ކުރީގެ ރައީސް މައުމޫނު އަބްދުލް ގައްޔޫމްގެ ދަނބިދަރިކަލުން މުހައްމަދު ނަދީމް މައްޗަށް އުފުލާފައިވާ ޓެރަރިޒަމްގެ ދައުވާގެ އަޑުއެހުން ބުދަ (މާދަމާ) ފެށުމަށް ތާވަލުކޮށްފި އެވެ.
ރައީސް މައުމޫނުގެ ދަރިކަނބަލުން ޔުމްނާ މައުމޫނުގެ ފިރިކަލުން، ނަދީމްގެ މައްޗަށް ކޮށްފައިވާ ޓެރަރިޒަމްގެ އަމަލެއް ހިންގަން އުޅުނުކަމުގެ ދައުވާގެ އިބްތިދާއީ ފުރަތަމަ އަޑުއެހުން ބޭއްވުމަށް ހަމަ ޖައްސާފައިވަނީ ބުދަ ދުވަހުގެ ހެނދުނު 10.00 ގައި ބޭއްވުމަށެވެ.
ޔުމްނާގެ ފިރިކަލުންގެ މައްޗަށް ޓެރަރިޒަމްގެ ދައުވާ އުފުލާފައިވާއިރު އޭނާގެ ބައްޕާފުޅު، ރައީސް މައުމޫނާއި ކޮއްކޯފުޅު އަދި އަހްމަދު ފާރިސްގެ މައްޗަށްވެސް ވަނީ ޓެރަރިޒަމްގެ ދައުވާ އުފުލާފަ އެވެ. އަދި އެ ދައުވާގެ އިބްތިދާއީ އަޑުއެހުންތައް ވަނީ ކްރިމިނަލް ކޯޓުގައި ފަށާފަ އެވެ.
ނަދީމާއި ރައީސް މައުމޫނާއި ފާރިސްވެސް ހުންނެވީ އެ ބޭފުޅުންގެ މައްޗަށް އުފުލާފައިވާ ޓެރަރިޒަމްގެ ދައުވާއާ ގުޅިގެން ޝަރީއަތް ނިމެންދެން ބަންދުގަ އެވެ.
ނަދީމްގެ މައްޗަށްވެސް ތުހްމަތުކޮށްފައިވަނީ ރައްޔިތުންގެ މަޖިލީހުގެ ތެރެއިން ގާނޫނާ ހިލާފަށް ވެރިކަން ވައްޓާލުމަށްޓަކައި ބައެއް މެމްބަރުނަށް ރިޝްވަތުދިނުމާއި ގާނޫނު އަސާސީން ދައުލަތް ހިންގުމަށް ވަކިވަކި ބާރުތައް ލިބިދީ އުފައްދާފައިވާ މުވައްސަސާތަކުގެ ހިންގުމުގެ ނިޒާމުތަކަށް ބުރޫއަރައި، ގައުމީ ސަލާމަތާއި ރައްޔިތުންގެ ރައްކާތެރިކަމާ ގުޅިފައިވާ މަސްލަހަތުތަކެއް ގެއްލޭ ގޮތަށް ރިޝްވަތުދީގެން ސުޕްރީމް ކޯޓުން އަމުރެއް ނެރުވުމެވެ. އަދި ގާނޫނީ ގޮތުން އުފެދިފައިވާ ސަރުކާރު ގާނޫނާ ހިލާފަށް ވައްޓާލަން މަސައްކަތްކޮށް، ދައުލަތަށާއި ސަރުކާރަށް ނޭދެވޭ ނުފޫޒު ފޯރުވައި، އާންމުންގެ ސަލާމަތައް ނުރައްކާތެރިވާ ފަދަ ހާލަތެއް މެދުވެރިކުރުވާފައިވާ ނަދީމްގެ މައްޗަށްވެސް ތުހްމަތުކުރެ އެވެ.