ކ. ގުރައިދުގައި ހުންނަ ޚާއްސަ އެހީއަށް ބޭނުންވާ މީހުންގެ މަރުކަޒަށް ވޭތުވެދިޔަ ހަތަރު އަހަރު ތެރޭގައި ވިއްސަކަށް މިލިއަން ރުފިޔާ ޚަރަދު ކުރެވިފައިވާ ކަމަށް ހެލްތު މިނިސްޓަރ އަބްދުﷲ ނާޒިމް ވިދާޅުވެއްޖެ އެވެ.
މޯލްޑިވްސް ގާރލްގައިޑް އެސޯސިއޭޝަންގެ ފަރާތުން ގުރައިދޫގައި ހުންނަ ޚާއްސަ އެހީއަށް ބޭނުންވާ މީހުން ބަލަހައްޓާ މަރުކަޒަށް ތަކެތި ހަދިޔާކުރުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުން މިނިސްޓަރ ވިދާޅުވީ މިސަރުކާރަކީ ޚާއްސަ އެހީއަށް ބޭނުންވާ މީހުންނަށް އަޅާލުމުގައި ޗެމްޕިއަން ސަރުކާރެއް ކަމަށާއި އަމާޒަކީ ޚާއްސަ އެހީއަށް ބޭނުންވާ މީހުންނަށް އާޅާލުމުގައި ޗެމްޕިއަން ސަރުކާރެއްގެ ގޮތުގައި ދެމި އޮތުން ކަމަށެވެ.
އެގޮތުން ޚާއްސަ އެހީއަށް ބޭނުންވާ މީހުންނަށް ވަޒީފާ ހޯދައިދިނުމުގައި ސަރުކާރުން ރީތި ނަމޫނާއެއް ދައްކައިދީފައިވާކަން މިނިސްޓަރ ފާހަގަކުރެއްވިއެވެ.
މި ސަރުކާރުގެ ކުންފުނިތަކުން ޚާއްސަ އެހީއަށް ބޭނުންވާ މީހުންނަށް އަދާކުރެވޭނެ ކަހަލަ ވަޒީފާތައް ދެނެގަނެ 100އަށް ވުރެ ގިނަ އެތައް ފަރާތަކަށް ސަރުކާރުން ވަޒީފާ ހޯދއިދީފައިވާ ކަމަށާއި ޚާއްސަ އެހީއަށް ބޭނުންވާ މީހުންނަށް ބޭސްފަރުވާގެ ކަންކަން ފަސޭހައިން ކުރެވޭނެ އިންތިޒާމު ހަމަޖައްސާފައިވާ ކަމަށް ވެސް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ މުޖްތަމައުއެއްގެ ހަމަޖެހުމާއި ގުޅިފައިވާ އެންމެ ބޮޑު އެއް ކަމަކީ އެ މުޖުތަމައުއެއްގައި އެކި ގޮތްގޮތުން ޚާއްސަ އެހީއަށް ބޭނުންވާ މީހުންނަށް އަޅާލުމާއި އޯގާތެރިކަން ދެވެމުންދާ މަންޒަރު ފެނިގެން ދިއުން ކަމަށެވެ.
ޚާއްސައެ ހީއަށް ބޭނުންވާ މީހުނަންނަށް ދޭންޖެހޭ އޯގާތެރިކަމާއި އާޅާލުން ނުދެވޭ ނަމަ އެ މުޖްތަމައު މުޖްތަމައު އަކަށް ނުވާ ކަމަށް މިނިސްޓަރ ވިދާޅުވިއެވެ.
އަދި މިސަރުކާރުން ޚާއްސަ އެހީއަށް ބޭނުންވާ މީހުންގެ ކަންކަމަށް ވަރަށް ފުންކޮށް ވިސްނާ ޚާއްސަ ސިޔާސަތެއްގެ ގޮތުގައި ހެލްތު މިނިސްޓްރީއާއި ހަވާލުކުރެވިގެން އެފަރާތްތަކަށް އެހީތެރިވުމުގެ ސިޔާސަތު ތަންފީޒް ކުރެވިގެންދާ ކަމަށް މިނިސްޓަރ ވިދާޅުވިއެވެ.