އަނެއްކާވެސް އަދީބު ދޫނިދޫއަށް ބަދަލު ކޮށްފި
އަދީބަކީ ދޫކޮށްލުމަށް 1 ފެބްރުއަރީގެ އަމުރުގައިވޭ
އަދީބު ލޯންޗަށް އަރުވަނީ
މާފުށީ ޖަލުގައި ބަންދުކޮށްފައިހުރި ކުރީގެ ނައިބް ރައީސް އަހުމަދު އަދީބު އަނެއްކާ ވެސް ދޫނިދޫއަށް ބަދަލުކޮށްފިއެވެ.
އަދީބުގެ އަނބިކަނބަލުން މަރިޔަމް ނަޝްވާ ވިދާޅުވި ގޮތުގައި އަދީބު ދޫނިދޫއަށް ބަދަލުކޮށްފައިވަނީ ބުރާސްފަތި ދުވަހުއެވެ.
ނަޝްވާ ކުރެއްވި ޓްވީޓެއްގައި ވިދާޅުވެފައިވަނީ ޖަލުތަކާއި ޕެރޯލްގެ ޤާނޫނުގެ 46 ވަނަ މާއްދާގެ ދަށުން މާފުށީ ޖަލަށް އައި ކުއްލި ޙާލަތާއި ގުޅިގެން ކަރެކްޝަނަލް ސަރވިސްއިން އަދީބު ފުލުހުންނާ ޙަވާލުކޮށް ދޫނިދޫއަށް ބަދަލުކޮށްފައިވާކަމަށެވެ. ނަޝްވާ ވަނީ ކަރެކްޝަނަލް ސަރވިސްއިން ކުއްލި ޙާލަތު ހިންގަނީ ހަމައެކަނި އަދީބަށްތޯ ސުވާލު އުފައްދަވާފައެވެ.
ފެބުރުއަރީ މަހުގެ އެއްވަނަ ދުވަހުގެ ރޭ ސުޕްރީމް ކޯޓުގެ 5 ފަނޑިޔާރުންގެ އިއްތިފާގުން ނެރުނު އަމުރުގައި ވަނީ އަދީބާއި އިތުރު އަށް ބޭފުޅަކު މިނިވަން ކުރުމަށް އަންގާފައެވެ. އެއަމުރާ ގުޅިގެން އަދީބާއި ދިއްގަރު ދާއިރާގެ މެންބަރު ފާރިސް މައުމޫން ދޫކޮށްލުމަށް ލޯންޗަށްވެސް އަރުވާފައެވެ. ނަމަވެސް ފަހުން ވަނީ ބާލާފައެވެ. އަދި އޭގެ ފަހުން އަދީބު ވަނީ މާފުށީ ޖަލަށްވެސް ބަދަލުކޮށްފައެވެ.
