އައްޑޫ ސިޓީ ހިތަދޫ މޫދަށް ގޮސް އުޅުމުގެ ތެރޭގައި ރާޅާ އެކު އޮޔާ ގެންދިޔަ ތިން ކުދިންގެ ތެރެއިން އަލީ ރާއިފުގެ ފުރާނަ ސަލާމަތްކުރި ހަސަން ހުސެއިންގެ އަގުވަޒަންކުރުމުގެ ގޮތުން އައްޑޫ ސިޓީ ކައުންސިލުން ހަނދާނީ ލިޔުން ދީފިއެވެ.

އަންގާރަ ދުވަހު އައްޑޫ ސިޓީ ކައުންސިލުން ހަސަންގެ އަގު ވަޒަން ކޮށްފައި ވަނީ އޭނާ އިންސާނިއްޔަތަށްޓަކައި ކޮށްދިން މަސައްކަތުގެ ތެރެއިން މީހެއްގެ ފުރާނަ ސަލާމަތްކޮށްދޭން ކުރި ހިތްވަރު ފާހަގަކޮށެވެ. ހަސަންގެ އާއިލާގެ ބައެއް މެމްބަރުންނާއި ސިޓީ ކައުންސިލްގެ ހުރިހާ މެމްބަރުން ބައިވެރިވި މި ބައްދަލުވުމުގައި ހަނދާނީ ލިޔުން ހަވާލުކުރީ އައްޑޫ ސިޓީ ކައުންސިލްގެ މޭއަރު އަބްދުﷲ ސޯދިގް (ސޯބެ) އެވެ.

ހިތަދޫ ފުއްޓަރު ފަރާތަށް ހޮނިހިރު ދުވަހު އުމުރުން 16 އަހަރުގެ އަލީ ރާއިފާއި އެކު ސ. ހިތަދޫ ޗަބޭނލީގެ އުމުރުން 17 އަހަރުގެ އަލީ ފަހުމީ އާއި ޓޮޕާޒް އުމުރުން 14 އަހަރުގެ މިޔާމީން އަލީ ވެސް ދިޔައެވެ. އެ ދުވަހު ނެގި ބިޔަ ރާޅުތަކުގެ އޮއެވަރާ އެކު ތިން ކުދިން ކަނޑުވަމުން ދަނިކޮށް، ހަސަން ވަނީ މޫދަށް އެރި ގޮނޑުދަށާއި އެންމެ ކައިރީގައި އޮތް، ރާއިފްގެ ފުރާނަ ސަލާމަތްކޮށްފައެވެ. އެހެން ނަމަވެސް ފަހުމީ އާއި މިޔާމީންގެ ވަނީ ކަނޑުވެ ގެއްލިފައެވެ.

ހަސަނަކީ ހާއްސަ އެހީއަށް ބޭނުންވާ މީހަކެއެވެ. އަޑުއިވުމާއި، ވާހަކަ ދެއްކުމުން މަހުރޫމް ވެފައިވާ މީހަކެއެވެ. އެހެންނަމަވެސް ހޮނިހިރުގެ އެނާޒުކު ވަގުތުގައި ހަސަން ދައްކުވައިން އާދަޔާ ހިލާފް ހިތްވަރަށް އެތަށް ބަޔަކު އޭނާއަށް ދަނީ ތައުރީފް ކުރަމުންނެވެ.