ޓީވީ ސީރީޒްތަކުން ފެނިގެންދާ މަޝްހޫރު ތަރި އަމީތާ އުޑްގަތާ މަރުވެއްޖެއެވެ.
ރިޕޯޓްތައް ބުނާ ގޮތުގައި އުޑްގަތާ މަރުވީ ނޭވާލާން އުނދަގޫވެގެން ހޮނިހިރު ދުވަހު ހޮސްޕިޓަލަށް ގެންގޮސް ފަރުވާދެމުން ދަނިކޮށެވެ. އޭނާ މަރުވި ސަބަބެއް ކަމުގައި ރިޕޯޓްކޮށްފައި ވަނީ ފުއްޕާމޭ ފެއިލްވުމުންނެވެ. އަމީތާ ވަނީ މަޝްހޫރު އެކި ޓީވީ ސީރީޒްތަކުން ވެސް ފެނިގެން ގޮސްފައެވެ. އޭގެ ތެރޭގައި "ކުޗް ރަންގް ޕިޔާރު ކޭ އައިސޭ ބީ" ހިމެނެއެވެ. އަމީތާގެ މަޝްހޫރު ނަމަކީ "އަންމާ"އެވެ. އެއީ ސްޓާޕްލަސްއިން ދެއްކި ޑްރާމާ "މަން ކީ އާވާޒް ޕްރަތިގްޔާ" އިން އޭނާ ކުޅުނު އަންމާގެ ރޯލަށް ފަހުގައެވެ. އޭނާ ވަނީ ބޮލީވޫޑްގެ ބައެއް ފިލްމްތަކުން ވެސް ފެނިގެން ގޮސްފައެވެ. އެގޮތުން "ސަރްބްޖިތު،" އަދި "ހަސީ ތޯ ޕަސީ" އިން ފެނިގެން ގޮސްފައި ވެއެވެ. އަމީތާ މަރުވި އިރު އޭނާއަށް ވަނީ ދެ ފިރިހެން ކުދިން ލިބިފައެވެ.
އަމީތާ އޭނާގެ އެކްޓިން ކެރިއާ ފަށާފައި ވަނީ 1965 ވަނަ އަހަރުގައެވެ.
އޭނާގެ ޖަނާޒާގެ ކަންތައްތައް ބުރާސްފަތި ދުވަހު ކުރިއަށް ގެންދިޔުމަށް ވަނީ ހަމަޖެހިފައެވެ.
