ޖަޒީރާ ރައީސްގެ މަންތިރި ޖަގަހަ ހޯރަފުށީގައި ހުޅުވައިފި

މި މަހުގެ 30 ވަނަ ދުވަހު ބާއްވާ އެމްޑީޕީ ޕްރައިމަރީގައި ވާދަކުރައްވާނެ ކަމަށް އިއުލާން ކުރައްވާފައިވާ ކުރީގެ ރައީސް މުހައްމަދު ނަޝީދުގެ ކެމްޕެއިން ހަރަކާތްތައް ވަރުގަދަ ކުރުމުގެ ގޮތުން "ޖަޒީރާ ރައީސް މަންތިރި ޖަގަހަ" ހއ. ހޯރަފުށީގައި ހުޅުވާއިފިއެވެ.

ރާއްޖެއެމްވީއަށް މައުލޫމާތު ދެމުން ހޯރަފުށީ ކައުންސިލްގެ މެމްބަރު އަހުމަދު އިމްދާހް ވިދާޅުވީ މަންތިރި ޖަގަހަ ހޯރަފުށީގައި ހުޅުވީ ހޮނިހިރު ދުވަހުގެ ރޭ ކަމަށެވެ. ޖަގަހަ ހުޅުވުމަށް ބޭއްވި ހަފްލާގައި ހޯރަށުފީ އެމްޑީޕީގެ ގިނަ އަދަދެއްގެ އާއްމު މެމްބަރުން ބައިވެރިވިކަން ފާހަގަކޮށްލެއެވެ.

ހޯރަފުށީގައި މަންތިރި ޖަގަހަ ހުޅުވުން

އިމްދާހް ވިދާޅުވީ ރައީސް ނަޝީދުގެ "ޖަޒީރާ ރައީސް" ގެ ކެމްޕެއިން ހަރަކާތްތައް ހޯރަފުށީގައި ކުރިއަށް އޮތް ދުވަސް ދުވަހު ވަރުގަދަ ވާނެ ކަމަށެވެ. އެގޮތުން އެމްޑީޕީގެ ޕްރައިމަރީގައި ރައީސް ނަޝީދަށް ކާމިޔާބު ހޯދައިދިނުމަށްޓަކައި ގިނަ ހަރަކާތްތަކެއް މަންތިރި ޖަގަހާގައި ކުރިއަށް ގެންދަން ނިންމާފައިވާ ކަމަށް އެނާ ވިދާޅުވިއެވެ.

އެމްޑީޕީގެ ރިޔާސީ ޕްރައިމަރީގައި ރައީސް ނަޝީދު ވާދަ ކުރައްވާނެ ކަމަށް އިއުލާން ކުރެއްވުމާއެކު އެމްޑީޕީގެ ޕާލަމެންޓްރީ ގްރޫޕުގެ މެމްބަރުންނާއި ޕާޓީގެ އިސް ބޭފުޅުން ވަނީ އެމަނިކުފާނަށް ބައިއަތު ހިއްޕަވާފައެވެ. އަދި އެމަނިކުފާންގެ ކެމްޕޭން ހަރަކާތްތައް ވަރަށް ފޯރިއާއި ޖޯޝާ އެކު އަތޮޅުތެރޭގެ ރަށްތަކުގައި ކުރިއަށްދާކަން ފާހަގަކޮށްލެއެވެ.