ސެކިއުރިޓީ ކައުންސިލަށް ވާދަނުކުރަން އިސްރާއީލުން ނިންމައިފި

އދ ގެ ސަލާމަތީ މަޖިލީހުގެ ކުރިއަށް އޮތް ދައުރަށް ވާދަ ނުކުރުމަށް އިސްރާއީލުން ނިންމައިފިއެވެ.

އިސްރާއީލުން މިގޮތަށް ނިންމާފައިވަނީ އެ ކައުންސިލަށް އިސްރާއީލް ހޮވުމާއި ދެކޮޅަށް އދ ގައި ހިމެނޭ އަރަބި ޤައުމުތަކުން ފަށާފައިވާ ކެމްޕެއިނަކާއި ގުޅިގެންނެވެ. އިސްރާއީލުން މީގެ ކުރިން ސަލާމަތީ މަޖިލީހުގެ މެންބަރު ކަމަށް ވާދަކޮށްފައި ނުވާއިރު، ކުރިއަށް އޮތް ދައުރުގައި ވެސް އެ ޤައުމުން މި މަޤާމަށް ވާދަނުކުރަން ނިންމުމުން، ބެލްޖިއަމް އާއި ޖަރުމަނަށް ކުރިއަށް އޮތް ދައުރުގައި އެ ކައުންސިލްގެ މެންބަރުކަން ކުރުމަށް ވަނީ މަގުފަހިވެފައެވެ.

ޖުމްލަ 15 މެންބަރުންގެ މައްޗަށް އެކުލެވޭ އދގެ ސަލާމަތީ މަޖިލީހަށް މެންބަރުން އިންތިޚާބު ކުރަނީ އެކި ސަރަޙައްދުތައް ތަމްޞީލުވާ ގޮތަށެވެ.

ޖޫން މަހުގެ 8 ވަނަ ދުވަހު ބައްވާ އިންތިޚާބުން އިސްރާއީލުގެ ނަން ނަގާފައިވާއިރު، ސަލަމާތީ މަޖިލީހުގެ މަޤާމަކަށް އިސްރާއީލް އިންތިޚާބުވުމާއި ދެކޮޅަށް އދ ގައި ހިންގާ ކެމްޕެއިންގައި އިސްކޮށް ހަރަކާތްތެރިވަނީ ފަލަސްޠީނެވެ. އެންމެ ފަހުން ބޭއްވި އަރަބި ސަމިޓުގައި މިކަމާއި ގުޅޭގޮތުން މަޝްވަރާ ކޮށްފައިވާއިރު، ފަލަސްޠީނުގެ ޚާރިޖީ ވަޒީރު ރިޔާދް އަލް މާލިކީ ވަނީ މުސްލިމު ޤައުމުތަކުގެ އެހީއާއި އެކު އިސްރާއިލް ބަލިކުރެވޭނެ ކަމުގެ ޔަޤީންކަން އޮތް ކަމަށް ވިދާޅުވެފައެވެ.

ޖޫން މަހު ބާއްވާ އިންތިޚާބުގައި ސަލާމަތީ މަޖިލީހުގެ 5 ޖާގައަކަށް މެންބަރުން އިންތިޚާބުކުރާއިރު، ބެލްޖިއަމް އާއި ޖަރުމަންގެ އިތުރުން ދެކުނު އެފްރިކާ އާއި ޑޮމިނިކަން ރިޕަބްލިކަށް ވެސް ވަނީ ޖާގަ ކަށަވަރުވެފައެވެ. އެ ހަތަރު ޖާގައިގެ އިތުރުން ބާކީ ދެން އިން، އޭޝިއާ ޕެސިފިކަށް ޚާއްސަ ޖާގައަށް ވާދަކުރަނީ އިންޑޮނޭޝިއާ އާއި ދިވެހިރާއްޖެއެވެ.

ބެލްޖިއަމް، ޖަރުމަނު، ދެކުނު އެފްރިކާ އާއި ޑޮމިނިކަން ރިޕަބްލިކް އަކީ އެ ޤައުމުތައް ހިމެނޭ ސަރަޙައްދުތަކުން ވާދަކުރާ ހަމައެކަނި ޤައުމުތައް ނަމަވެސް އެ ޤައުމުތަކަށް ވެސް ސަލާމަތީ މަޖިލީހުގެ ޖާގަ ކަށަވަރު ކުރުމަށް، އދގެ އާންމު މަޖިލީހުގައި ހިމެނޭ 193 މެންބަރު ޤައުމުގެ ތެރެއިން ތިންބައިކުޅަ ދެބައި އަދަދަކަށް ޤައުމުތަކުގެ ތާޢީދު ބޭނުންވާނެއެވެ.

ސަލާމަތީ މަޖިލީހުގައި ހިމެނޭ 15 މެންބަރު ޤައުމުގެ ތެރެއިން 10 ޤައުމަކީ 2 އަހަރު ދުވަހުގެ ދައުރަކަށް އިންތިޚާބުކުރެވޭ މެންބަރު ޤައުމުތައް ކަމަށްވާއިރު، ދެން އެ މަޖިލީހުގައި ތިބޭ 5 މެންބަރު ޤައުމަކީ އެ މަޖިލީހުގެ ދާއިމީ މެންބަރުންނެވެ. އެ ޤައުމުތަކަކީ، އިނގެރޭސިވިލާތް، ޗައިނާ، ފްރާންސް، ރަޝިއާ އަދި އެމެރިކާއެވެ.