ކަރީނާ ދެން ކުޅޭ ފިލްމެއް އަކްޝޭ އާއެކު
3 ޖޫން 2018 | އާދީއްތަ 10:24އެދެމީހުން އެންމެ ފަހުން ފެނިގެން ގޮސްފައިވަނީ މީގެ ނުވަ އަހަރު ކުރިން
އަކްޝޭއާއި ކަރީނާ
ވީރޭ ދި ވެޑިންއަށް ފަހު ކަރީނާ ފެނިގެންދާނެ ފިލްމު އޭނާ ހާމަކޮށްފިއެވެ.
ކަރީނާ އެންމެ އަވަހަށް ފެނިގެންދާނީ ކަރަން ޖޯހަރު ޕްރޮޑިއުސް ކުރާ ފިލްމަކުންނެވެ. އަދި މި ފިލްމު ޑައިރެކްޓް ކުރަނީ ރާޖް މެހެތާ ކަމަށާއި ކަރީނާ ފެނިގެންދަނީ މި ފިލްމުގައި މަންމައެއްގެ ރޯލުން ކަމަށް މީގެ ކުރިން ވަނީ އަޑުތައް އަރާފައެވެ.
އެއަޑުތައް ހަގީގަތަކަށް ވެފައިވާއިރު މި ފިލްމުގައި ކަރީނާއާއި އެކީގައި ފެނިގެންދާނީ އަކްޝޭ ކުމާރުކަމަށް ވެސް މިހާރު ވަނީ ހާމަކޮށްފައެވެ.
ރާޖް މެހެތާ ޑައިރެކްޓް ކުރާ މިފިލްމުގައި ކަރީނާ އާއެކު ލީޑްރޯލުން ފެނިގެންދާނީ އަކްޝޭ ކުމާރު އެވެ.
އިންޑިއާގެ ނޫސްތަކުގައި ބުނެފައިވަނީ ކަރަން، ކަރީނާ ލައްވާ ފިލްމު ކުޅެން ބޭނުންވެގެން އުޅޭތާ ދުވަސްކޮޅެއް ވެއްޖެ ކަމަށާއި ދަރްމާ ޕްރޮޑަކްޝަންއިން 2016 ވަނަ އަހަރު ނިކުތް ކީ އެންޑް ކާ އަށް ފަހު ފިލްމުގެ ޝޫޓިން ނުފެށި އޮތީ ކަރީނާ ބަލިވެއިނުމުގެ ސަބަބުން ކަމަށެވެ. އަދި މި ފިލްމުގައި ކަރީނާ މަންމައެއްގެ ރޯލަށް ފިޓްވާނެ ކަމަށް ކަރަން ވެސް ބުނެފައިވާ ކަމަށް ޚަބަރުތައް ވަނީ ބުނެފައެވެ.
އަކްޝޭ އާއި ކަރީނާ ފެނިގެންދާ ކަރަންގެ މި ފިލްމަށް އަދި ނަމެއް ދީފައި ނުވާއިރު މި ފިލްމު ވެގެންދާނީ އެދެމީހުން އެކުގައި ކުޅުނު ކަމްބަގްތު އިޝްގަށް ފަހު ދެމީހުން ފެނިގެންދާނެ ފުރަތަމަ ފިލްމަށެވެ. ކަމްބަގްތު އިޝްގު ރިލީޒް ކޮށްފައިވަނީ މީގެ ނުވަ އަހަރު ކުރިންނެވެ.
ކަރީނާއާއި އަކްޝޭގެ އިތުރުން އިތުރު އެހެން ޖޯޑެއް ވެސް މި ފިލްމުން ފެނިގެންދާނެ ކަމަށް ޚަބަރުތައް ބުނެއެވެ. އެހެން ނަމަވެސް އަދި އެއީ ކޮންބައެއްކަމެއް ހާމައެއް ނުކުރެއެވެ.
