20ރ. އަށް ތިން ކޮޕީ ފަތް

ބާޒާރުގައި ކޮޕީ ފަތް މަދުވެ، އަގު ބޮޑުވެއްޖެ އެވެ.

މިހާރު ބާޒާރުން ތިން ކޮޕީ ފަތް ލިބެނީ 20 ރުފިޔާ އަށެވެ.

ތަކެތި ވިއްކާ ފަރާތްތަކުން ބުނީ، ފަތް ހޯދުމަށް އިންތިހާއަށް އުނދަގޫ ކަމަށާއި ކޮންމެ ދުވަހަކުވެސް ވަރަށް އަވަހަށް ކޮޕީ ފަތް ހުސްވާ ކަމަށެވެ.

ކޮޕީ ފަތް އާންމުކޮށް ގެންނަނީ ކ. ކާށިދޫ އާއި ށ އަތޮޅުގެ ރަށްތަކުން ނެވެ.

" ކޮޕީ ފަތަށް ޑިމާންޑް ވަރަށް ބޮޑު، ވަރަށް އަވަހަށް ހުސްވޭ." ތަކެތި ވިއްކާ ފަރާތްތަކުން ބުނެ އެވެ.

ބާޒާރުގައި ތަކެތީގެ އަގުތަކަށް އައިސްފައިވާ ބަދަލުތަކަށް ބަލާ އިރު ކަރާ ކިލޯއެއްގެ އަގު އުޅެނީ، 30ރ އާއ 35ރ. އާ ދެމެދުގަ އެވެ. ކާށީގެ އަގު އުޅެނީ، 4ރ. އާއިން ފެށިގެން 10ރ. އާ ދެމެދު އެވެ. ކުރުނބާ ލިބެން ހުރީ 20ރ އާއި 30ރ. އާ ދެމެދުގެ އަގުތަކެއްގަ އެވެ. މީގެ އިތުރުން ރާނބާ ފަތް 5ރ. އަށް ލިބެން ހުރި އިރު ހިކަނދި ފަތް ބޮޑިއެއް ލިބެން ހުރީ 10ރ. އަށެވެ. ކިއުކަންބާ ކިލޯއެއް އުޅެނީ 45ރ. އަށެވެ. ކެރެޓް ކިލޯއެއް ލިބެން ހުރީ 40ރ. އަށެވެ.