އެމްޑީޕީގެ ޕްރައިމަރީގައި ވޯޓުލުމުން އެސްޓިއޯގެ ފޮނަދޫ ފިހާރައިގެ މުވައްޒިފަކު ވަޒީފާއިން ވަކިކޮށްފި

ލ. ފޮނަދޫ އެސްޓިއޯ ފިހާރާގައި މަސައްކަތް ކުރާ މުވައްޒިފަކު މެއި މަހުގެ 30 ވަނަ ދުވަހު ބޭއްވި އެމްޑީޕީގެ ޕްރައިމަރީގައި ވޯޓްލުމުގެ ސަބަބުން ވަޒީފާއިން ވަކިކޮށްފިއެވެ.

އިދިކޮޅު އެމްޑީޕީއަށް ތާއީދުކުރާ އިބްރާހިމް މުހައްމަދު އެސްޓިއޯގެ ވަޒީފާއިން ވަކިކޮށްފައި ވަނީ ބުރާސްފަތި ދުވަހުގެރޭގައެވެ. ދިހަ އަހަރު ދުވަހު ލ. ފޮނަދޫ އެސްޓިއޯ ފިހާރަ (އެސްޓިއޯ 134) ގައި ވަޒީފާ އަދާކޮށްފައިވާ އިބްރާހިމް ވަޒީފާއިން ވަކިކުރިކަން އެނާއަށް އަންގާފައި ވަނީ އެ ކުންފުނިން ފޮނުވި ސިޓީއެއްގައެވެ.

އެ ސިޓީގައި ބުނެފައި ވަނީ އެސްޓިއޯގެ މުވައްޒިފަކަށްވެހުރެ، އެސްޓިއޯ ބަދުނާމުވާގޮށް އިބްރާހިމްގެ އަމަލުތައް ބަހައްޓާކަން ފާހަގަކުރެވޭ ކަމަށެވެ. އެހެންކަމުން، އެސްޓިއޯގެ މެނޭޖްމަންޓްއިން، އެ ކުންފުނީގެ މުވައްޒަފުންގެ އަތްމަތީ ފޮތުގެ 2 ވަނަ މާއްދާގެ 2.7 ގެ ހަތަރަކަށް ރިޢާޔަތްކުރުމަށްފަހު، މުވައްޒިފުންގެ އަތްމަތީ ފޮތުގެ 2 ވަނަ މާއްދާގެ 2.7 ގެ (ނ) ގެ ދަށުން 2 މަސް ދުވަހުގެ ނޯޓިސްއަށްވާ ފައިސާދީ ޖޫން މަހުގެ 1 ވަނަ ދުވަހުން ފެށިގެން ވަޒީފާއިން ވަކިކުރުމަށް ނިންމާފައިވާ ކަމަށެވެ.

ފޮނަދޫ ރާއްޖެއެއްވީއަށް މައުލޫމާތު ދިން މީހާކު ބުނީ އިބްރާހިމް އަކީ ފާޅުގައި ފޮނަދޫ ދާއިރާގެ ރައްޔިތުންގެ މަޖިލީހުގެ މެމްބަރު އަބްދުއްރަހީމް އަބްދުﷲގެ ބައެއް ސިޔާސަތުތަކަށް ފާނޑުކިޔާ، އެމްޑީޕީގެ ހަރަކާތްތަކުގައި ބައިވެރިވަމުން އަންނަ މީހެއް ކަމަށެވެ. އެގޮތުން އެނާ ވަޒީފާއިން ވަކި ކުރި މައިގަނޑު ސަބަބަކީ އެމްޑީޕީގެ ޕްރައިމަރީ ހުއްޓުވަން ފުލުހުން މަސައްކަތް ކުރަމުން ދަނިކޮށް އިބްރާހިމް ފާޅުގައި އެވޯޓްގައި ބައިވެރިވެ، އެ ފޮޓޯ ސޯސަލް މީޑިއާގައި ދައުރުވަމުން ދަނިކޮށް ކަމަށް އެނާ ބުންޏެއެވެ.

އެމްޑީޕީގެ ޕްރައިމަރީ ހުއްޓުވުމަށް މަސައްކަތް ކުރުމުގެ ތެރޭގައި ފުލުހުންނަށް ހުރަސް އެޅި މައްސަލައާއި ގުޅިގެން ހައްދުންމަތީ ގަމުން ކޯޓް އަމުރެއްގެ ދަށުން ތިން މީމީހަކު ވަނީ ހައްޔަރުވެސްކޮށްފަ އެވެ.