ހައްޔަރުކޮށްފައި ތިބި ސިޔާސީ ފަރާތްތަކުގެ އަނބީންނާ ނަސްރީނާ ބައްދަލުކުރައްވައިފި
ރައީސް މައުމޫނުގެ އަނބިކަނބަލުން ވަނީ އެ އާއިލާތަކަށް ހިތްވަރުދެއްވާފަ
ހައްޔަރުކޮށްފައި ތިބި ސިޔާސީ ފަރާތްތަކުގެ އަނބީންނާއި މެޑަމް ނަސްރީނާ ބައްދަލުކުރެއްވުން
ހައްޔަރުކޮށްފައި ތިބި ސިޔާސީ ފަރާތްތަކުގެ އަނބީންނާ, ކުރީގެ ރައީސް މައުމޫން އަބްދުލް ގައްޔޫމްގެ އަނބިކަނބަލުން ނަސްރީނާ އިބްރާހިމް ބައްދަލުކުރައްވަފިފިއެވެ.
ރައީސް އަބްދުﷲ ޔާމީނަށް މަޖިލީހުގެ މެޖޯރިޓީ ގެއްލިފައި ވަނިކޮށް، ސިޔާސީ ހައްޔަރީން ދޫކޮށްލަން ސުޕްރީމް ކޯޓުން ފެބްރުއަރީ 1، 2018 ގައި ކުރި ހުކުމް ތަންފީޒުނުކޮށް، އިއުލާނުކުރި ކުއްލި ހާލަތުގެ ދަށުން ރައީސް މައުމޫން ވެސް ހައްޔަރުކޮށްފައިވާއިރު، އެ މަނިކުފާނުގެ އަނބިކަނބަލުން، އެހެން ހައްޔަރީންގެ އަނބިންނާ އަންގާރަ ދުވަހުގެ ރޭ ބައްދަލުކުރެއްވީ އެ އާއިލާތަކަށް ހިތްވަރު ދެއްވުމަށެވެ.
އެކަމަނާއާއި އެކު އޮތް ބައްދަލުވުން ނިންމަވާލެއްވުމަށްފަހު ސިޔާސީ ލީޑަރުންގެ އަނބީން ވަނީ ނަސްރީނާއާއެކު ފޮޓޯ ނަގައި ޓްވީޓް ކުރައްވާ ނަސްރީނާގެ ހިތްވަރާއި އޯގާތެރިކަމަށް ތައުރީފު ކުރައްވާފައެވެ. މިހާރުވެސް ގޭބަންދުގައި ހުންނެވި އަހުމަދު މަޚްލޫފުގެ އަނބިކަނބަލުން ނަޒުރާ ނަސީމް ކުރެއްވި ޓްވީޓެއްގައި ވިދާޅުވީ ނަސްރީނާ ބައްދަލުކުރައްވައި ހިތްވަރު ދެއްވީތީ ނުހަނު އުފާވާ ކަަމަށެވެ. އަދި އެކަމަނާއަކީ ހިތްހެޔޮ އަދި އެހާމެ ހިތްވަރު ގަދަ ބޭކަނބަލެއްކަން ނަޒޫ ފާހަގަކުރެއްވިއެވެ.
ނަސްރީނާއާއެކު ބޭއްވި ބައްދަލުވުމުގައި ކުރީގެ ނައިބު ރައީސް އަހުމަދު އަދީބާއި އަދާލަތު ޕާޓީގެ ރައީސް އިމްރާން އަބުދުﷲ އާއި ކުރީގެ ޕީޖީގެ މުހްތާޒު މުހްސިން އާއި ކުރީގެ ޑިފެންސް މިނިސްޓަރު މުހައްމަދު ނާޒިމާއި ދިއްގަރު ދާއިރާގެ މެމްބަރު އަހްމަދު ފާރިސް މައުމޫން އާއި ދަނގެތީ ދާއިރާގެ މެމްބަރު އިލްހާމް އަހްމަދު އާއި ކިނބިދޫ ދާއިރާގެ މެމްބަރު އަބްދުﷲ ރިޔާޒާއި އިތުރުން ނަސްރީނާގެ ދަރިކަނބަލުން ޔުމްނާ މައުމޫނާއި އާމިނަތު ނާދިރާގެ އިތުރުން އަދާލަތު ޕާޓީގެ ފޮރިން ރިލޭޝަންސް ކޮމިޓީގެ މުގައްރިރު ޝިދާތާ ޝަރީފްވެސް ބައިވެރިވެވަޑައިގެންނެވިއެވެ.
ސިޔާސީ މަގުސަތުގައި ޖަލަށް ލާފައިވާ ބޭފުޅުންގެ އަނބިއަނބިންގެ އިތުރުން، 12 އަހަރަށް ޖަލަށް ހުކުމްކޮށްފައިވާ ޖުމްހޫރީ ޕާޓީގެ ލީޑަރު ގާސިމް އިބްރާހިމްގެ ތިން ދަރިކަނބަލަކު މި ބައްދަލުވުމުގައި ބައިވެރިވެވަޑައިގެންނެވި. ގާސިމް މިވަގުތު ހުންނެވީ ޖަރުމަނުވިލާތުގަ އެވެ.
މި ބައްދަލުކުރެއްވުމަށްފަހު އެފަރާތްތަކުން ބުނެފައިވަނީ، ޖަލުގައި ނަސްރީނާ އިބްރާހިމްގެ ފިރިކަލުން ރައީސް މައުމޫނު ހައްޔަރުކޮށްފައި ހުންނަވަނިކޮށްވެސް އެބޭފުޅުންނާއި އެކަމަނާ ބައްދަލުކޮށް ދެއްވި ހިތްވަރަކީ، އިސްލާހީ މަސައްކަތަށް ދޫނުދީ ކުރިއަށް ގެންދިއުމަށް ލިބުނު އިތުުރު ހިތްވަރެއްކަމަށެވެ.
މީޑިއާ ދުރު މަޑުމަތިރި ބޭކަނބަލެއްގެ ގޮތުގައި ފާހަގަ ކުރެއްވޭ ނަސްރީނާ، މައުމޫން ހައްޔަރުކޮށް ޖަލަށްލި ފަހުން ދޭތެރެ ދޭތެރެއިން މީޑިއާއަށް އިންޓަވިއު ދެއްވާފައިވެ އެވެ. މައުމޫން ފުރަތަމަ ފަހަރަށް ކޯޓަށް ހާޒިރުކުރި ދުވަހު ލޯކަލް މާރުކޭޓް ސަރަހައްދުގައި ހުންނަވާ އެކަމަނާ ވިދާޅުވީ ރައީސް މައުމޫނު ފެއްޓެވި އިސްލާހީ މަސައްކަތް އެކަނި ނަމަވެސް ހުއްޓާ ނުލާ ކުރިއަށް ގެންދަވާނެ ކަމަށާއި، ދާދި އަވަހަށް އިދިކޮޅު ފަރާތްތަކަށް ނަސްރު ލިބިގެންދާނެކަަމަށެވެ.
