ސިއްހީ ހާލުކޮޅު ހުރި ގޮތުން ކްރިމިނަލް ކޯޓްގައި މިއަދަށް ތާވަލުކޮށްފައި އޮތް ކުރީގެ ރައީސް މައުމޫނު އަބްދުލް ގައްޔޫމްގެ ޝަރީއަތް ކެންސަލް ކުރަން އެ މަނިކުފާނުގެ ގާނޫނީ ވަކީލުން ކޯޓަށް ހުށަހަޅުއްވައިފި އެވެ.
ރައީސް މައުމޫނުގެ ގާނޫނީ ވަކީލުންގެ ޓީމްގައި ހިމެނިވަޑަގަންނަވާ ވަކީލް މައުމޫނު ހަމީދު ވިދާޅުވީ، ރައީސް މައުމޫނުގެ ސިއްޙީ ހާލުކޮޅު ވޭތުވެ މިދިޔަ 10 ވަރަކަށް ދުވަހުގެ ތެރޭގައި ތިން ފަހަރެއްގެ މަތީން ވަރަށް ބޮޑަށް ގޯސްވެފައިވާ ކަމަށެވެ. އަދުލު އިންސާފު ގާއިމު ކުރުމަށް ހުރަސް އެޅުމުގެ ދައުވާގެ ރައީސް މައުމޫންގެ މައްޗަށް އުފުލާފައިވާއިރު، އެ މައްސަލައިގެ ޝަރީއަތް ބޭއްވުމަށް އެންމެ ފަހުން ތާވަލްކުރި ދެ އަޑުއެހުން ވެސް ވަނީ ކެންސަލްކޮށްފަ އެވެ..
"އިއްޔެ މެންދުރު ފަހު ރައީސް މައުމޫނުގެ ހާލުކޮޅު އިތުރަށް ގޯސްވި. އެސަބަބާއި ހުރެ މިއަދު ހެނދުނު ވާނީ އެމަނިކުފާނުގެ ޝަރީއަތް ކެންސަލް ކުރުމަށް އެދިފައި" މައުމޫނު ހަމީދު ވިދާޅުވިއެވެ.
ރައީސް މައުމީނުގެ ހާލުކޮޅު ގޯސްވަމުން އަންނާތީ މިދިޔަ ހުކުރު ދުވަހު ވަނީ މާލެގެންނަވާ އޭޑީކޭ ހޮސްޕިޓަލުން ފަރުވާ ދެއްވާފައެވެ.
Pres. @maumoonagayoom having yesterday afternoon suffered a 3rd serious incident in 10 days, we have this morning requested the Criminal Court to postpone this afternoon's hearing, taking into consideration Raees Maumoon's worsening health condition.
— Maumoon Hameed (@maanhameed) May 13, 2018
ރައީސް މައުމޫންގެ ހާލުކޮޅު ސީރިއަސްވެފައިވަނީ އެމަނިކުފާނަށް ދިމާވެފައިވާ ސިއްހީ މައްސަލައެއް ކަމަށްވާ 'ބިނައިން ޕެރޮކްސިސްމަލް ޕޮޒިޝަނަލް ވަރޓިގޯ' (ބީ.ޕީ.ޕީ.ވީ) ގެ ސަބަބުންނެވެ. މިބައްޔަށް މިދިޔަ ޑިސެމްބަރު މަހުވެސް ރައީސް މައުމޫނަށް ފަރުވާދެއްވާފައިވާ ކަމަށް އައިޖީއެމްއެޗް ގެ އީއެންޓީ ސްޕެޝަލިސްޓެއް ވިދާޅުވެ، ދެއްވާފައިވާ ލިޔުމެއް އާއިލާއިން ވަނީ ކަމާބެހޭ ފަރާތްތަކަށް ހުށަހަޅައިފަ އެވެ.
ޑޮކްޓަރު ވިދާޅުވީ ބަލީގެ ސަބަބުން ރައީސް މައުމޫން ވަރަށް ބޮޑަށް އަނބުރައިގަންނަ ކަމަށާއި، ކުއްލިއަކަށް ބިން މައްޗަށް ވެއްޓިވަޑައިގަތުމުގެ ފުރުސަތު އެބަ އޮތްކަމަށެވެ. އަދި ބަލީގެ އުނދަގޫތައް ރައީސް މައުމޫނަށް ކުރިމަތިވާ މިންވަރުގެ ސަބަބުން އެމަނިކުފާނުގެ އަރިހުގައި އަބަދުވެސް މީހަކު ހުންނަން ޖެހޭނެ ކަމަށް ޑޮކްޓަރު ލަފާދެއްވައެވެ.