ސަލާހު ހުއްޓުވަން ތިން ކުޅުންތެރިން ގުރުބާން ނުކުރާނަން: ރޯމާގެ ކޯޗު

ލިވަޕޫލްއަށް ކުޅެމުން އަންނަ މިސްރުގެ ފޯވާޑް މުހައްމަދު ސަލާހު ހުއްޓުވުމަށް ތިން ކުޅުންތެރިން ގުރުބާން ނުކުރާނެ ކަމަށް ރޯމާގެ ކޯޗު ޔޫސޭބިއޯ ޑި ފްރެންޗެސްކޯ ބުނެފިއެވެ.

ޔުއެފާ ޗެމްޕިއަންސް ލީގުގެ ސެމީ ފައިނަލުގެ ދެވަނަ ލެގުގައި ލިވަޕޫލާއި ދެކޮޅަށް ނުކުންނައިރު ލިވަޕޫލްގެ އެންމެ ނުރައްކާތެރި ކުޅުންތެރިޔެއްގެ ގޮތުގައި މި ސީޒަނުގައި ފެނިގެންދަނީ ސަލާހުއެވެ. މި ދެ ޓީމު ލިވަޕޫލްގެ ދަނޑުގައި ކުޅުނު ފުރަތަމަ ލެގުގެ މެޗުގައި 5-2 އިން ރޯމާ ބަލިވިއިރު އެ މެޗުގައި ރޯމާ ކޮޅަށް ސަލާހު ދެ ލަނޑު ޖަހައި އެތަކެއް ހަމަލާތަކެއް ފޮނުވާލިއެވެ. ސަލާހު މި ސީޒަނުގައި 43 ލަނޑު ޖަހާފައިވާއިރު ޔޫރަޕުގެ އެއްވެސް ޑިފެންސަކަށް އޭނާ ހިފެހެއްޓިފައެއް ނުވެއެވެ.

ދެވަނަ ލެގުގެ މެޗުގެ ކުރިން ވާހަކަ ދައްކަމުން ރޯމާގެ ކޯޗު ފްރެންޗެސްކޯ ބުނެފައިވަނީ އެންމެ ކުޅުންތެރިޔަކަށްޓަކައި އޭނާގެ މުޅި ޕްލޭން ބަދަލުނުކުރާނެ ކަމަށާއި ސަލާހު ހުއްޓުވުމަށް ތިން ކުޅުންތެރިން ގުރުބާން ނުކުރާނެ ކަމަށެވެ. އޭނާ ބުނީ ޓީމު އެކަތިގަނޑެއްގެ ގޮތުގައި ކުޅެން އިސްކަން ދޭންޖެހޭ ކަމަށާއި ތިން މީހުން ޑިފެންސަށް ލައިގެން ކުޅެން އޭނާ ބޭނުންނުވާ ކަމަށެވެ. އޭނާ ބުނީ ލިވަޕޫލްގެ ކައުންޓާތައް ހުއްޓުވަން ހާއްސަ ސަމާލުކަމެއް ދޭންޖެހޭ ކަމަށާއި އެކަމަށް ސަމާލުކަން ނުދެވިއްޖެނަމަ ބައިކޮޅަށް ލަނޑު ވަންނާނެ ކަމަށެވެ.

ފްރެންޗެސްކޯ ބުނީ އޭނާގެ ކުޅުންތެރިން ދަނޑުމަތީގައި އަދާކުރަން ޖެހޭ ޒިންމާ ވަރަށް ރަނގަޅަށް އެނގޭ ކަމަށާއި އެ ކުޅުންތެރިން އެޒިންމާތައް ވަރަށް ރަނގަޅަށް އަދާކުރާނެކަމުގެ ޔަގީންކަން އޭނާއަށް އޮންނަ ކަމަށެވެ. އޭނާ ބުނީ ކޯޗެއްގެ ގޮތުގައި އޭނާއަށް މިހާރު ލިބިފައިވަނީ ވަރަށް ރަނގަޅު ފުރުސަތެއް ކަމަށާއި އެހެން ނަމަވެސް ދަނޑުމަތީގައި ތަފާތު ދައްކަން ޖެހޭނީ ކުޅުންތެރިން ކަމަށެވެ.

އެޑިން ޒެކޯ އަންނަނީ ރޯމާއަށް މި ސީޒަނުގައި ގިނަ ލަނޑުތަކެއް ޖަހައިދީ މޮޅު ކުޅުމެއް ދައްކަމުންނެވެ. ޒެކޯއާ ގުޅޭގޮތުން ވާހަކަ ދައްކަމުން ފްރެންޗެސްކޯ ބުނީ ޒެކޯ އަކީ އޭނާގެ ޓީމުގެ ސަލާހުއަށް ވާން ބޭނުންވާ ކަމަށާއި އޭނާއަކީ އެކަމަށް ބޭނުންވާ ފެންވަރު ހުރި ކުޅުންތެރިޔެއް ކަމަށެވެ.

މި ސީޒަނުގެ ޗެމްޕިއަންސް ލީގުގައި ރޯމާ އަމިއްލަ ދަނޑުގައި ކުޅުނު އެއްވެސް މެޗެއްގައި އެ ޓީމުގެ ކޮޅަށް ލަނޑެއް ވަދެފައެއް ނުވެއެވެ. ފްރެންޗެސްކޯ ބުނެފައިވަނީ އެ ޓީމުގެ ކޮޅަށް ޔޫރަޕުގައި ލަނޑު ނުވަންނަނީ ސަޕޯޓަރުންގެ ފަރާތުން ލިބޭ ސަޕޯޓުގެ ސަބަބުން ކަމަށާއި އެކަން މިރޭ ވެސް ފެންނާނެ ކަމަށް އުއްމީދުކުރާ ކަމަށެވެ. ކޮންމެ ކަމެއް ވެސް ތަކުރާރުކުން ވެގެންދާނީ އުނދަގޫ ކަމަކަށް ކަމަށާއި އެހެން ނަމަވެސް ކުޅުންތެރިން ނަތީޖާ ބަދަލުކޮށް ފައިނަލްގެ ޖާގައެއް ހޯދުމުގެ އުއްމީދުގައި ކަމަށް ފްރެންޗެސްކޯ ބުނެފައިވެއެވެ.

މި ދެ ޓީމު ބައްދަލުކުރާ ފޯރިގަދަ މެޗު ކުޅުމަށް ހަމަޖެހިފައިވަނީ މިރޭ ރާއްޖެ ގަޑިން 23:45 ގައެވެ.