އެމްޑީޕީ ރިޔާސީ ޕްރައިމަރީގެ ކެމްޕެއިންނަށް ތާއިދު ހޯއްދެވުމުގެ ގޮތުން، ރާއްޖޭގެ 13 ރަށެއްގެ ރައްޔިތުންނާ ވީޑިއޯ ކޯލު މެދުވެރިކޮށް ރައީސް މުހައްމަދު ނަޝީދު ބައްދަލު ކުރައްވައިފި އެވެ.

ރައީސް ނަޝީދުގެ ކެމްޕެއިން ޓީމުން "ރާއްޖެއެމްވީ" އަށް ބުނީ ސްކައިޕް މެދުވެރިކޮށް، ރާއްޖޭގެ ރަށްތަކަށް އެމަނިކުފާނު ގުޅުއްވައި ރައްޔިތުންގެ ހިޔާލު ހޯއްދަވައި، ރައްޔިތުން ކުރައްވާ ސުވާލުތަކަށް ޖަވާބު ދެއްވާފައިވާ ކަމަށެވެ. އެމަނިކުފާނު ގުޅުއްވަމުން ގެންދަވަނީ ރާއްޖޭގެ ވަކި ސަރަހައްދެއް ބެއްލެވުމަށް ނެތި އެކި ރަށްތަކަށް ކަމަށާއި ކުރިއަށް ހުރި ދުވަސްތަކުގައި ވެސް އިތުރު ރަށްތަކަށް ގުޅުއްވާނެ ކަމަށް އެމަނިކުފާނުގެ ކެމްޕެއިން ޓީމުން ބުންޏެވެ.

ޕްރައިމަރީގެ ކެމްޕެއިނަށް ތައްޔާރުވުމުގެ ގޮތުން ރައީސް ނަޝީދު ވީޑިއޯ ކޮންފަރެންސް މެދުވެރިކޮށް ގުޅުއްވި އެންމެ ފުރަތަމަ ބައްދަލު ކުރެއްވީ މާލޭގައި ތިއްބެވި އެމަނިކުފާނުގެ ސަޕޯޓަރުންނާއެވެ. އެއަށްފަހު ސްކައިޕް މެދުވެރިކޮށް ގުޅުއްވައި، މިދިޔަ ހޮނިހިރު ދުވަހުގެ ނިޔަލަށް ރައީސް ނަޝީދު ބައްދަލު ކުރެއްވި ރަށްތަކަކީ ހއ. ކެލާ ހއ. ފިއްލަދޫ ހއ. ބާރަށާއި ހއ. ތަކަދޫ ހއ. އިހަވަންދޫ އާއި އާއި އައްޑޫ ސިޓީ މަރަދޫ އާއި ފޭދޫ އާއި މަރަދޫފޭދޫ އާއި ހުޅުމީދޫ އާއި ރ. ދުވާފަރުގެ އިތުރުން ހދ. ކުޅުދުއްފުށްޓަށާއި ޏ. ފުވައްމުލަކެވެ.

ރައީސް ނަޝީދުގެ ކެމްޕެއިން ޓީމުން ބުނީ ވީޑިއޯ ކޮންފަރެންސް މެދުވެރިކޮށް، ރާއްޖޭގެ ރަށްތަކުގެ ރައްޔިތުންނާ ބައްދަލު ކުރެއްވުމުގެ މަސައްކަތް އެމަނިކުފާނު ފެއްޓެވީ މިދިޔަ ބުރާސްފަތި ދުވަހުން ފެށިގެން ކަމަށެވެ.

ރައީސް ނަޝީދުގެ ކެމްޕެއިން ލޯންޗުކޮށްފައި ވަނީ އައްޑޫ ސިޓީ ހިތަދޫގައި ހުކުރު ދުވަހުގެ ރޭ ބޭއްވި ޖަލްސާއިންނެވެ. އެއަށްފަހު ހއ. އަތޮޅުގައި އެ ކެމްޕެއިން ރަސްމީކޮށް ލޯންޗުކޮށްފައި ވަނީ ހޮނިހިރު ދުވަހުގެ ރޭ ހއ. ދިއްދޫގައެވެ.

އެމްޑީޕީގެ ރިޔާސީ ޕްރައިމަރީ ބާއްވަން ނިންމާފައި ވަނީ މި މަހުގެ 30 ވަނަ ދުވަހުއެވެ. ރާއްޖޭގައި މީހުން ދިރިއުޅޭ ހުރިހާ ރަށެއްގައި ވޯޓު ފޮށި ބަހައްޓަން އެމްޑީޕީން ވަނީ ނިންމާފައެވެ. އަދި ކޮލަންބޯ އާއި ކެންޑީ އާއި ޓްރިވެންޑްރަމާއި ބެންގަލޫރާއި މެލޭޝިއާ އާއި ލަންޑަނުގައި ވެސް ވޯޓު ފޮށި ބެހެއްޓުމަށް އެމްޑީޕީން ވަނީ ނިންމާފައެވެ.