އެމްޑީޕީގެ ރިޔާސީ ޓިކެޓް ރައީސް ނަޝީދާއި ހަވާލުކޮށްފި
ރައީސް ނަޝީދުގެ ފަރާތްޕުޅުން ރިޔާސީ ޓިކެޓާއި ހަވާލުވެ ވަޑައިގަތީ ޕްރައިމަރީގައި އެމަނިކުފާނުގެ ކެމްޕޭން މެނޭޖަރަކަށް އުޅުއްވި މެމްބަރު އަސްލަމް
އެމްޑީޕީގެ ރިޔާސީ ޓިކެޓް ރައީސް ނަޝީދާއި ހަވާލުކުރުމަށް ބޭއްވި ހަފްލާ
ކުރިއަށް އޮތް ރިޔާސީ އިންތިޚާބަށް އެމްޑީީޕީން ނެރޭނެ ކެންޑިޑޭޓަކު ހޮވުމަށް އެޕާޓީއިން ބޭއްވި އެތެރޭގެ އިންތިޚާބުން ކާމިޔާބު ހޯއްދެވި ކުރީގެ ރައީސް މުހައްމަދު ނަޝީދަށް އެމްޑީޕީގެ ރިޔާސީ ޓިކެޓް ރަސްމީކޮށް ހަވާލުކޮށްފިއެވެ.
ޓިކެޓް ރަސްމީކޮށް ހަވާލުކުރީ އެޕާޓީގެ ހަރުގޭގައި ހޮނިހިރު ދުވަހުގެ ހަވީރު ބޭއްވި ހަފްލާއެއްގައެވެ. ރައީސް ނަޝީދުގެ ފަރާތްޕުޅުން ރިޔާސީ ޓިކެޓާއި ހަވާލުވެ ވަޑައިގަތީ ރިޔާސީ ޕްރައިމަރީގައި އެމަނިކުފާނުގެ ކެމްޕެއިން މެނޭޖަރުގެ ގޮތުގައި ހަރަކާތްތެރިވި ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ މެންބަރު މުހައްމަދު އަސްލަމްއެވެ.
މި ހަފްލާގައި ވާހަކަފުޅު ދައްކަވަމުން އެމްޑީީގެ ޗެއަރޕަރސަން ހަސަން ލަތީފް ވިދާޅުވީ އެމްޑީޕީގެ ރިޔާސީ އިންތިޚާބުގެ ކެމްޕެއިން ވަރަށް ފޯރިއާއިއެކު ރާއްޖޭގެ އެކި ހިސާބުތަކުގައި ދެން ފެށިގެން ދާނެކަމަށެވެ. އަދި ރިޔާސީ އިންތިޚާބަކަށް ދާއިރު އެންމެ މުހިއްމު އެކައްޗަކީ މެނިފެސްޓޯ ކަމަށްވާއިރު އެޕާޓީގެ މެނިފެސްޓޯގެ އެކުލަވާލުމުގެ މަސައްކަތްވެސް ވަރަށް ފޯރިއާއެކު ކުރިއަށް ގެންދާކަމަށާއި، ރައްޔިތުންނާއި ހަމައަށް ދަތުރުކޮށް މެނިފެސްޓޯ އެކުލަވާލުމަށް ފުރިހަމަ ޑޮކިއުމެންޓެއް މި ޖޫންމަހު ތައްޔާރުކޮށް ނިންމާލާނޭކަމަށް އުއްމީދު ކުރައްވާކަމަށެވެ.
އޭނާ ވިދާޅުވީ ރައީސް ނަޝީދުގެ ނަންފުޅު ވޯޓު ކަރުދާސްކޮޅުގައި އޮތުމަށް މިހާރު ކުރަމުންދާ މަސައްކަތް ވަރަށް މުހިއްމު ކަމަށެވެ.
"އެގޮތަށް އަޅުގަނޑުމެން މަސައްކަތް ކުރުމުން ކެނޑިޑެންސީ ކަށަވަރުވެ، ރައީސް ނަޝީދުގެ ނަންފުޅު ވޯޓްކަރުދާސްކޮޅުގައި އޮތުމަށް މަގުފަހިކުރެވޭނެ،" އޭނާ ވިދާޅުވިއެވެ.
މި ހަފްލާގައި ރައީސް މުހައްމަދު ނަޝީދުވެސް ސްކައިޕް މެދުވެރިކޮަށް ވާހަކަފުޅު ދެއްކެވިއެވެ.
