މީރާއަށް އެއްމިލިއަނަށް ވުރެ ގިނަ ރުފިޔާ ދެއްކުމަށް މީހެއްގެ މައްޗަށް ސިވިލް ކޯޓުން ހުކުމްކޮށްފި
ތިން ފަރާތެއްގެ މައްޗަށް ވަނީ ހުކުމްކޮށްފައި
މޯލްޑިވްސް އިންލެންޑް ރެވެނިއު އޮތޯރިޓީ
ޓެކްސް އާއި ޖޫރިމަނާގެ ގޮތުގައި މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އަށް އެއްމިލިއަނަށް ވުރެ ގިނަ ރުފިޔާ ދެއްކުމަށް މީހެއްގެ މައްޗަށް ސިވިލް ކޯޓުން ހުކުމްކޮށްފިއެވެ.
މީރާ އިން ނެރުނު ބަޔާނެއްގައި ބުނެފައި ވަނީ މި މަހުގެ 15 ވަނަ ދުވަހު އެ ފައިސާ ދެއްކުމަށް ހުކުމްކޮށްފައި ވަނީ ނ. ވެލިދޫ/ އޮޅުގިރި ޢަބްދުﷲ އަލީގެ މައްޗަށް ކަމަށެވެ. އެގޮތުން ޖުމްލަ 1,353,804.72ރ (އެއް މިލިއަން ތިން ލައްކަ ފަންސާސް ތިން ހާސް އަށް ސަތޭކަ ހަތަރު ރުފިޔާ ހަތްދިހަ ދެ ލާރި) އާއި އިތުރަށް އަރަމުންދާ ޖޫރިމަނާއާ އެކު ތިން މަސްދުވަހުގެ ތެރޭގައި އެ ފައިސާ ދައްކާ ހާލާސް ކުރުމަށް ސިވިލް ކޯޓުން ވަނީ ހުކުމްކޮށްފައެވެ.
މީގެ އިތުރުން އިތުރު ދެ ފަރާތެއްގެ މައްޗަށް ވެސް ސިވިލް ކޯޓުން ވަނީ މީރާ އަށް ފައިސާ ދެއްކުމަށް ހުކުމް ކޮށްފައެވެ. ޓޮޕް ވަން ޕާރޓްނާސްގެ މައްޗަށް ޖީ.އެސް.ޓީ އާއި ގުޅޭ ޖޫރިމަނާގެ ގޮތުގައި ޖުމްލަ 159,444ރ އާއި އިތުރަށް އަރަމުންދާ ޖޫރިމަނާ، ތިން މަސްދުވަހުގެ ތެރޭގައި ދައްކާ ހަލާސް ކުރުމަށް ހުކުމްކޮށްފައި ވެއެވެ. އަދި ޏ.ފުވައްމުލަކު (ފުނާޑު)/ ސޫރަޖުވިލާ، އަޙުމަދު ލިޔާއުގެ މައްޗަށް ހުކުމް ކޮށްފައި ވަނީ ޖީ.އެސް.ޓީ އާއި އެއާގުޅޭ ޖޫރިމަނާގެ ގޮތުގައި ޖުމްލަ 331,580ރ އާއި އިތުރަށް އަރަމުންދާ ޖޫރިމަނާ، ތިން މަސްދުވަހުގެ ތެރޭގައި ދައްކާ ހަލާސް ކުރުމަށެވެ.
