ބޮޑުންގެ ޝަރީއަތް: ހުލާސާ ބަޔާން އިއްވުން މިއަދު 13:00 ގައި
13 ޖޫން 2018 | ބުދަ 05:56މިއަދުގެ އަޑުއެހުން ތާވަލް ކޮށްފައިވަނީ 13:00 އަށް
ކުރީގެ ރައީސް މައުމޫން (މ)، އުއްތަމަ ފަނޑިޔާރު އަބްދުﷲ ސައީދު (ވ) އަދި ފަަނޑިޔާރު އަލީ ހަމީދު (ކ)
ކުރީގެ ރައީސް މައުމޫނު އަބްދުލްގައްޔޫމާއި އުއްތަމަ ފަނޑިޔާރު އަބްދުﷲ ސައީދާއި ސުޕްރީމް ކޯޓުގެ ފަނޑިޔާރު އަލީ ހަމީދާ ދެކޮޅަށް ދައުލަތުން ހުށަހަޅާފައިވާ އަދުލު އިންސާފު ގާއިމުކުރަން ހުރަސްއެޅުމުގެ ކުށުގެ ދައުވާގެ ހުލާސާ ބަޔާން އިއްވުމަށް ބާއްވާ ޝަރީއަތުގެ އަޑުއެހުން ބުދަ ދުވަހުގެ 13:00 އަށް ތާވަލް ކޮށްފި އެވެ.
އަންގާރަ ދުވަހު 11:00 އަށް ހުލާސާ ބަޔާން އިއްވާ ސަރީއަތުގެ އަޑުއެހުން ކްރިމިނަލް ކޯޓުގައި ތާވަލް ކުރުމަށް ފަހު ވަނީ ކެންސަލް ކޮށްފަ އެވެ. އެ ޝަރީއަތް އަޑުއަހަން ދިޔަ މީހުން ދޮޅުގަޑިއިރަށް ވުރެ ގިނަ ވަގުތު ކޯޓުގެ ތެރޭގައި ބޭތިއްބުމަށް ފަހު ކެންސަލް ކުރީ ބަޔާންތަކުގައި ސޮއި ކުރަން ގިނަ ވަގުތު ހޭދަވާތީ ކަމަށް ބުނެއެވެ.
އެެހެންކަމުން އަންގާރަ ދުވަހު ބާއްވަން އޮތް އަޑުއެހުން ބުދަ ދުވަހުގެ 11:00 އަށް ބަދަލު ކުރެވިފައިވާ ކަމަށް ކޯޓުގެ އޮފިޝަލް ވިދާޅުވި އެވެ. ނަމަވެސް ބުދަ ދުވަހުގެ ޝަރީއަތްތަކުގެ ތާވަލް ގައި އެ ތިން ބޭފުޅުންގެ ޝަރީއަތުގެ އަޑުއެހުން ތާވަލް ކޮށްފައި ވަނީ ބުދަ ދުވަހުގެ 13:00 އަށެވެ.
މިދިއަ އާދިއްތަ ދުވަހުގެ ރޭ އެ ތިން ބޭފުޅުންގެ މައްޗަށް ކުރާ އަދުލު އިންސާފު ގާއިމުކުރަން ހުރަސްއެޅުމުގެ ކުށުގެ ދައުވާއިން ދިފާއުވުމަށް ހުށަހެޅި ހެކީންގެ ހެކިބަސް ނުނެގުމަށް ގާޒީ ވަނީ ނިންމާފަ އެވެ.
ރައީސް މައުމޫނާއި އަބްދުﷲ ސައީދާއި އަދި އަލީ ހަމީދާ ދެކޮޅަށް ކުރާ މި ދައުވާ ސާބިތު ކުރުމަށް ދައުލަތުން ހުށަހެޅި ހުރިހާ ހެކިންގެ ހެކިބަސް ނަގާ ނިމުނީ ވެސް އާދިއްތަ ދުވަހުގެ ރޭ ބޭއްވި އަޑުއެހުމުގަ އެވެ.
މި މައްސަލަ ބައްލަވަނީ ކްރިމިނަލް ކޯޓުގެ ގާޒީ ހަސަން ނަޖީބު އެވެ.
ހުލާސާ ބަޔާން އިއްވުމަށް ފަހު ދެން ބޭއްވޭނީ ހުކުމް ކުރުމަށް ބާއްވާ ޝަރީއަތެވެ.
