ވާރލްޑް ކަޕް: ޓެކްނޮލޮޖީގެ އެހީތެރިކަމާއެކު ފްރާންސްއަށް އުނދަގޫ މޮޅެއް

ފީފާ ވާރލްޑް ކަޕްގެ ގްރޫޕް ސްޓޭޖުގައި ކުޅުނު ފުރަތަމަ މެޗުގައި ޓެކްނޮލޮޖީގެ އެހީތެރިކަމާއެމު ފްރާންސްއިން އުނދަގޫ މޮޅެއް ހޯދައިފިއެވެ.

ރަޝިއާގެ ކަޒާންގައި ހުންނަ ކަޒާން އެރީނާގައި ކުޅުނު މި މެޗު ފްރާންސްއިން ކާމިޔާބުކުރީ 2-1 ގެ ނަތީޖާއަކުންނެވެ މި މެޗަށް ފްރާންސް ނެރުނު ފުރަތަމަ އެގާރާ ވެގެންދިޔައީ 1930 ވަނަ އަހަރުގެ އެގައުމުން ވާރލްޑް ކަޕްގެ މެޗަކަށް ނެރުނު އެންމެ ޒުވާން ފުރަތަމަ އެގާރައަށެވެ. ހަމައެހެންމެ އެޓީމުގެ ފޯވާޑް ކިލިއަން އެމްބާޕޭ ވެގެންދިޔައީ އެގައުމުގެ ތާރީހުގައި ވެސް ވާރލްޑް ކަޕެއްގައި މެޗެއް ކުޅެދިން އެންމެ ޒުވާން ކުޅުންތެރިޔާއަށެވެ.

ފުރަތަމަ ހާފު ފެށިގެން ފްރާންސްގެ ކުޅުންތެރިން ވަނީ ލަނޑު ޖެހުމަށް ރަނގަޅު ހަމަލާތަކެއް އުފައްދާފައެވެ. އެގޮތުން އެ ޓީމުގެ ކުޅުންތެރިން ފޮނުވާލި ގިނަ ހަމަލާތަކުގެ ހުރަހަކަށް ވެގެންދިޔައީ އޮސްޓްރޭލިއާގެ ކީޕަރު މެޓް ރަޔާންއެވެ. އޮސްޓްރޭލިއާއިން ވަނީ ކައުންޓާގައި ފްރާންސްގެ ގޯލަށް ވެސް ނުރައްކާކޮށްފައެވެ. މެޗުގެ ފުރަތަމަ ހާފުގައި ލަނޑެއް ފެނިފައެއް ނުވެއެވެ.

ދެ ޓީމު ހަމަހަމަވެ އޮވެ ދެވަނަ ހާފު ފެށިގެން ދިޔައިރު ފްރާންސްގެ ފުރަތަމަ ލަނޑު އެ ޓީމުން ޖެހީ މެޗުގެ 58 ވަނަ މިނެޓުގައެވެ. މި ލަނޑަކީ ވީޑިއޯ އެސިސްޓަންޓް ރެފްރީގެ އެހީތެރިކަމާއެކު ރެފްރީދިން ޕެނަލްޓީއަކުން އެންޓޮއިން ގްރީޒްމަން ޖެހި ލަނޑެކެވެ. އެހެން ނަމަވެސް އޭގެ ހަތަރު މިނެޓު ފަހުން އޮސްޓްރޭލިއާއިން ވަނީ އެއްވަރުކޮށްފައެވެ. މި ލަނޑަކީ ސެމުއެލް އުމްޓީޓީ އޭރިއާ ތެރެއިން ބޯޅައިގައި އަތްލުމުގެ ސަބަބުން ރެފްރީ ދިން ޕެނަލްޓީއަކުން އޮސްޓްރޭލިއާގެ ކެޕްޓަން މައިލް ޔެޑިނަކް ޖެހި ލަނޑެކެވެ. ފްރާންސް މި މެޗުން މޮޅުވި ލަނޑު މެޗުގެ 80 ވަނަ މިނެޓުގައި ޖެހީ ޕޮގްބާއެވެ.

ކުރިޔަށް އޮތް މެޗުގައި ފްރާންސް ނުކުންނާނީ ޕެރޫއާ ދެކޮޅަށެވެ. ހަމައެހެންމެ އޮސްޓްރޭލިއާ ދެން ނުކުންނާނީ ޑެންމާކާއި ދެކޮޅަށެވެ.