ދައުލަތުގެ މަސައްކަތް ހުރަސް އެޅުމުގެ ދައުވާ ސާބިތުވާ ކަމަށް ކަނޑައަޅައި، ކްރިމިނަލް ކޯޓުން ހުކުމް ކުރުމުން، ޝަހީދެއްގެ ދަރަޖަ ލިބިވަޑައިގެންފައިވާ ކަމަށް އުއްތަމަފަނޑިޔާރު އަބްދުﷲ ސައީދު ވިދާޅުވެއްޖެއެވެ.

އުއްތަމަފަނޑިޔާރު އެހެން ވިދާޅުވީ ހަތަރު މަހާއި 24 ދުވަހަށް ޖަލަށް ލުމަށް އެމަނިކުފާނުގެ މައްޗަށް ހުކުމް އިއްވުމަށް ފަހު، ގާޒީ ކޯޓު ރޫމުން ނުކުމެވަޑައިގެންނެވި ވަގުތުއެވެ. ގާޒީ ކޯޓު ރޫމް ދޫކުރައްވައި ވަޑައިގެންނެވި ވަގުތު، ގާޒީއަށް އަޑު އިވޭވަރަށް އުއްތަމަ ފަނޑިޔާރު ވިދާޅުވީ ގިޔާމަތް ދުވަސް އަދި އެބަ އޮތް ކަމަށެވެ.

އެއަށްފަހު އަޑުއަހަން ކޯޓަށް ވަދެ ތިބި މީހުންނާ ދިމާލަށް ބަލަހައްޓަވައިގެން ހުންނަވައި މޭގައި އަތްޖައްސަވައި އުއްތަމަފަނޑިޔާރު ވިދާޅުވީ "ޝަހީދެއްގެ ދަރަޖަ ލިބުނީ" ކަމަށާއި އެކަމަކު އަދި މަރެއް ނުވާ ކަމަށެވެ. އެއަށްފަހު އުއްތަމަފަނޑިޔާރު ގޮނޑީގައި އިށީންދެވަޑައިގެންނެވި އެވެ. ކަރެކްޝަނަލް ސާވިސްގެ އޮފިސަރާއި ކޯޓު އޮފިސަރު އެދިވަޑައިގެންނެވުމުން ގޮނޑިން ތެދުވެވަޑައިގެން، ކޯޓު ރޫމުން ނުކުމެވަޑައިގެންނެވީ ހިނިތުންވެ ހުންވައި ހަނާ އަޅުއްވަމުންނެވެ.

އުއްތަމަފަނޑިޔާރު ކޯޓުން ނުކުމެވަޑައިގެންނެވިއިރު، އަޑުއަހަން ވަދެ ތިބި މީހުންގެ ސަމާލުކަން ހުއްޓިފައި ވަނީ އެމަނިކުފާނުގެ ހަރަކާތްތަކަށެވެ. ހިމޭންވެފައި އޮތް، ޝަރީއަތުގެ މާލަމުން އެމަނިކުފާނު ނުކުމެވަޑައިގެންނެވުމުގެ ކުރިން ނުތަނަވަސްވެވަޑައިގެން ޓައިގެ ގޮށް ވެސް ބާރުކުރެއްވިއެވެ. ނަމަވެސް ކޯޓު ރޫމުން ނުކުމެވަޑައިގެންނެވީ އުފާވެރިކަމުގެ މޫނެއް ދައްކަމުންނެވެ.

އުއްތަމަފަނޑިޔާރު ކޯޓުން ރޫމުން ނުކުމެވަޑައިގެންނެވިއިރު، އެމަނިކުފާނުގެ ވަކީލުން ތިއްބެވީ، އެމަނިކުފާނަށް އިހްތިރާމު ކުރެއްވުމުގެ ގޮތުން ކޮޅަށް ތެދުވެވަޑައިގެންނެވެ. ނަމަވެސް އަޑުއަހަން ތިބި މީހުން ތިބީ އިށީންދެގެންނެވެ. އުއްތަމަފަނޑިޔާރު ކޯޓަށް ވަޑައިގަންނަވާ ވަގުތުތާއި ނުކުންނަވާ ވަގުތު ކްރިމިނަލް ކޯޓަށް އަޑުއަހަން ވަންނަ މީހުންނާއި ނޫސްވެރިން ކޮޅަށް ތެދުވާތީ، ކޯޓު އޮފިސަރުން ވަނީ އެގޮތަށް ތެދުވެ ނުހެދުމަށް އެދިފައެވެ. މީގެ ކުރިން ބޭއްވި ޝަރީއަތްތަކުގައި ތަކުރާރުކޮށް ކޯޓު އޮފިސަރުން ވަނީ އެކަން އަންގާފައެވެ.

އުއްތަމަފަނޑިޔާރާ ދެކޮޅަށް ވަކާލަތު ކުރެއްވި ޕްރޮސެކިއުޓާ ޖެނަރަލް (ޕީޖީ)ގެ އޮފީހުގެ އަންހެން ދެ ވަކީލުން ވަނީ އުއްތަމަފަނޑިޔާރު ކޯޓު ރޫމުން ނުކުމެވަޑައި ގެންނެވުމުގެ ކުރިން، ކޯޓު ރޫމުން ދޫކުރައްވައި ވަޑައިގެންފައެވެ.

އުއްތަމަފަނޑީޔާރު ޖަލަށްލުމަށް ހުކުމް ކުރީ ގަވަމެންޓް އީލެޓާ މެނޭޖުމަންޓް ސިސްޓަމް (ޖެމްސް)ގެ ހިދުމަތް މެދުކަނޑާލަން ސުޕްރީމް ކޯޓުގެ މުވައްޒަފުންނަށް އެންގެވި ކަމަށް ބުނެ އުފުލި ދައުވާއާ ގުޅިގެންނެވެ. އެ ދައުވާ އެމަނިކުފާނުގެ މައްޗަށް ސާބިތުކޮށްފައި ވަނީ އެމަނިކުފާނާ ދެކޮޅަށް ހުށަހެޅި ހަތަރު ހެކިންގެ ހެކިބަހަށް ރިޔާއަތް ކުރެއްވުމަށްފަހުއެވެ. ހެކިބަސް ދިން މީހުންގެ ތެރެއިން، އެމަނިކުފާނާ ދެކޮޅަށް ހެކިބަސް ދެއްވީ އެންމެ މީހެކެވެ.

ދިފާއުގައި ފަސް ހެއްކެއް އުއްތަމަފަނޑިޔާރުގެ ފަރާތްޕުޅުން ހުށަހެޅުއްވި ނަމަވެސް، ޝަރީއަތަށް ހާޒިރުކުރީ އެންމެ ހެކިވެރިޔެކެވެ. އުއްތަމަފަނޑިޔާރުގެ ދިފާއުގައި ހެކިބަސް ދެއްވީ ސުޕްރީމް ކޯޓުގެ ޑިރެކްޓަރު ޖެނަރަލް އިބްރާހިމް ވަހިދުއެވެ.