ރިޔާޒުގެ މައްޗަށް ކޮށްފައިވާ ހުކުމަކީ ސިޔާސީ ކުލަ ޖެހިފައިވާ ހުކުމެއް: ގުޅިފައިވާ ޕާޓީތައް
26 އެޕްރީލު 2018 | ބުރާސްފަތި 07:17ރިޔާޒް 4 މަހާއި 24 ދުވަހަށް ޖަލަށް ލުމަށް ވަނީ ހުކުމް ކޮށްފައި
ރައްޔިތުންގެ މަޖިލީހުގެ ކިނބިދޫ ދާއިރާގެ މެންބަރ އަދި ޖުމްހޫރީ ޕާޓީގެ ޑެޕިއުޓީ ލީޑަރ އަބްދުﷲ ރިޔާޒް
ރައްޔިތުންގެ މަޖިލީހުގެ ކިނބިދޫ ދާއިރާގެ މެންބަރ އަދި ޖުމްހޫރީ ޕާޓީގެ ޑެޕިއުޓީ ލީޑަރ އަބްދުﷲ ރިޔާޒް ގެ މައްޗަށް ދިވެހިރާއްޖޭގެ ހައިކޯޓުން ކޮށްފައިވާ ހުކުމަކީ ސިޔާސީ ކުލަ ޖެހިފައިވާ ޙުކުމެއް ކަމަށް ގުޅިފައިވާ ޕާޓީތަކުން ބުނެފިއެވެ.
ގުޅިފައިވާ ޕާޓީތަކުން ނެރެފައިވާ ބަޔާނުގައި ބުނެފައި ވަނީ ރިޔާޒްގެ މައްޗަށް ކޮށްފައިވާ ހުކުމަކީ ކުރިމިނަލް ކޯޓުން ސާބިތު ނުވާ ކަމަށް ނިންމާފައިވާ މައްސަލައެއް ކަމަށާއި އެހުކުމަކީ ރައީސް ޔާމީންގެ އަނިޔާވެރި ސަރުކާރުގެ ބާރާނުފޫޒުން ޕްރޮސެކިއުޓަރ ޖެނެރަލްގެ އޮފީހާއި ކޯޓުތައް ނަހަމަ ގޮތުގައި ބޭނުންކޮށްގެން ސިޔާސީ މަގުސަދުތައް ހާސިލު ކުރުމަށް ކޮށްފައިވާ ހުކުމެއް ކަމަށެވެ.
ރިޔާޒްގެ މައްޗަށް ހިންގާފައި ވަނީ ސިޔާސީ ޝަރީއަތެއްކަން ޝައްކެތް ނެތް މިންވަރަށް ހާމަވެފައި ވާކަމަށާއި އިސްތިޢުނާފުގެ މަރުޙަލާގެ ކޯޓްތަކުން އާންމުކޮށް އަމަލުކުރަމުންދާ އުސޫލްތަކުން ބޭރުން އަމަލުކޮށް އެކަށީގެންވާ މިންވަރަށް ދިފާޢުގައި މަސައްކަތް ކުރުމަށް ރިޔާޒްގެ ގާނޫނީ ވަކީލުންނަށް ފުރުސަތު ދީފައި ނުވާ ކަމަށެވެ. އަދި އިސްތިއުނާފުކުރި މައްސަލަ ނޫން މުޅިން އާ މައްސަލައެއް އުފަންކޮށް، ކުރިމިނަލް ކޯޓުން ސާބިތުނުވާ ކަމަށް ނިންމި މައްސަލަ ނޫން އެހެން މައްސަލައެއްގައި ރިޔާޒްގެ މައްޗަށް ހުކުމް ކުރެވިގެން ދިޔައީ ސިޔާސީ ނުފޫޒު އެ މައްސަލައިގެ ތެރެއަށް ވަދެކަން ހާމަވާކަމަށް އެ ބަޔާނުގައި ވަނީ ބުނެފައެވެ.
"ޢަދުލުވެރިކަމުގެ ޒައްރެއްގެ މިންވަރު ވެސް ނެތް ސިޔާސީ ފަނޑިޔާރުންގެ ޢަމަލުތަކުގެ ސަބަބުން، ޢަދުލުވެރިކަމުގެ ނަމުގައި ހިންގާ އަނިޔާވެރި ޝަރީއަތްތަކުން، ޤައުމަށް ގިނަގުނަ ޚިދުމަތްތަކެއް ކޮށްދެއްވާފައިވާ އެތަކެއް ދިވެހި ދަރީންނަކަށް ނުހައްޤުން ދެމުންދާ އަނިޔާގެ ފުރިހަމަ ޒިންމާ މިފަދަ ފަރާތްތަކުން އުފުލަން ޖެހޭނެކަމީ އެއްވެސް ޝައްކެއް އޮތް ކަމެއް ނޫނެވެ." ގުޅިފައިވާ ސިޔާސީ ޕާޓީތަކުން ނެރެފައިވާ ހުކުމްގައި ބުނެފައިވެއެވެ.
ގުޅިފައިވާ ސިޔާސީ ޕާޓީތަކުންނެރެފައިވާ ބަޔާނުގައި ބުނެފައި ވަނީ އަދުލު އިންސާފު ގާއިމްކުރުމުގެ ނިޒާމަކީ ސިޔާސީ މަގުސަދުތައް ހާސިލު ކުރުމަށް ކަނޑައަޅާފައިވާ ނިޒާމެއް ނޫން ކަމަށާއި އެހެންކަމުން ސިޔާސީ ނުފޫޒުން އެއްކިބާވެ ތިބެ މިނިވަން ކަމާއި ތައައްސަބުން އެއްކިބާވެ ހިންގުމަށް އެޕާޓީތަކުން ގޮވާލާ ކަމަށެވެ.
މީގެ އިތުރުން ސިޔާސީ މީހުންގެ މިނިވަންކަން ނަގާލައި ޖަލުގައި އަނިޔާވެރިކޮށް ގެންގުޅެމުންދަނީ ރައީސް ޔާމީންގެ ޔާމީންގެ ވެރިކަން ދިފާއުކޮށްދިނުމަށް ކަމަށާއި އެހެންކަމުން އެންމެހާ ރައްޔިތުން އެކުގައި މަސައްކަތްކޮށް ރައީސް ޔާމީން ގެ އަނިޔާވެރި ވެރިކަން ޤާނޫނީ އިމުގެތެރެއިން ނިންމުމަށް ކުރަމުންދާ މަސައްކަތްތައް ހުއްޓުމެއްނެތި އަދިވެސް ކުރިއަށް ދާނެ ކަމަށް އެބަޔާނުގައި ވަނީ ބުނެފައެވެ.
ގާނޫނު ތަންފީޒު ކުރާ މުވައްޒަފަކަށް ހުރަސް އެޅުމުގެ ދައުވާގައި ރިޔާޒު ހަތަރު މަހާއި 24 ދުވަހަށް ޖަލަށް ލުމަށް ހައިކޯޓުން ހުކުމްކޮށްފައިވަނީ އަންގާރަދުވަހުގައެވެ. ރިޔާޒްގެ މައްޗަށް މިހުކުމް ކުރީ ގާނޫނު ތަންފީޒުކުރާ މުވައްޒަފަކަށް ހުރަސް އެޅުމުގެ ދައުވާ ސާބިތުނުވާ ކަމަށް ކްރިމިނަލް ކޯޓުން ކުރި ހުކުމް ބާތިލްކޮށް ހައިކޯޓުންނެވެ.
