"އެހެންނުވާނެ.... ދޮގުނުހަދާ" ނުޒޭރު ހިނިގަނޑެއް ޖަހާލަމުން ބުންޏެވެ. "ތިހެންވިއްޔާ ތިކަންޖެހޭނެ ކުރެވޭތޯ އުޅެން. ފޯރިގަދަވާނެ،" ނުޒޭރްު، އަޔާން އަށް ބަލައިލަމުން ބުންޏެވެ.
"ތިހާ ހޮސްޕިޓަލުގައި އޮންނަހިއްވަންޏާ މަސައްކަތާއިގެން ކުރިޔަށް ދޭ،" އަޔާން ވެސް ހީލަމުން ބުންޏެވެ. އޭަރުވެސް ޝަޒީނާ އިސްތަށިގަނޑާއި ޔުނީފޯމް ހަމަޔަކަށް އެޅުވޭތޯ ބަލަމުން ދިޔައެވެ.
"ހީވަނީ ވިއްސާރަވާން އުޅޭހެން.... އަވަހަށް ގެޔަށްދާން ހިނގާ. ކާކު އަންނަން ދެކަށްތަ އާފިޔާ ތިހުންނަނީ؟ ގެޔަށް ދާން ހިނގާބަލަ... ވާރޭ ވެހެން ފަށައިފިއްޔާ އަވަހަކަށް ގެޔަކަށް ނުދެވޭނެ." ޝަޒީނާ ބުންޏެވެ.
"މަޑުކޮށްބަލަ. އަހަރެންނަށް ދެވޭނީ ރަޝީދު އައީމަ..." ރަކި ގޮތަކަށް ހީލަމުން އާފިޔާ ބުންޏެވެ. ޝަޒީނާ ހައިރާންވިއެވެ.
"ރަޝީދު އޭ.... އޭނަ ކީއްކުރަން؟" ޝަޒީނާ އާފިޔާ އަށް ބަލައިލިއެވެ. އަދި އުފާވެރިގޮތަކަށް ހީލިއެވެ.
"އަސްލުވެސްތަ؟ ކޮންއިރަކު؟" ޝަޒީނާ އަވަސްއަވަަހަށް ސުވާލުކުރިއެވެ. އެވަގުތު ވީ އުފަލުން ޔުނީފޯމް އާއި އިސްތަށިގަނޑުން އަތް ދޫކޮށްލެވުނެވެ. ޖެހުނު ވައިރޯޅިއާއި އެކީގައި ޔުނީޕޯމް ހިއްލުނެވެ. ޝަޒީނާ އަށް އަވަސްއަވަހަށް ޔުނީޕޯމް ތިރިކޮށް ހަމަޔަކަށް އެޅުވޭތޯ އުޅުނެވެ. ކުރިޔަށްވުރެންވެސް ވައިގަދަވެ ޝަޒީނާ އަށް ޔުނީފޯމު މައިތިރި ނުކުރެވޭވަރުވިއެވެ. ހުރިހާ ކުދިންގެ ލޯތައް ހުރީ ޝަޒީނާ އަށް އަމާޒުވެފައެވެ. ޝަޒީނާ ލަދުން ހަލާކުވާވަރު ވިއެވެ. ކުއްލިޔަށް އަޔާން ގޮސް ޝަޒީނާގެ ކުރިމައްޗަށްއަރާ ނިވާ ފަތްގަނަޑަކަށް ވިއެވެ. ޝަޒީނާ ހައިރާން ކަމާއި އެކީގައި އަޔާން އަށް ބަަލަމުން ދިޔައެވެ. ގެކައިރި ކުއްޖަކަށް ވާއިރުވެސް ދެމީހުންނަކީ ދެ ބީރައްޓެހިންނެވެ. ޝަޒީނާ ލަދުން އިސްޖަހައިލިއެވެ.
"މިތަނުން ދުރަށް ހިނގާ... ތިހުންނަނީ ވައިމަތީގައި. މިހާ ވައިގަދަ އިރެއްގައި ތިގޮތަށް ތިބޭކަށް ނުވާނެ،" އަޔާން، ޝަޒީނާ އަށް ބަަލައިލަމުން ބުންޏެވެ. އެވަގުތު ރަޝީދު އައިސް އެތަނަށް މަޑުކޮށްލިއެވެ. ޝަޒީނާ ރަޝީދުއަށް ބަަލައިލިއެވެ. ރަޝީދުވެސް ވާނުވާ ނޭގިފައި އަޔާން އަށް ބަަލއިލިއެވެ.
"ކަމެއްވީތަ؟" ރަޝީދު، އާފިޔާ ކުރެން ސުވާލުކޮށްލިއެވެ.
"ކަމެއްނުވޭ.... މިއީ ޝަޒީގެ ރައްޓެހި ކުއްޖެއް. ގޭކައިރި ކުއްޖެއް،" އަވަސްއަވަހަށް އާފިޔާ ބުންޏެވެ. ރަޝީދު އަޔާން އަށް ހީލިއެވެ. އަޔާންވެސް އާދައިގެ ގޮތަކަށް ރަޝީދު އަށް ހީލިއެވެ.
"ހިނގާދޯ ދަމާ... ސްކޫޕަށް ވަދެލާފަދޯ ދާނީ..،" ރަޝީދު އާފިޔާ އަށް ބުންޏެވެ. އާފިޔާ ޝަޒީނާ އަށް ބަލައިލިއެވެ. ޝަޒީނާ ބޮލުން ނޫނެކޭ ބުންޏެވެ. އާފިޔާ އާދޭހުގެ ގޮތަކަށް ޝަޒީނާ އަށް ލޮލުން އިޝާރާތް ކުރަމުން ދިޔައެވެ. ޝަޒީނާ އަޔާން އަށް ބަލައިލިއެވެ. އޭރުވެސް އަޔާން ހުރީ ޝަޒީނާ އަށް ކަޅިޖަހައިނުލާ ބަލާށެވެ.
"ނޫން ރަޝީދު މިރެއަކު ނޫން. ވަރަށް ބޮލުގައި ރިއްސާތީ މިއުޅެނީ. އަނެއްކާ ވައިމަތީގައި މިތާ ހުރީމައި ރޯގަވެސް ޖެހިއްޖެ. އަހަރެން ދާނީ ގެޔަށް." ޝަޒީނާ ރަޝީދު އަށް ބުންޏެވެ.
"ދެން އެކަމަކު ސްކޫޕަށޭ ދަނީ މާދުރެއްވެސް ނޫން...ހިނގާބަލަ..." ރަޝީދު އާދެހުގެ ރާގެއްގައި ބުންޏެވެ.
"ނޫން ރަޝީދު. މިހާރުވެސް ވަރަށް ލަސްވެއްޖެ. މާދަމާ ހެނދުނު ސްކޫލަށްވެސް ދާން އެބަޖެހޭ....ޕުލީޒް.... އާފިޔާ ގޮވައިގެން ދޭ. އެހެން ނޫނަސް މިރޭ ތިދެކުދިންނަށް އަހަރެން އުދަގޫ ކުރަކަން ނުވާނެ...." ހީލަން މަސައްކަތް ކުރަމުން ޝަޒީނާ ބުންޏެވެ.
"މީ.... ކޮންނަމެއްތަ ކިޔާނީ؟" އަޔާން އަށް އިނގިލި ދިއްކޮށްލަމުން ރަޝީދު އަހައިލިއެވެ. އެވަގުތު ނުޒޭރުވެސް އައިސް އެމީހުން ކައިރިޔަށް މަޑުކޮށްލިއެވެ.
" އަޔާން... އިބްރާހީމް އަޔާން ދީދި،" ހީގަންނަމުން ނުޒޭރު ބުންޏެވެ. ޝަޒީނާ ނުޒޭރަށް ބަަލައިލިއެވެ. ނުޒޭރު، ޝަޒީނާ އަށް ހީލިއެވެ.
"ތަނަކަށް ދާން ރާވަނީތަ؟ އަހަރެން ނުލާ" އަޔާންގެ ކޮނޑުގައި ޖަހާލަމުން ނުޒޭރު އަހައިލިއެވެ. އަޔާން އެއްވެސް ޖަވަބެއް ނުދީ ޝަޒީނާ އަށް ބުންޏެވެ.
ނުނިމޭ