެރިން ވަނީ މޮޅު ޑިފެންސެއްކޮށް އާޖެންޓީނާގެ އެޓޭކްތައް ހުއްޓުވާފައެވެ. މެޗުގެ 19 ވަނަ މިނެޓުގައި އާޖެންޓީނާގެ ފުރަތަމަ ލަނޑު ޖަހައިދިނީ ސާޖިއޯ އަގުއޭރޯއެވެ. އެހެން ނަމަވެސް އޭގެ ހަތަރު މިނެޓު ފަހުން އައިސްލޭންޑުން ވަނީ ނަތީޖާ ހަމަހަމަކޮށްފައެވެ. މި ލަނޑު އެ ޓީމަށް ޖަހައިދިނީ އަލްފްރެޑް ފިންބޮގްސަންއެވެ.

ދެ ޓީމު އެއްވަރުވެއޮވެ ފުރަތަމަ ހާފު ނިމިގެންދިޔައިރު ދެވަނަ ހާފުގައި އާޖެންޓީނާއިން ވަނީ ކުޅުން ވަރުގަދަކޮށްފައެވެ. އެހެން ނަމަވެސް އައިސްލޭންޑުގެ ހުރިހާ ކުޅުންތެރިން ވެސް ކުޅުނީ އަމިއްލަ ހާފުގެ ތެރޭގައެވެ. އާޖެންޓީނާއަށް ލީޑު ނެގުމަށް މެޗުގެ 64 ވަނަ މިނެޓުގައި ރަނުގެ ފުރުސަތެއް ލިބުނެވެ. އެގޮތުން މޭޒާއަށް އައިސްލޭންޑުގެ އޭރިއާ ތެރެއިން ފައުލްކުރުމާއެކު ލިބުނު ޕެނަލްޓީ މެސީ ޖެހިއިރު އައިސްލޭންޑުގެ ކީޕަރު ވަނީ މަތަކޮށްފައެވެ. އައިސްލޭންޑުން ވަނީ މެޗުގެ ފަހު ވަގުތުގައި ނުރައްކާކޮށްފައެވެ.

ދެވަނަ ބުރަށް ދާން ބޭނުންވާނަމަ ކުރިޔަށް އޮތް މެޗު އާޖެންޓީނާއިން ކާމިޔާބުކުރަން ޖެހޭނެއެވެ. ބުރާސްފަތި ދުވަހު އާޖެންޓީނާ ކްރޮއޭޝިއާ އާއި ދެކޮޅަށް ނުކުންނައިރު އައިސްލޭންޑް ނުކުންނާނީ ނައިޖީރިއާ އާ ދެކޮޅަށެވެ.