ސްޕެނިޝް ލަލީގާގެ ޗެމްޕިއަންކަން ކަށަވަރުކޮށްފައިވާ ސްޕެއިންގެ ބާސެލޯނާއާ ދެކޮޅަށް ކުޅޭ 'އެލް ކްލެސްކޯ' އަށް ނެގި ސްކޮޑުން ރެއާލް މެޑްރިޑްގެ ޑިފެންޑަރު ޑެނީ ކަވަހާލް އަދި މިޑްފީލްޑަރު އިސްކޯ ބާކީކޮށްފިއެވެ.

މި މެޗަށް ނެގި ރެއާލްގެ 19 ކުޅުންތެރިންގެ ސްކޮޑު އާންމުކޮށްފައިވާއިރު މި ދެ ކުޅުންތެރިން ހިމަނާފައެއް ނުވެއެވެ.

ކަވަހާލްއަށް މި މެޗުގައި ނުކުޅެވެނީ ޔުއެފާ ޗެމްޕިއަންސް ލީގުގެ ސެމީ ފައިނަލުގެ ފުރަތަމަ ލެގުގައި ޖަރުމަނުގެ ބަޔާން މިއުނިކް އަތުން 2-1 ގެ ނަތީޖާއަކުން ރެއާލް މޮޅުވި މެޗުގައި އޭނާއަށް ލިބުނު އަނިޔާއަކާއި ގުޅިގެންނެވެ. އޭނާ އަންނަނީ މި މަހުގެ 26 ވަނަ ދުވަހު ޔުއެފާ ޗެމްޕިއަންސް ލީގުގެ ފައިނަލުގައި ލިވަޕޫލާއި ދެކޮޅަށް ކުޅޭ މެޗަށް ފިޓުވުމަށް ތައްޔާރުވަމުންނެވެ.

މި މެޗުގައި އިސްކޯއަށް ވެސް ނުކުޅެވެނީ އޭނާ ބަޔާންއާ ދެކޮޅަށް ކުޅުނު މެޗުގައި އޭނާގެ ކޮނޑުހުޅަށް ލިބުނު އަނިޔާއަކާއި ގުޅިގެންނެވެ.

މިކަމާއި ގުޅޭގޮތުން ވާހަކަ ދައްކަމުން ރެއާލްގެ ކޯޗު ޒިދާން ބުނީ އިސްކޯ އަދި ކަވަހާލް ފަދަ މޮޅު ކުޅުންތެރިންނަށް މި މެޗުގައި ނުކުޅެވުމަކީ ވަރަށް ދެރަ ކަމެއް ކަމަށާއި އެކަމާއި ގުޅޭގޮތުން އަމިއްލަ ބާރުގައި ކުރެވޭނެ އެއްވެސް ކަމެއް ނެތް ކަމަށެވެ. އޭނާ ބުނީ އެ ކުޅުންތެރިން ރިސްކް ނުކުރާނެ ކަމަށާއި އެއްވެސް ކުޅުންތެރިޔަކު 100 އިންސައްތަ ފިޓު ނޫންނަމަ އެކުޅުންތެރިޔަކު މި މެޗުގައި ފެނިގެންނުދާނެ ކަމަށެވެ.

ކަވަހާލްގެ އަނިޔާ ވެގެންދާނީ ރެއާލްއަށް ފޫބައްދަން އުނދަގޫ ކަމަކަށެވެ. އެގޮތުން އޭނާގެ މަގާމަށް ބަދަލުގައި ކުޅޭ ނާޗޯ ފަނާންޑޭޒް ވެސް މިވަގުތު ހުރީ އަނިޔާގައެވެ. އޭނާއަށް އަނިޔާވީ މިދިޔަ މަހުގެ ތެރޭގައި 3-0 އިން ލަސް ޕަލްމާސް އަތުން ރެއާލް މޮޅުވި މެޗުގައެވެ. ނާޗޯއާ ގުޅޭގޮތުން ވާހަކަ ދައްކަމުން ޒިދާން ބުނީ އޭނާ ޓީމާއެކު ފަރިތަނުކުރާތާ މަހެއްހާ ދުވަސްވެއްޖެ ކަމަށާއި އެހެން ނަމަވެސް ދުވަހަކަށް ފަހު ދުވަހެއް އޭނާ އަންނަނީ އަނިޔާއިން ރަނގަޅުވަމުން ކަމަށެވެ.

މީގެކުރިން ޑިފެންޑަރު ރަފައޭލް ވަރާންއަށް ވެސް ނުކުޅެވޭނެ ކަމަށް ބެލެވުނު ނަމަވެސް ޒިދާން ވަނީ މި މެޗަށް ނެގި 19 ކުޅުންތެރިންގެ ސްކޮޑުގައި ވަރާން ހިމަނާފައެވެ. ފަލަމަސްގަނޑަށް ލިބުނު އަނިޔާއަކާއި ގުޅިގެން އޭނާ ފަރިތަކުރުންތަކުގައި ބައިވެރި ނުވިނަމަވެސް އޭނާ ބާސެލޯނާއަށް ދަތުރުކުރާނެއެވެ.

ހަމައެހެންމެ މިދިޔަ ހަފްތާގައި ލަލީގާގައި ރެއާލް ކުޅުނު މެޗުގައި ކްރިސްޓިއާނޯ ރޮނާލްޑޯ ކުޅެފައިނުވާއިރު މި މެޗުގައި އޭނާ ވެސް ފެންނާނެއެވެ.

ރެއާލްގެ ފުރަތަމަ އެގާރައިން އަނިޔާގެ ސަބަބުން ނުކުޅެވޭ ކުޅުންތެރިން ފިޔަވައި މުހިންމު ހުރިހާ ކުޅުންތެރިން ފެންނާނެ ކަމަށް ބެލެވޭއިރު އެ ޓީމު ނުކުންނާނީ ބަލިނުވެ ބާސާއިން ހަމަކޮށްފައިވާ 34 މެޗުގެ ސިލްސިލާއަށް ނިމުމެއް ގެނައުމަށެވެ.