ޖަލަށް ލާން ޖެހެނީ ޖަލު ހުރީތީ ކަމަށް ބުނާނީ މަޤާމަށް ކުފޫ ހަމަނުވާތީ: ނަޒީރު

ޖަލެއް ހުރީތީ ރައްޔިތުން ޖަލަށް ލާން ޖެހޭ ކަމަށް ދެކޭ މީހަކު ދިވެހި ދައުލަތުގެ އިސް މަޤާމެއްގައި ހުރިނަމަ، އެމީހަކު އެ ގޮންޖަހަނީ ދިވެހިރާއްޖޭގެ ޤާނޫނު އަސާސީއަށް ކަމަށް ގުޅިފައިވާ ޕާޓީތަކުން ބުނެފިއެވެ.

ގުޅިފައިވާ ޕާޓީތަކުން ހުކުރު ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން އަދާލަތު ޕާޓީގެ މީޑިއާ ކޮމިޓީގެ މުޤައްރިރު އަލީ ނަޒީރު ވިދާޅުވީ، ޖަލެއް ހުރީތީ މީހުން ޖަލަށް ލާން ނުޖެހޭ ކަމަށާއި، އެގޮތަށް އެކަން ކުރަން ޖެހޭ ކަމަށް ދެކޭ މީހަކު ދިވެހި ދައުލަތުގެ އިސް މަޤާމެއްގައި ހުރުމަށް ކުފޫ ހަމަނުވާ ކަމަށެވެ.

Advertisement

"ދިވެހިރާއްޖޭގެ ރަށެއްގަ، ދިވެހިރާއްޖޭގެ ޤާނޫނީ ސަރަޙައްދު ތެރޭގަ ޖަލެއް ހެދިފަ ހުރުމަކީ އަދި މީހަކު ޖަލަށް ލާންޖެހޭ ސަބަބެއް ނޫން. ޖަލަށް މީހަކު ލާ ބަންދު ކުރަންޖެހެނީ ޤާނޫނީ އިޖުރާޢަތްތަކެއް ފުރިހަމަވެގެން، ޤާނޫނީ ގޮތުން އެމީހެއްގެ މައްޗަށް ކުށެއް ސާބިތުވެގެން. އެނޫން ގޮތަކަށް މީހަކު ޖަލަށް ލުމަކީ އެއީކީ ކުރެވިގެންވާނެ ކަމެއް ނޫން. އެގޮތަށް ދެކޭ ފަރާތެއް ދިވެހިރާއްޖޭގެ ދައުލަތުގެ އިސް މަޤާމެއްގެ ހުރިކަމަށް ވެއްޖެއްޔާ އަޅުގަނޑުމެން މި ދެކެނީ އެއީ ޤާނޫނު އަސަސީއަށް ގޮންޖަހާ ފަރާތެއް ކަމުގަ. އެފަރާތެއް އެ މަޤާމުގަ ދެމިހުރުމަށް ކުފޫ ހަމަނުވާކަމަށް"، ނަޒީރު ވިދާޅުވިއެވެ.

ނަޒީރު މިފަދައިން ވިދާޅުވިއިރު، ދާދިފަހުން ރައީސުލްޖުމްހޫރިއްޔާ ޢަބްދުﷲ ޔާމީން ވަނީ މީހުން ޖަލަށް ލަނީ ޖަލު އިމާރާތް ކުރެވިފައި ހުރުމުން ކަމަށް ވިދާޅުވެ ޖަލުގައި ތިބި ފަރާތްތަކަށް ހަޖޫ ޖައްސަވާފައެވެ.

ނޫސްވެރިންގެ ބައްދަލުވުމުގައި އިތުރަށް ވާހަކަދައްކަވަމުން ނަޒީރު ވިދާޅުވީ ގުޅިފައިވާ ޕާޓީތަކުގެ މެދުގައި އޮތް ގުޅުން ހީނަރުވެފައިވާ ކަމަށް ބައެއް ފަރާތްތަކުން ވާހަކަ ދައްކަމުންދާ ކަމަށާއި، ނަމަވެސް އެކަން އޮތީ އެހެން ނޫން ކަމަށެވެ. އަދި ރިޔާސީ އިންތިޚާބަށް ތައްޔާރުވުމުގެ ގޮތުން ޕާޓީތަކުން ވަކިވަކިން ކުރަމުންދާ މަސައްކަތަކީ ޕާޓީތަކުން އެއް ކެނޑިޑޭޓް ނެރުމަށް ފަހިކުރުމަށް ކުރާ މަސައްކަތް ކަމަށްވެސް ނަޒީރު ވިދާޅުވިއެވެ.

މީގެ އިތުރުން ނަޒީރު ވަނީ ސިޔާސީ އެކިއެކި ބޭނުމަށް ހައްޔަރުކޮށްފައި ތިބި ފަރާތްތައް މިނިވަންކުރުމަށް ގޮވާލައްވާފައެވެ.