ގޮނޑީގެ މައްސަލާގައި ސުޕްރީމް ކޯޓުން ސާފު ނިޔާއެއް ކަނޑައަޅައި ނިމެންދެން، ވަގުތީ ހައްލެއްގެ ގޮތުގައި ރައްޔިތުންގެ މަޖިލީހުގެ 12 މެމްބަރަކު މަޖިލީހަށް ވަޑައިނުގެންނެވޭ ގޮތަށް ނެރުނު ވަގުތީ އަމުރަށް ފަހު، ދާއިމީ ހައްލެއް ނުލިބި ތިން މަހަށް ވުރެ ގިނަ ދުވަސް ވެއްޖެ އެވެ.

ގުޅިފައިވާ ޕާޓީތަކުގެ 12 މެމްބަރަކު މަޖިލީހަށް ވަޑައިގަތުން މަޑުޖައްސާލުމަށް ސުޕްރީމް ކޯޓުން ވަގުތީ އަމުރެއް ނެރުނީ، އެކެއް ފެބްރުއަރީގެ އަމުރުގައި ހިމެނޭ ތިން ބައެއް ބާތިލު ކުރުމަށް ބަންޑާރަ ނައިބުގެ އޮފީހުން ސުޕްރީމް ކޯޓަށް ހުށަހެޅުމުންނެވެ. މެމްބަރުންނަށް ޖަލްސާތަކުގައި ބައިވެރިނުވެވޭ ގޮތަށް ސުޕްރީމް ކޯޓުން ވަގުތީ އަމުރު ނެރުނީ މިއަހަރުގެ ފެބްރުއަރީ 18 ވަނަ ދުވަހު އެވެ. އެ އަމުރު ނެރުނުތާ މިއަދަށް 80 ދުވަސް ވަނީ ފާއިތުވެގެން ގޮސްފައެވެ.

ވަގުތީ އަމުރު ދެމި އޮންނާނީ ބަންޑާރަ ނައިބުގެ އޮފީހުން ސުޕްރީމް ކޯޓަށް ހުށަހެޅި މައްސަލާގައި ޝަރުއީ އުސޫލުތަކުގެ މައްޗަށާއި ބާވަތަށް ބަލައި އެ ކޯޓުން ވަކި ގޮތެއް ނިންމަންދެން ކަމަށް އެ ކޯޓުން ނެރުނު އަމުރުގައި ބުނެފައިވެއެވެ. ގޮނޑީގެ މައްސަލާގައި ސުޕްރީމް ކޯޓުން ބޭއްވީ އެންމެ އަޑުއެހުމެކެވެ. އެ އަޑުއެހުން ބޭއްވީ މާޗް މަހުގެ 27 ވަނަ ދުވަހުއެވެ. ސުޕްރީމް ކޯޓުގައި މިވަގުތު ތިއްބެވި ތިން ފަނޑިޔާރުން ބައްލަވާ އެ މައްސަލާގައި އެންމެ ފަހުން ބޭއްވި އަޑުއެހުމުގައި ބުނެފައި ވަނީ ދެން އެ މައްސަލާގައި އިތުރު ކަމެއް ސާފު ކުރަން ނެތްނަމަ، އޮންނާނީ ހުކުމް ކުރުން ކަމަށެވެ.

ރައްޔިތުންގެ މަޖިލީހުގެ 12 މެމްބަރެއްގެ ގޮނޑީގެ ސައްހަކަމާމެދު ސުވާލު އުފައްދައި، މަޖިލީހުގެ ސެކިއުރިޓީ ބަލަހައްޓާ ސިފައިން މެދުވެރިކޮށް، އެ މެމްބަރުން މަޖިލީހުގެ ޖަލްސާތަކުގައި ބައިވެރިކުރުން ހުއްޓުވާފައި ވާތާ އަހަރެއްހާ ދުވަސްވަނީ ވެފައެވެ. ބާރަ މެމްބަރުން ބައިވެރިނުކޮށް، މިދިޔަ އަހަރުގެ ބަޖެޓާއި ބިލްތަކާއި މިނިވަން މުއައްސަސާތަކުން މަޖިލީހަށް ވަނީ ބޭފުޅުން އައްޔަން ކޮށްފައެވެ. އެ މެމްބަރުން މަޖިލީހުގައި ތަމްސީލު ކުރުން ހުއްޓުވުމަކީ އެ މެމްބަރުން ތަމްސީލު ކުރާ 60،000 ރައްޔިތުންގެ ހައްގު ނިގުޅައިގަތުން ކަމަށް ގުޅިފައިވާ ޕާޓީތަކުން ދަނީ ބުނަމުންނެވެ.

މިދިޔަ އަހަރުގެ ޖުލައި މަހުގެ 13 ވަނަ ދުވަހުން ފެށިގެން، ޕާޓީ ބަދަލު ކުރި މެމްބަރުންނާއި ޕާޓީން ވަކިކުރި ރައްޔިތުންގެ މަޖިލީހުގެ މެމްބަރުން ގޮނޑި ގެއްލިފައިވާ ކަމަށް ކަނޑައަޅާފައިވާ އެންޓި ޑިފެކްޝަންގެ ބިލު ބާތިލު ކުރެވެން ނެތް ކަމަށް ސުޕްރީމް ކޯޓުން ކަނޑައެޅުމާއެކު، 12 މެމްބަރުންގެ ބައި އިލެކްޝަން ބާއްވަން އިލެކްޝަންސް ކޮމިޝަނުން ވަނީ އަމާޒު ހިފާފައެވެ. ބައި އިލެކްޝަންތައް ބޭއްވުމަށް އިލެކްޝަނުން ވަނީ ފިނޭންސްގައި އެދިފައެވެ.

12 މެމްބަރެއްގެ ގޮނޑި ގެއްލިފައިވާ ކަމަށް އިލެކްޝަންސް ކޮމިޝަނުން ބުނާތީ، އެ މެމްބަރުން ވަނީ ވަކިވަކި މައްސަލަތަކެއްގެ ގޮތުގައި ސުޕްރީމް ކޯޓަށް މައްސަލަތަކެއް ވެސް ހުށަހަޅާފައެވެ. އެ މައްސަލަތަކުގެ ތެރެއިން ބައެއް މައްސަލަތައް ސުޕްރީމް ކޯޓުން ބަލައިގެންފައިވާއިރު، އަޑުއެހުންތައް ފަށާފައެއް ނުވެއެވެ.