ފަނޑިޔާރު އަލީ ހަމީދު ހޮސްޕިޓަލުން ދޫކޮށްލައިފި
އަލީ ހަމީދު ހޮސްޕިޓަލަށް ގެންގޮސްފައިވަނީ ނޭވާ ހާސްވުމުގެ ސަބަބުން
ސުޕްރީމް ކޯޓުގެ ފަނޑިޔާރު އަލީ ހަމީދު
އައިޖީއެމްއެޗްގައި ފަރުވާ ދިނުމަށް ފަހު ސުޕްރީމް ކޯޓުގެ ފަނޑިޔާރު އަލީ ހަމީދު ހޮސްޕިޓަލުން ދޫކޮށްލައިފި އެވެ. އެނގިފައިވާ ގޮތުގައި ފަނޑިޔާރު އަލީ ހަމީދު އައިޖީއެމްއެޗްގައި ފަރުވާ ދިނުމަށް ފަހު ދޫކޮށްލާފައިވަނީ ބުރާސްފަތި ދުވަހުގެ ހެނދުނު އެވެ. ނަމަވެސް އަލީ ހަމީދު ހޮސްޕިޓަލުން ދޫކޮށްލާފައިވޭތޯއާއި ޖަލަށް ބަދަލުކޮށްފައިވޭތޯ ބެލުމަށް ގުޅުމުން މޯލްޑިވްސް ކަރެކްޝަނަލް ސާރވިސްގެ ބަހެއް ލިބޭގޮތް ވަނީ ނުވެފަ އެވެ.
ރަސްމީ ހައިސިއްޔަތަކުން ކުރަން ޖެހޭ ކަމަކަށް ނުފޫޒު ފޯރުވި ކަމަށް ތުހުމަތުކޮށް ދައުލަތުން ހުށަހަޅާފައިވާ ދައުވާއާއި ގުޅިގެން އުއްތަމަ ފަނޑިޔާރު އަބްދުﷲ ސައީދާއި ސުޕްރީމް ކޯޓުގެ ފަނޑިޔާރު އަލީ ހަމީދަށް ހުކުމް އިއްވުމަށް ބާއްވާ ޝަރީއަތުގެ މަޖިލީހުގައި އިންނަވަނިކޮށް، އަލީ ހަމީދުގެ ހާލުކޮޅު ގޯސްވެ، ހޮސްޕިޓަލަށް ގެންގޮސްފައިވަނީ ބުދަ ދުވަހު އެވެ.
އަލީ ހަމީދުގެ ހާލުކޮޅު ގޯސްވެ، ހޮސްޕިޓަލަށް ގެންގޮސް އެޑްމިޓްކުރެވިފައިވާކަން އޭނާގެ ގާނޫނީ ވަކީލުން ވަނީ ބުދަ ދުވަހު ކަށަވަރު ކޮށްދެއްވާފަ އެވެ. އަލީ ހަމީދު ހޮސްޕިޓަލަށް ގެންގޮސްފައިވަނީ ނޭވާ ހާސްވުމުގެ ސަބަބުންކަމަށް ވަކީލުން ވިދާޅުވެ އެވެ.
ދެ ފަނޑިޔާރުންގެ މައްޗަށް ހުކުމް އިއްވުމަށް ބާއްވާ ޝަރީއަތް ބުދަ ދުވަހު ފުރަތަމަ ތާވަލް ކުރީ ހަވީރު 16:00 އަށެވެ. ނަމަވެސް ހުކުމް އިއްވުމަށް ބާއްވާ ޝަރީއަތް ބުދަ ދުވަހުގެ ރޭ 19:00 އަށް ފަސްކުރުމަށް ފަހު، އަނެއްކާވެސް އެ ޝަރީއަތް 20:00 އަށް ފަސްކުރި އެވެ. އަދި ހުކުމް އިއްވުމަށް ބާއްވާ އެ ޝަރީއަތް 21:30 އަށް ފަސްކުރުމަށް ފަހު އެންމެފަހުން ވަނީ ކެންސަލް ކޮށްފަ އެވެ.
ކޯޓުން ބުނީ މިމައްސަލާގައި ހުކުމް ކުރުމަށް ބާއްވާ ޝަރީއަތް ކުރިއަށް ގެންދާނީ ހުޅުވާލެވިގެން ކަމަށެވެ. ނަމަވެސް މި މައްސަލާގައި މިހާތަނަށް ބޭއްވި ހުރިހާ އަޑުއެހުމެއް ބާއްވާފައި ވަނީ ސިއްރު ކޮށްގެންނެވެ.
އެނގިފައިވާ ގޮތުގައި ރަސްމީ ހައިސިއްޔަތަކުން ކުރަން ޖެހޭ ކަމަކަށް ނުފޫޒު ފޯރުވި ކަމަށް ތުހުމަތުކޮށް ދައުލަތުން ހުށަހަޅާފައިވާ ދައުވާއާއި ގުޅިގެން އުއްތަމަ ފަނޑިޔާރު އަބްދުﷲ ސައީދާއި ސުޕްރީމް ކޯޓުގެ ފަނޑިޔާރު އަލީ ހަމީދަށް ހުކުމް އިއްވުމަށް ބާއްވާ މި ޝަރީއަތުގެ މަޖިލިސް ބުރާސްފަތި ދުވަހު ބޭއްވުމަށް ދަނީ މަސައްކަތް ކުރަމުންނެވެ.
