މި ސަރުކާރުން ފެންނަނީ ޓްރެއިނިން ސެންޓަރެއްގެ ސިފަ: ލަތީފް
ރައީސް ޔާމީން އުޅުއްވަނީ ފިއްލަވައިގެން
ރައްޔިތުންގެ މަޖިލީހުގެ ދިއްދޫ ދާއިރާގެ މި ދައުރުގެ އިންތިޚާބީ މެންބަރު ޢަބްދުއްލަޠީފް މުޙައްމަދު
ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމްގެ ސަރުކާރު ސިފަވެގެންދަނީ މީހުން ތަމްރީނުކުރާ މަރުކަޒެއްގެ ގޮތުގައި ކަމަށާއި، މި ސަރުކާރުގައި އެއްގޮތަކަށްވެސް ސަރުކާރެއްގެ ސިފަ ނެތްކަމަށް ރައްޔިތުންގެ މަޖިލީހުގެ ދިއްދޫ ދާއިރާގެ މި ދައުރުގެ އިންތިޚާބީ މެންބަރު ޢަބްދުއްލަޠީފް މުޙައްމަދު ވިދާޅުވެއްޖެއެވެ.
އަންގާރަ ދުވަހުގެރޭ ގުޅިފައިވާ ޕާޓީތަކުން މާފަންނު ކުނޫޒުގައި ބޭއްވި ޖަލްސާގައި ވާހަކަ ދައްކަވަމުން ލަޠީފް ވިދާޅުވީ، މި ސަރުކާރުގެ މަޤާމުތަކުގައި މީހުން ހަރުނުލާ ކަމަށާއި، އެހެންކަމުން ސަރުކާރު ފެނިގެންދަނީ ޓްރެއިނިންގ ސެންޓަރެއްގެ ގޮތުގައި ކަމަށެވެ. އެގޮތުން މި ސަރުކާރުގެ ބައެއް އިސް މަޤާމުތަކުގައި ތިއްބެވި ބޭފުޅުން އެކި ފަހަރުމަތިން ބަދަލުކޮށްފައިވާއިރު، އޭގެ ތެރެއިން ބައެއް މަޤާމުތަކަށް ލަޠީފް އަލިއަޅުއްވައި ލެއްވިއެވެ.
"އަޅުގަނޑަށް މި ވެރިކަން މިހާރު ސިފަވެގެން ދަނީ ޓްރެއިނިންގ ސެންޓަރެއް (ގެ ގޮތުގަ). ވިސްނާ ވަޑައިގަންނަވާ ކިތައް ނައިބު ރައީސުން ޓްރެއިން ކޮށްފިތޯ. ކިތައް ޔޫތު މިނިސްޓަރުން ޓްރެއިން ކޮށްފިތޯ. ކިތައް ހެލްތު މިނިސްޓަރުން ޓްރެއިން ކޮށްފިތޯ. ކިތައް ކުންފުނީގެ ވެރިން ޓްރެއިން ކޮށްފިތޯ. މުޅިން ޓްރެއިން ކުރަމުންނޭ މިދަނީ. ސަރުކާރެއްގެ ސިފައެއް ނެތެއްނުންތޯ. އަޅުގަނޑުމެން މި ރައީސާ ހަވާލުކުރީ މިކަން ކުރަންތޯ"، ލަޠީފް ވިދާޅުވިއެވެ.
މަޤާމުތަކުގައި ތިބި ފަރާތްތައް އަވަސްއަވަހަށް ބަދަލުކުރަން ޖެހެނީ ސަރުކާރުގެ ހަރުދަނާކަމެއް ނެތުމުން ކަމަށް ލަޠީފް އިޝާރާތްކުރެއްވިއެވެ.
ލަޠީފް އިތުރަށް ވިދާޅުވީ ރައީސް ޔާމީން މިހާރު ހުންނެވީ ވަރުބަލިފުޅު ވެފައި ކަމަށާއި، އެމަނިކުފާނު ނާއުއްމީދު ވެފައިވާ ކަމަށެވެ.
"ރައީސް ޔާމީނޭ، އާރެއް ބާރެއް ނެތޭ. އުއްމީދުތައް ނާއުއްމީދު ވެފަ މިހާރު ތިހިރީ. މޫނުމަތީގަ ހިނިތުންވުމެއް ނެތޭ. ކަޅު ވިލާގަނޑެއްހެން މޫނު ފެންނަނީ. ނާއުއްމީދުވެފަ ތިހިރީ. ވަރުބަލިވެއްޖެ. ނިދިން މަހުރޫމް ވެއްޖެ. ރޮއެރޮއެ މުޅިން ކަރުނަތައް ތި ވެއްޓެނީ. ކީއްކުރަން ކުރާ ވެރިކަމެއްތޯ"، ލަޠީފް ވިދާޅުވިއެވެ.
ލަޠީފް ވިދޅާުވީ ރައީސް ޔާމީން އުޅުއްވަނީ ފިއްލަވައިގެން ކަމަށާއި، އދގައި ތަޤުރީރު ކޮށްނުލެއްވުނު އިރު، އާދައިގެ ރައްޔިތަކާ ބައްދަލުކޮށް ސަލާންކޮށްލަންވެސް ކެރިވަޑައިނުގަންނަވާ ކަމަށެވެ.
