ކަރީނާ ދެން ފެނިގެންދާނީ ކަރަން ޖޯހަރުގެ ފިލްމަކުން؟
29 މެއި 2018 | އަންގާރަ 10:09މި ފިލްމުގެ ޝޫޓިން އަންނަ ނޮވެމްބަރުގައި ފަށާނެކަމަށް ޚަބަރުތައް ބުނޭ
ކަރީނާ ކަޕޫރު
ކަރީނާ ވިހެއުމަށް ފަހު ފެނިގެންދާ ފުރަތަމަ ފިލްމު ވީރޭ ދި ވެޑިން ސިނަމާތަކަށް އަންނަން އޮތީ ދެތިން ދުވަހެވެ. އެ ފިލްމު ޕްރޮމޯޓު ކުރުމުގެ މަސައްކަތުގައި ކަރީނާއާއި އެ ފިލްމުގެ ޓީމުން ދަނީ އަވަދިނެތި މަސައްކަތް ކުރަމުންނެވެ.
މި ފިލްމުގެ މަސައްކަތަށް ފަހު ކަރީނާ އަދި ކުޅޭނެ ފިލްމެއް ރަސްމީކޮށް ހާމަކޮށްފައެއް ނުވެއެވެ. ޚަބަރުތައް ބުނާގޮތުގައި ކަރީނާ އެންމެ އަވަހަށް ފެނިގެންދާނީ ކަރަން ޖޯހަރު ޕްރޮޑިއުސް ކުރާ ފިލްމަކުންނެވެ. އަދި މި ފިލްމު ޑައިރެކްޓް ކުރަނީ ރާޖް މެހެތާ ކަމަށާއި ކަރީނާ ފެނިގެންދަނީ މި ފިލްމުގައި މަންމައެއްގެ ރޯލުން ކަމަށް ވެސް ޚަބަރުތައް ބުނެއެވެ.
އިންޑިއާގެ ނޫސްތަކުގައި ބުނެފައިވަނީ ކަރަން، ކަރީނާ ލައްވާ ފިލްމު ކުޅެން ބޭނުންވެގެން އުޅޭތާ ދުވަސްކޮޅެއް ވެއްޖެ ކަމަށާއި ދަރްމާ ޕްރޮޑަކްޝަންއިން 2016 ވަނަ އަހަރު ނިކުތް ކީ އެންޑް ކާ އަށް ފަހު އާ ފިލްމެއްގެ މަސައްކަތް ކުރުމަށް އޭނާއާއި ވާހަކަ ދައްކަމުން އަންނަ ކަމަށެވެ. އެހެން ނަމަވެސް އެދޭތެރެއިން ކަރީނާ ބަލިވެއިނުމުގެ ސަބަބުން އެކަންތައް ނުވެ އޮތީ ކަމަށާއި މި ފިލްމުގައި ކަރީނާ މަންމައެއްގެ ރޯލަށް ފިޓްވާނެ ކަމަށް ކަރަން ވެސް ބުނެފައިވާ ކަމަށެވެ. އަދި މި ފިލްމުގެ ސްކްރިޕްޓު ކަރީނާ ކިޔާފައިވާ ކަމަށާއި އޭނާ މި ފިލްމަށް އާނ އެކޭ ބުނެފި ކަމަށެވެ.
ޚަބަރުތައް ބުނާގޮތުގައި ކަރީނާގެ އިތުރުން މި ފިލްމުގައި އިތުރު ތިން ތަރިން ފެނިގެން ދާނެއެވެ. މި ފިލްމުގެ ޝޫޓިން އަންނަ ނޮވެމްބަރ މަހުގެ ތެރޭގައި ފަށާނެ ކަމަށް ވެސް ޚަބަރުތައް ބުނެއެވެ.
އެހެން ނަމަވެސް މިކަމާއި ގުޅިގެން ކަރީނާ ވެސް އަދި ކަރަންޖޯހަރުގެ ދަރްމާ ޕްރޮޑަކްޝަނުން ވެސް ވަކި އެއްޗެއް ހާމަކޮށްފައެއް ނުވެއެވެ.
