ޖަޒީރާ ރައީސްގެ ކެމްޕެއިން: ގަލޮޅު ކަންމަތީގައި ބިލްބޯޑް ހަރުކޮށްފި

ގަލޮޅު ކަންމަތީގައި ހުންނަ ފަސޭހަ ޕޮއިންޓް ކެފޭ ފާރުގައި މޭ 28 ވަނަ ދުވަހުގެ ރޭ ޒަޒީރާ ރައީސް ކެމްޕެއިންގެ ބިލް ބޯޑް ބަހައްޓައިފިއެވެ.

ބިލް ބޯޑު ބެހެއްޓުމުގެ ރަސްމިއްޔާތުގައި ވާހަކަ ދައްކަވަމުން ގަލޮޅު އުތުރު ދާއިރާގެ ކައުންސިލަރު އަދި މާލެ ސިޓީގެ މޭޔަރު ޝިފާ މުހައްމަދު ވިދާޅުވީ ހިތްވަރާއި ޖޯޝާއެކު ޕާޓީގެ ކުރީގެ ޕްރައިމަރީ ވޯޓްލީ ފަހަރުތަކާ އެއްގޮތަށް މިމަހު 30 ވަނަ ދުވަހު އެމްޑީޕީއަކީ ކޮބައިކަން ދައްކާލަން ހުރިހާ އާންމުން ވެސް އެއް އަޒުމެއްގައި ވޯޓް ލާން ނިކުތުމަށް އެދިވަޑައިގަންނަވާ ކަމަށެވެ.

Advertisement

އެމްޑީޕީ ގައުމީ މަޖްލިސް މެމްބަރު އަދި ގަލޮޅު އުތުރު ދާއިރާގެ މެމްބަރު އީވާ އަބްދުﷲ ވިދާޅުވީ ރައީސް ނަޝީދު ވިދާޅުވީ ތެދު ފުޅެއްކަމަށެވެ. ރައީސް ނަޝީދު ވިދާޅުވިހެން އެ ބޭފުޅާ ވާދަ ކުރެއްވުމަށް ދިވެހި ރާއްޖޭގެ ސުޕްރީމް ކޯޓުން އާ ބަސް ބުނެފައިވާ ކަމަށާއި އދ. އިން އާބަސް ބުނެފައިވާ ކަމަށެވެ. މިފަހަރު މިއީ ދިވެހި ރައްޔިތުންގެ ޑިމޮކްރެޓިކް ޕާޓީން އެއް ފިކުރެއްގައި ނިކުމެ، އެއް އަޑުން އާ ބަސް ކިޔަންވީ ވަގުތު ކަމަށެވެ.

2008ގެ އިންތިޚާބުގައި ރައީސް ނަޝީދުގެ ނަންފުޅު ވޯޓް ކަރުދާހުގައި އޮތީ އެންމެ ފަހު ވަގުތު ކަމަށާއި 2013 ވަނަ އަހަރު އިންތިޚާބު ބާއްވަން ތިން މަސް ވީއިރުވެސް ނަންފުޅު ނެތްކަން ފާހަގަ ކުރަށްވާ އީވާ ވިދާޅުވީ އެ ޕާޓީން ބުނަމުން ދިޔަ ގޮތަށް އެންމެ ފަހު ފަޅި ސިކުންތުގައި ވޯޓު ކަރުދާހުގައި ނަންފުޅު އިލެކްޝަން ކޮމިޝަނުން ލިޔުނު ކަމަށެވެ. އަދި މިފަހަރު ވެސް ވާނީ ހަމަ އެގޮތް ކަމަށް އީވާ ވިދާޅުވިއެވެ. އެހެން ކަމުން ހުރިހާ މެމްބަރުންގެ ބާރު ދައްކާލަން މިމަހު 30ވަނަ ދުވަހު ޕްރައިމަރީގައި ވޯޓް ލުމަށް ނިކުތުމަށް ވަނީ ގޮވާލައިފައެވެ.

ގަލޮޅު ދެކުނު ދާއިރާގެ ކައުންސިލް މެމްބަރު ޝަހީން މަހްމޫދް ވިދާޅުވީ ޖަޒީރާ ކެމްޕެއިންގައި މަސައްކަތް ކުރަމުންދާ ފަރާތްތައް ތިބީ ބިރު ވެރިކަމެއްގެ ތެރޭގައި ކަމަށާއި އެބޭފުޅުން ކުރާ މަސައްކަތަށް ވަރަށް ބޮޑަށް ޝުކުރު އަދާ ކުރާކަމަށެވެ.

ހޯމަ ދުވަހު އެމްޑީޕީ އޮފީހުގައި ބޭއްވި ނޫސްވެރިންގެ ބައްދަލުވުމުގައި އެ ޕާޓީން ބުނީ މި މަހުގެ 30 ވަނަ ދުވަހު ބޭއްވުމަށް ހަމަޖެހިފައިވާ އެމްޑީޕީގެ ރިޔާސީ ޕްރައިމަރީއަށް އެޕާޓީން ފުރިހަމައަށް ތައްޔާރު ވެފައިވާ ކަމަށެވެ.