އިލެކްޝަންސް ކޮމިޝަން (އީސީ)ގައި މިހާރު ތިއްބެވި މެމްބަރުންނާއެކު އަދުލުވެރި އިންތިޚާބެއް ނުބޭއްވޭނެ ކަމަށާއި ނަމަވެސް، ރައްޔިތުން ދޭ ވޯޓުގެ ނަތީޖާ އެ ކޮމިޝަނަށް އޮޅުވައި ނުލެވޭނެކަމަށް ރައްޔިތުންގެ މަޖިލީހުގެ ގަމު ދާއިރާގެ މެމްބަރު ފައްޔާޒު އިސްމާއިލް ވިދާޅުވެއްޖެއެވެ.
ހއ. އަތޮޅުގައި ރައީސް މުހައްމަދު ނަޝީދުގެ ރިޔާސީ ޕްރައިމަރީގެ ކެމްޕެއިން އިފްތިތާހު ކުރުމަށް ހއ. ދިއްދޫގައި ހޮނިހިރު ދުވަހުގެ ރޭ ބޭއްވި ޖަލްސާގައި ވާހަަކަފުޅު ދައްކަވަމުން ފައްޔާޒު ވިދާޅުވީ، އަންނަ ރިޔަސީ އިންތިޚާބުގެ ނަތީޖާ އޮޅުވާލަން ބަޔަކު މަސައްކަތް ކުރާނެ ކަމަށެވެ. ނަމަވެސް އިންތިޚާބުގެ ނަތީޖާ ބަދަލު ކުރެވޭނެ އެއްވެސް ގޮތެއް ނޯންނާނެ ކަމަށެވެ. އެހެންކަމުން އެކަމާމެދު ޝައްކު ނުކުރުމަށް ފައްޔާޒު އެދިވަޑައިގެންނެވިއެވެ.
"އިލެކްޝަނަކަށް އޮޅުވައެއް ވެސް ނުލެވޭނެ. އޮޅުވާލަން މަސައްކަތް ވެސް ކުރާނެ. އަދުލުވެރި އިލެކްޝަނެއް ނުވެސް އޮންނާނެ. އިންސާފުވެރިއެއް ވެސް ނުވާނެ. އެހެންނަމަވެސް ވޯޓު އޮޅުވާލައިގެނެއް ރައްޔިތުންލާ ނަތީޖާ ބަދަލު ކުރެވޭނެ އެއްވެސް ގޮތެއް ނޯންނާނެ. އެކަމާމެދު ކުޑަކޮށްވެސް ތިބޭފުޅުން ޝައްކު ނުކުރައްވާތި،" ފައްޔާޒު ވިދާޅުވިއެވެ.
އޭނާ ވިދާޅުވީ ރައީސް ނަޝީދުގެ ނަންފުޅު ވޯޓު ކަރުދާހުގައި އޮވެދާނެ ކަމާމެދު އޭނާ ޝައްކު ނުކުރައްވާ ކަމަށާއި ނަމަވެސް ރައީސް ޔާމީންގެ ނަންފުޅު ވޯޓު ކަރުދާހުގައި އޮވެދާނެ ކަމާއިމެދު ޝައްކު ކުރާ ކަމާށެވެ. ރައީސް ޔާމީންގެ ބަދަލުގައި ވޯޓު ކަރުދާހުގައި އޮންނާނީ "މަހާ ރެހެނދިއެއްގެ ނަން ބާއޭ" ވިދާޅުވެ، ފައްޔާޒު ސުވާލު އުފެއްދެވިއެވެ.
"އަޅުގަނޑު ދަންނަވާނީ އަޅުގަނޑަށް ޝައްކުވަނީ ޔާމީނުގެ ނަންބާއޭ އޮންނާނީ ނުނީ އެ ވިދާޅުވާ މަހާ ރެހެނދިއެއްގެ ނަންބާއޭ އޮންނާނީ، ތިޔަ ވިދާޅުވާ ކަރުދާސް ކޮޅުގައި. އަޅުގަނޑު ޝައްކެއް ނުކުރަން ރައީސް ނަޝީދުގެ ނަން އޮންނާނެކަމަކާ މެދުގައި. އެކަމަކު އަޅުގަނޑަށް ވަރަށް ޝައްކު ބޮޑުވޭ ޔާމީނުގެ ނަން އޮންނާނެ ކަމާމެދުގައި،" ފައްޔާޒު ވިދާޅުވިއެވެ.
އިންތިހާބެއް ނުބާއްވައި ރައީސް ޔާމީނަށް ވެރިކަމުގައި ހުރެވިދާނެ ކަމަށާއި ނަމަވެސް އެގޮތަށްވެސް ހުންނެވޭނީ މަދު ދުވަސްކޮޅެއްގައި ކަމަށް ފައްޔާޒު ވިދާޅުވިއެވެ.
މި މަހު 30ގައި ބާއްވާ އެމްޑީޕީގެ ޕްރައިމަރީއަށް އިޝާރާތް ކުރައްވައި، ފައްޔާޒު އެދިވަޑައިގެންނެވީ އެމްޑީޕީގެ އާންމު މެމްބަރުން ނުކުމެ، ޕްރައިމަރީގައި "ބޯކޮށް" ވޯޓު ދެއްވުމަށެވެ. އާންމު މެމްބަރުން ތިބި ގޮތް މުޅި ދުނިޔެއަށް ދައްކައިދިނުމަށް ފައްޔާޒު ވަނީ އެދިވަޑައިގެންނެވިއެވެ.
"އެމްޑީޕީގެ މެމްބަރުން ތިބި ގޮތް މުޅި ދުނިޔެއަށާއި ދިވެހިރާއްޖޭގެ ހުރިހާ މުއައްސަސާތަކަކަށާއި ދިވެހިރާއްޖޭގެ އެންމެހާ ރައްޔިތުންނަށް ދެއްކުން. ރައީސް ނަޝީދު ވިދާޅުވި ގޮތަށް މި ފެށި މަސައްކަތަށް ވާސިލު ވުމަށްޓަކާ މި މަސައްކަތް ކުރަން އެބަޖެހޭ. މި މަސައްކަތް ކުރުމަކުން އަޅުގަނޑުމެންނަށް އެއްގޮތަކަށް ވެސް ނުފެނޭ އެއާ އިދިކޮޅު ހެދޭނެ އެއްވެސް އިންސާނެއް ދިވެހިރާއްޖޭގެ ހުރިހެން،" ފައްޔާޒު ވިދާޅުވިއެވެ.
