ރިޔާސީ އިންތިހާބު ބާއްވާނެ ދުވަސް ކަނޑައަޅައިފި، އިއުލާން ކުރުން ބުރާސްފަތި ދުވަހުގެ ރޭ
5 ޖޫން 2018 | އަންގާރަ 09:58ޤައުމީ ލަފާދޭ ކޮމެޓީގެ ބައްދަލުވުމެެއް މިއަދު ވަނީ ބާއްވާފައި
އިލެކްޝަންސް ކޮމިޝަނުގެ މެމްބަރުން ނޫސްވެރިންނަށް މައުލޫމާތު ދެއްވަނީ (ފައިލް ފޮޓޯ)
މިއަހަރު ބާއްވާ ރިޔާސީ އިންތިހާބު ބާއްވާނެ ދުވަސް ކަނޑައަޅާފައިވާ ކަމަށާއި ރިޔާސީ އިންތިހާބު އޮންނަ ދުވަސް އިއުލާން ކުރުން އަންނަ ބުރާސްފަތި ދުވަހުގެ ރޭ އޮންނާނެ ކަމަށް އިލެކްޝަންސް ކޮމިޝަނުން ބުނެފި އެވެ.
އިލެކްޝަންސް ކޮމިޝަނުގެ މެމްބަރު އަދި ތަރުޖަމާނު އަހުމަދު އަކްރަމް "ރާއްޖެއެމްވީ"އަށް ވިދާޅުވީ އެކޮމިޝަނުން އަންގާރަ ދުވަހު ބޭއްވި ބައްދަލުވުމުގައި ރިޔާސީ އިންތިޚާބު ބާއްވާނެ ދުވަހަކާއި ބެހޭ ގޮތުން މަޝްވަރާކޮށް ތާރީހެއް ކަނޑައަޅާފައިވާ ކަމަށެވެ.
އަކްރަމް ވިދާޅުވީ ރިޔާސީ އިންތިޚާބާ ގުޅޭގޮތުން މީޑިއާ ބައިވެރިކޮށްގެން ބާއްވާ ހާއްސަ ބައްދަލުވުމެއް މިހަފްތާގެ ބުރާސްފަތި ދުވަހުގެ ރޭ އޮންނާނެ ކަމަށެވެ. އެ ހަފްލާގައި އިންތިހާބު ބާއްވާނެ ތާރީހު އިއުލާންކުރާނެ ކަމަށް އަކްރަމް ވިދާޅުވިއެވެ.
ދައުލަތުގެ މީޑިއާގެ "ޕީއެސްއެމް ނިއުސް" ގައި އިންތިހާބާ ގުޅޭގޮތުން ވާހަކަ ދައްކަވަމުން އަކްރަމް ވިދާޅުވެފައި ވަނީ އިންތިހާބުގެ ތައްޔާރީތައް ވަރަށް ބާރަށް ކުރިއަށްދާ ކަމަށެވެ. އަދި އިންތިހާބުގެ ތައްޔާރީތަކުގެ 90 އިންސައްތަ ނިމިފައިވާ ކަމަށާއި، ޝަކުވާ ހުށަހެޅުމުގެ ނިޒާމް ފައްކާކޮށް، އިލެކްޝަންސް ކޮމްޕްލެއިންސް ބިއުރޯވެސް ޤާއިމްކޮށްފައިވާކަމަށް އަކްރަމް ވިދާޅުވި އެވެ.
އަކްރަމް ވިދާޅުވީ މި މަހު ވޯޓާރސް ލިސްޓް ހާމަކޮށް، ރީ ރަޖިސްޓްރޭޝަނަށް ހުޅުވާލާނެ ކަމަށެވެ. އަދި އިންތިހާބަށް ކުރިމަތިލުމުގެ ފުރުސަތު އަންނަ މަހު ހުޅުވާލާނެ ކަމަށާއި، އެޔަށް ފަހު ސެޕްޓެމްްބަރު މަހުގެ ތާރީހެއްގައި އިންތިހާބު ބާއްވާނެ ކަމަށެވެ.
އަކްރަމް ވިދާޅުވިގޮޮތުގައި ކުރިއަށް އޮތް ރިިޔާސީ އިންތިހާބަކީ މިނިވަން އިިންސާފުވެރި އަދި ދެފުށް ފެންނަ އިންތިހާބަކަށްވާނެ އެވެ. އަދި އިންތިހާބުގައި ބޭނުންކުރާ ވޯޓު ކަރުދާސްތައް ވެސް ވެގެންދާނީ ސަލާމަތީ ގޮތުން ވަރުގަދަ ކަރުދާސްތަކަކަށް ކަމަށް އަކްރަމް ވިދާޅުވި އެވެ. އޭނާ ވިދާޅުވިގޮތުގައި ވޯޓާރސް ލިސްޓު ވެސް ކުރިން ބޭއްވި އިންތިހާބުތަކަށް ވުރެ ފުރިހަމަވާނެ އެވެ.
ރިޔާސީ އިންތިހާބަށް ތައްޔާރުވަމުން އަންނައިރު، އިދިކޮޅު ފަރާތްތަކުން ވަނީ މިހާރުުގެ އިލެކްޝަންސް ކޮމިޝަނާއެކު މިނިވަން އިންސާފުވެރި އިންތިހާބެއް ނުބޭއްވޭނެ ކަމަށް ބުނެފަ އެވެ. އަދި އެ ކޮމިޝަނަކީ ރައީސް އަބްދުﷲ ޔާމީންގެ އޯޑަރަށް މަސައްކަތްކުރާ ބަޔަކު ތިބި، މިނިވަންކަމާއި ނަޒާހަތްތެރިކަން ގެއްލިފައިވާ ކޮމިޝަނެއްކަމަށް ވެސް އިދިކޮޅު ފަރާތްތަކުން ބުނެ އެވެ.
