މެޑަމް ފާތުން ޕޯޑިއަމަށް އެރުމުން ރައީސުލްޖުމްހޫރިއްޔާގެ ކަންނެތްކަން އެބައެނގޭ: އަމީތު
ފާތުމަތު އިބްރާހީމަކީ ރައީސުލްޖުމްހޫރިއްޔާގެ އަނބިކަނބަލުން ކަމުގައި ވިއަސް، އެއީ ޤާނޫނީގޮތުން ސަރުކާރުގެ ޒިންމާތަކެއް އޮންނަ ބޭކަނބަލެއް ނޫން
އަމީތު ރާއްޖެ ޓީވީގެ ފަލަ ސުރުޚީ ޕްރޮގްރާމްގައި
ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމްގެ އަނބިކަނބަލުން ފާތުމަތު އިބްރާހީމް ޕޯޑިއަމަށް އަރުއްވައި ވާހަކަ ދެއްކެވުމުން، ރައީސް ޔާމީންގެ ކަންނެތްކަން އެނގިގެންދާކަމަށް ރައްޔިތުންގެ މަޖިލީހުގެ މަޑުއްވަރީ ދާއިރާގެ އިންތިޚާބީ މެންބަރު ޢަބްދުﷲ އަމީތު ވިދާޅުވެއްޖެއެވެ.
ރާއްޖެޓީވީން ހޮނިހިރު ދުވަހުގެރޭ ގެނެސްދިން ފަލަ ސުރުޚީ ޕްރޮގްރާމުގައި ވާހަކަ ދައްކަވަމުން އަމީތު ވިދާޅުވީ މެޑަމް ފާތުން އަކީ ރައީސް ޔާމީންގެ އަނބިކަނބަލުން ކަމުގައި ވީނަމަވެސް، އެއީ ޤާނޫނީގޮތުން ސަރުކާރުގެ ޒިންމާތަކެއް އޮންނަ ބޭކަނބަލެއް ނޫންކަމަށެވެ. އަދި އެއީ ސިޔާސީ ގޮތުން މަސައްކަތްތަކެއް ކުރުމަށް ޤާނޫނަކުން ހަވާލުކޮށްފައިވާ ފަރާތަކަށް ނުވާއިރު، އެއީ ރައްޔިތުން ޒިންމާތަކެއް ހަވާލު ކޮށްފައިވާ ފަރާތެއްވެސް ނޫން ކަމަށް އަމީތު ވިދާޅުވިއެވެ.
ފުވައްމުލަކުގައި ޕީޕީއެމުން ބޭއްވި ޖަލްސާއަށް އިޝާރާތް ކުރައްވާ އަމީތު ވިދާޅުވީ، މެޑަމް ފާތުން ޖަލްސާގެ ޕޯޑިއަމަށް އަރާވަޑައިގެން އަމިއްލަފުޅު ފިރިކަލުންނަށް ޝުކުރު އަދާ ކުރައްވާ ހިސާބަށް ދިއުމުން ރައީސްގެ ދެމަފިރިކަނބަލުންގެ ހާލަތާއި ރައީސް ޔާމީންގެ ކަންނެތްކަން ވަރަށް ރަނގަޅަށް ސާފުވެގެންދާކަމަށެވެ.
"ޖަލްސާއަށް އަރައި އަމިއްލަ ފިރިމީހާއަށް ޝުކުރިއްޔާ ރައީސް ޔާމީން ކިޔާހިސާބަށް ދިޔައިމަ އެބައެނގޭ މި ދެމަފިރިންގެ ހާލަތު މިއޮތީ ކޮން ދަރަޖައެއްގަކަން. އެކަމުން ސިފަވެގެންދަނީ ރައީސަކަށް ހުންނެވި ބޭފުޅެއްގެ ކަންނެތްކަން. އެއީ އަނބިމީހާ ރަށްރަށަށް ފޮނުވާފައި ރަތްދައްކާ އަވީގައި ހިންގުވާފައި، ވެހޭހާ ވާރޭތެރެއަށް ނެރެފައި ޕޯޑިއަމްތަކަށް އަރުވައިގެން ފިރިމީހާ ސިޓިންގްރޫމްގައި މޭޒުމައްޗަށް ދެފައިލައިގެން ޓީވީން އެމަންޒަރު ބަލަން އޮތުމަކީ އަޅުގަނޑުމެންގެ މިމުޖުތަމައުގައި އަދި އިންސާނިއްޔަތުކަމުގެ ގޮތުން ބެލިއަސް ހުތުރުކަމެއް. ފާތުމަތު އިބްރާހީމް ދީދީއަކާ ނޫން ރައްޔިތުންގެ ގާތަށްދާން ރައްޔިތުން ޒިންމާ ހަވާލުކުރީކީ. ރައްޔިތުން އިންތިޚާބުކޮށް ޒިންމާ ހަވާލުކުރީ ޔާމީން ކިޔާ މީހަކާ. ޔާމީންގެ ޒިންމާއެއް އެއީ ރަށްރަށަށްގޮސް ރައްޔިތުންގެ ހާލުއަހުވާލު ބަލައި ރައްޔިތުންނަށް އުނދަގޫވަނީ ކޮންކަންތައްތަކެއްތޯ ބަލައި ކޮށްދޭނީ ކޮންކަމެއްތޯ ބުނެދިނުމުގެ ޒިންމާ ޤާނޫނީގޮތުން ހަވާލު ކުރީ ޔާމީން ކިޔާ މީހަކާ" އަމީތު ވިދާޅުވިއެވެ.
މީގެ އިތުރުން، އުއްތަމަ ފަނޑިޔާރާއި، ފަނޑިޔާރު އަލީ ހަމީދާއި ދެކޮޅަށް ދީފައިވާ ސިއްރު ބަޔާންތަކުގެ ތެރެއިން، ލީކުވެފައިވާ އޭސީސީގެ ރައީސް ހަސަން ލުތުފީގެ ބަޔާނަށް އިޝާރާތް ކުރައްވާ އަމީތު ވިދާޅުވީ، ޕީޕީއެމްއަށް މެންބަރުން ހޯދައި ދިނުމަށް 100 ފޯމު ފުރައި މެޑަމް ފާތުން އާއި ހަވާލުކޮށްގެން މިނިވަން މުއައްސަސާތަކުގެ މަޤާމުތަކަށް އައްޔަނުވެފައި ތިބި މީހުން އެބަތިބި ކަމަށާއި، އެވާހަކަ އެގޮތައް ވިދާޅުވުމުން އެއީ ކޮންބައެއްކަން އެބޭފުޅުންނަށް އެނގޭނެކަމަށެވެ.
އަމީތު ވިދާޅުވީ އޭސީސީގެ ރައީސަކީ ރައީސުލް ޖުމްހޫރިއްޔާގެ ހެޔޮއެދުންތަކާއިއެކު ދިރިއުޅޭ މީހަކަށް ވެގެން ނުވާނެ ކަމަށާއި، މިހާރު އެނގިގެންދާ ހަޤީގަތަކީ މިނިވަން މުއައްސަސާތަކުގައިތިބި އިސްވެރިންގެ ނަޒާހަތްތެރިކަން ގެއްލިފައިވާކަން ކަމަށެވެ. ރައްޔިތުންގެ އިތުބާރެއް މިއަދު އެ މީސް މީހުންގެ މައްޗަށް ނެތްކަމަށާއި އެމީސް މީހުންނަށް ހީވެފައި އޮންނަނީ ރައީސް ޔާމީންގެ ރުހުން ނެތިއްޖެނަމަ ހާލުގައި ޖެހިދާނެ ކަމަށް ކަމުގައި އަމީތު ވިދާޅުވިއެވެ.
