އިންޑިއާގެ ކަނޑުގެ ސިފައިންގެ މަނަވަރެއް ރާއްޖޭގައި
މިމަހުގެ 11 ވަނަ ދުވަހުން ފެށިގެން 12 އާއި ހަމައަށް ތަމްރީނުތައް ކުރިއަށް ގެންދިއުމަށް ހަމަޖެހިފައިވޭ
އައިއެންއެސް
އިންޑިއާ ކަނޑުގެ ސިފައިންގެ މަނަވަރެއް ހުކުރު ދުވަހު ރާއްޖެ އަތުވެއްޖެއެވެ.
އައިއެންއެސް "ސުމޭދާ" ކިޔާ މި މަނަވަރު ރާއްޖެ އައިސްފައިވަނީ ދެ ގައުމު ގުޅިގެން ބާއްވާ ތަމްރީންތަކެއްގައި ބައިވެރިވުމަށާއި ރާއްޖޭގެ ކަނޑުގެ ސަރަހައްދު ބެލުމަށް ކަމަށް އިންޑިއާއިން ބުނެއެވެ. އެގޮތުން މިމަހުގެ 11 ވަނަ ދުވަހުން ފެށިގެން 12 އާއި ހަމައަށް ތަމްރީނުތައް ކުރިއަށް ގެންދިއުމަށް ފަހު 12 ވަނަ ދުވަހުން ފެށިގެން 15 ވަނަ ދުވަހާއި ޖެހެންދެން ރާއްޖޭގެ ކަނޑުގެ އިގްތިސާދީ ސަރަހައްދު ބެލުމުގެ މަސައްކަތް ކުރާނެއެވެ.
އިންޑިއާގެ "ހިންދުސްތާން ޓައިމްސް" ގައި ބުނެފައިވާ ގޮތުގައި އިންޑިއާ ކަނޑުގެ ސިފައިންގެ ދެ އޮފިސަރަކާއި 12 ސިފައިން މިހާރު ވެސް މާފިލާފުށީގައި ޓްރޭނިންއެއް ހަދަމުން އެބަ ގެންދެއެވެ. އެ ޓްރޭނިންއަކީ ޑައިވް ކުރަން ދަސް ކުރުމަށް "އެކަތަ" ނަމުގައި ބާއްވަމުންދާ ޓްރޭނިންއެކެވެ.
އިންޑިއާ ކަނޑުގެ ސިފައިންގެ މަނަވަރެއް ހުކުރު ދުވަހު ރާއްޖެ އައިސްފައި މި ވަނީ، އިންޑިއާއާއި ރާއްޖެއާއި ދެމެދު އޮތް ގުޅުން ހީނަރުވެ އިންޑިއާއިން ދީފައިވާ ދެ ހެލިކޮޕްޓަރުގެ ތެރެއިން އެއް ހެލިކޮޕްޓަރު އަނބުރާ ގެންދިއުމަށް ރާއްޖެއިން ގޮވަލާފައި ވަނިކޮށެވެ.
