ފަތުރުވެރިން ތަކަކާއެކު ސަފާރީއެއް ފަރަކަށް އަރައިފި
މި ދޯނީގައި 17 ފަތުރުވެރިންނާ 17 ފަޅުވެރިން ތިބި
ފަރަށްއެރި ސަފާރީ
ސަތާރަ ފަތުރުވެރިންނާއެކު ބ.ހަނިފަރު ފަރަށް އެރި "މުޒައިފް" ނަމަކަށް ކިޔާ ސަފާރީއަކާއި އޭގެ ޑައިވިންގ ދޯންޏަށް އެމްއެންޑީއެފް ނޮދަން އޭރިއާ ކޯސްޓްގާޑް ސްކޮޑްރަންއިން އެހީތެރިކަން ފޯރުކޮށްދީފިއެވެ.
އެމްއެންޑީއެފުން ބުނީ މި ހާދިސާގެ މަޢުލޫމާތު ބުދަ ދުވަހުގެރޭ ފަތިހު 04:42 ހާއިރު އެމްއެންޑީއެފް ކޯސްޓްގާޑްގެ މެރިޓައިމް ރެސްކިއު ކޯޑިނޭޝަން ސެންޓަރަށް ލިބުމާއެކު ވަނީ ހަރަކާތްތެރިވާން ފަށާފައި ކަމަށެވެ. މިގޮތުން އެމްއެންޑީއެފް ނޮދަން އޭރިއާ ހެޑްކްއޯޓާރޒްގައި ބޭނުންކުރާ ހާބަރ ކްރާފްޓް ލޯންޗް ވަނީ ޕަމްޕާއި ޑައިވަރުންގެ ޓީމަކާއެކު ދޯނި ފުންކުރުމުގެ މަސައްކަތުގައި ހަރަކާތްތެރިވެފައެވެ. މި ހާދިސާގައި ފަރަށް އެރި ސަފާރީ އާއި އޭގެ ޑައިވިންގ ދޯނި ފުންކުރެވިފައިވަނީ އެމްއެންޑީއެފް ނޮދަން އޭރިއާ ކޯސްޓްގާޑް ސްކޮޑްރަންގެ ސިފައިން ކުރި މަސައްކަތުން ބުރާސްފަތި ދުވަހު 07:58 ހާއިރުއެވެ.
މި ހާދިސާގައި ބ.ހަނިފަރު ފަރަށް އެރި "މުޒައިފް" ސަފާރީގައި 17 ފަތުރުވެރިންނާއި 17 ފަޅުވެރިން ތިބި ކަމަށް އެމްއެންޑީއެފް ކޯސްޓްގާޑުން މަޢުލޫމާތު ދެއެވެ. އަދި މި ހާދިސާގައި އެއްވެސް މީހަކަށް ގެއްލުމެއް ލިބިފައެއް ނުވެއެވެ.
