ފަނޑިޔާރުން ސިއްރު ހެކިބަސްދިނުމަކީ ޤާނޫނީގޮތުން ބޮޑުު ގޯހެއް: ދިޔާނާ
5 މެއި 2018 | ހޮނިހިރު 03:54ދިޔާނާ އެގޮތަށް ވިދާޅުވީ ދެ ފަނޑިޔާރުންނާއި ދެކޮޅަށް ސިއްރު ހެކިބަސް ނަގަން ކްރިމިނަލް ކޯޓުން ނިންމުމާއި ގުޅިގެން
ކުރީގެ ބަންޑާރަ ނައިބް ދިޔާނާ ސައީދު
ފަނޑިޔާރުން އައިޑެންޓިޓީ ވަންހަނާކޮށް، ސިއްރު ހެކިބަސްދިނުމަކީ ޤާނޫނީގޮތުން ވަރަށް ބޮޑު ގޯހެއް ކަމަށް ކުރީގެ ބަންޑާރަ ނައިބް ދިޔާނާ ސައީދު ވިދާޅުވެއްޖެ އެވެ.
ދިޔާނާ އެފަދައިިން ވިދާޅުވީ، ހޮނިހިރު ދުވަހު ސިއްރު އަޑުއެހުމެއް ބާއްވައި އުއްތަމަ ފަނޑިޔާރު އަބްދުﷲ ސައީދާއި ސުޕްރީމް ކޯޓުގެ ފަނޑިޔާރު އަލީ ހަމީދާ ދެކޮޅަށް ސިއްރު ހެކިބަސް ނަގަން ކްރިމިނަލް ކޯޓުން ނިންމުމާއި ގުޅިގެން ކަންބޮޑުވުން ފާޅުކޮށް ކުރެއްވި ޓުވީޓެއްގަ އެވެ.
ދިޔާނާ ކުރެއްވި ޓުވީޓްގައި ވިދާޅުވީ ކާކުކަން ނޭނގޭގޮތަށް، ވަންހަނާކޮށް، ފަނޑިޔާރުން ސިއްރު ހެކިބަސް ދިނުމަކީ ވަރަށް ބޮޑު ގޯހެއް ކަމަށެވެ. އަދި އެ މީހަކާއިދެކޮޅަށް ހެކިބަސްދެއްވާ ފަނޑިޔާރަކު އެ މައްސަލަ ބައްލަވަން އިންނެވިޔަސް ނޭނގޭނެ ކަމަށް ދިޔާނާ ވިދާޅުވި އެވެ.
އުއްތަމަ ފަނޑިޔާރާއި، ފަނޑިޔާރު އަލީ ހަމީދުގެ ވަކީލުން ނެރުއްވި ބަޔާނެއްގައި ބުނެފައިވަނީ ސިއްރުކޮށްގެން ހޮނިހިރު ދުވަހު ބާއްވަން ނިންމާފައިވާ އަޑުއެހުމުގައި ސިއްރުން ހެކިބަސް ނަގަން ނިންމާފައި ވަނީ ކްރިމިނަލް ކޯޓު ހިންގެވުމާ ހަވާލުވެ ހުންނެވި ގާޒީ އާދަމް އާރިފާއި ސިވިލް ކޯޓުގެ ގާޒީ މުހައްމަދު ހަލީމް ކަމަށް ބެލެވޭ ކަމަށެވެ. އެގޮތަށް ބެލެވެނީ ސިއްރު ހެކިން ހުށަހަޅާފައިވާ ސަބަބަށް ބަލާއިރު އެއީ ދެ ފަނޑިޔާރުން ކަމަށް ބެލެވޭތީ ކަމަށް ގާނޫނީ ވަކީލުން ނެރުނު ބަޔާނުގައި ބުނެފައިވެއެވެ.
