ދޯނީގެ މޮޅު ކުޅުމާއެކު ސުޕަރ ކިންގްސް ތާވަލުގެ އެއްވަނައަށް

އިންޑިއަން ޕްރިމިއާ ލީގުގައި ރޯޔަލް ޗެލެންޖާސް ބެންގަލޯއާ ދެކޮޅަށް ކުޅުނު މެޗުގައި މަހިންދްރާ ސިންގް ދޯނީ ދެއްކި މޮޅު ކުޅުމާއެކު ޗެންނާއި ސުޕަރ ކިންގްސް ތާވަލުގެ އެއްވަނަ މަގާމަށް ޖެހިލައިފިއެވެ.

މި މެޗު ޗެންނާއި ސުޕަރ ކިންގްސްއިން ކާމިޔާބު ކުރީ 19.4 އޯވަރުގެ ތެރޭގައި 207 ލަނޑު ހަދައި އަށް ވިކެޓް ނަގައިގެންނެވެ. ރޯޔަލް ޗެލެންޖާސް ބެންގަލޯއަށް 20 އޯވަރުގެ ތެރޭގައި ހެދިފައިވަނީ 205 ލަނޑެވެ. އެ ޓީމުން ވަނީ މި އޯވަރުތަކުގެ ތެރޭގައި އަށް ވިކެޓް ނަގާފައެވެ.

މި މެޗުގައި ރޯޔަލް ޗެލެންޖާސްއިން އެންމެ ރަނގަޅަށް ބެޓްކުރީ 30 ބޯޅައިން 68 ލަނޑު ހެދި ދެކުނު އެފްރިކާގެ އޭބީ ޑެ ވިޔާސްއެވެ. އޭގެ ތެރޭގައި އޭނާ ހަޔަކަށް އަށް ބޯޅަ ޖެހިއިރު ހަތަރަކަށް ވަނީ ދެ ބޯޅަ ފޮނުވާލާފައެވެ. ހަމައެހެންމެ ސުޕަރ ކިންގްސްއިން އެންމެ ރަނގަޅަށް ބެޓްކުރީ 34 ބޯޅައިން 70 ލަނޑު ހެދި އިންޑިއާގެ ކުރީގެ ކެޕްޓަން މަހިންދްރާ ސިންގް ދޯނީއެވެ. ދޯނީ ވަނީ ހަތް ބޯޅަ ހަޔަކަށް ފޮނުވާލާފައެވެ.

މި މެޗުގައި ދެ ޓީމުގެ ފަރާތުން ޖުމްލަ 33 ބޯޅަ ހަޔަކަށް ފޮނުވާލިއިރު މިއީ އިންޑިއަން ޕްރިމިއާ ލީގުގެ ރެކޯޑެކެވެ.

މި މޮޅާއެކު ސުޕަރ ކިންގްސް ވަނީ ތާވަލުގެ އެއްވަނަ މަގާމަށް ޖެހިލާފައެވެ. އެ ޓީމުން ވަނީ ކުޅުނު ހަ މެޗުގެ ތެރެއިން ފަސް މެޗު ކާމިޔާބު ކޮށްފައެވެ. ވިރާތު ކޯލީގެ ކެޕްޓަން ކަމުގެ ދަށުން ކުޅެމުން އަންނަ ރޯޔަލް ޗެލެންޖާސް އޮތީ ތާވަލުގެ ހަވަނަ މަގާމުގައެވެ.