އިނގިރޭސިވިލާތާއި ވޭލްސްގައި ފުޓްބޯޅަ ކުޅޭ ކުޅުންތެރިންގެ މައްޗަށް އެކުލެވޭ ޕްރޮފެޝަނަލް ފުޓްބޯލާސް އެސޯސިއޭޝަން (ޕީއެފްއޭ) އިން ހޮވާ އަހަރުގެ އެންމެ މޮޅު ކުޅުންތެރިޔާގެ މަގާމު ލިވަޕޫލްއަށް ކުޅެމުން އަންނަ މިސްރުގެ ފޯވާޑް މުހައްމަދު ސަލާހު ހޯދައިފިއެވެ.

އޭނާ މި އެވޯޑު ހޯދީ މެންޗެސްޓާ ސިޓީގެ ތިން ކުޅުންތެރިން ކަމަށްވާ ލެރޯއީ ސާނޭ އާއި ކެވިން ޑެބްރައިން އާއި ޑޭވިޑް ސިލްވާ އާއި ޓޮޓެންހަމްގެ ފޯވާޑް ހެރީ ކޭން އަދި މެންޗެސްޓާ ޔުނައިޓެޑްގެ ކީޕަރު ޑޭވިޑް ޑެހޭއާ ފަހަތަށް ޖައްސާލުމަށްފަހުއެވެ.

މި އެވޯޑު ލިބުމަށްފަހު ވާހަކަ ދައްކަމުން ސަލާހު ބުނީ ކުޅުންތެރިންގެ ވޯޓުން އޭނާއަށް ބޮޑު އެވޯޑެއް ލިބިގެންދިޔުމަކީ ލިބޭ ވަރަށް ބޮޑު ޝަރަފެއް ކަމަށާއި އެކުގައި ކުޅޭ ކުޅުންތެރިންގެ ފަރާތުން މިފަދަ އެވޯޑެއް އޭނާއަށް ދިނުމަކީ ވަރަށް ހާއްސަ ކަމެއްގެ ގޮތުގައި ދެކޭ ކަމަށެވެ. އޭނާ ބުނީ ޗެލްސީގައި ރަނގަޅު ކުޅުމެއް ދައްކަން އޭނާއަށް ފުރުސަތު ނުލިބޭ ކަމަށާއި އަލުން އަނބުރާ އިނގިރޭސިވިލާތަށް އައީ ތަފާތު ކުޅުންތެރިޔެއްގެ ގޮތުގައި ކަމަށެވެ. ހަމައެހެންމެ އޭނާ ބުނީ މި އެވޯޑަކީ ލިވަޕޫލްގެ އެހެން ކުޅުންތެރިންގެ ސަބަބުން އޭނާއަށް ލިބުނު އެވޯޑެއް ކަމަށް ގަބޫލުކުރާ ކަމަށެވެ.

ލިވަޕޫލްގެ ކޯޗު ޔާގެން ކްލޮޕް ބުނީ ސަލާހުގެ ކޯޗަކަށް ވުމުގެ ފުރުސަތު ލިބުމަކީ އޭނާއަށް ލިބޭ ބޮޑު ޝަރަފެއް ކަމަށާއި ފުރަތަމަ ސީޒަނުގައި މިފަދަ އެވޯޑެއް އޭނާ ގެންދިޔުމަކީ ގަބޫލުކުރަން ވެސް ދަތި ކަމެއް ކަމަށެވެ. އޭނާ ބުނީ ފުރަތަމަ ސީޒަނަކީ ވަރަށް ކާމިޔާބު ސީޒަނެއް ކަމަށް މިހާރު ގަބޫލުކުރެވިއްޖެ ކަމަށާއި ބާކީ ހުރި މެޗުތަކުގައި ވެސް ސަލާހުގެ ފަރާތުން މޮޅު ކުޅުމެއް ފެންނާނެ ކަމަށް އުއްމީދުކުރާ ކަމަށެވެ.

ލިވަޕޫލްގެ ފޯވާޑް ލައިންގެ އެންމެ މުހިންމު ރޯލު އަދާކުރަމުން އަންނަ ސަލާހު ވަނީ އެ ޓީމަށް ކުޅުނު 33 މެޗުގައި 31 ލަނޑު ޖަހާފައެވެ. އޭނާ ވަނީ މި ސީޒަނުގެ މިހާތަނަށް ލިވަޕޫލްއަށް އޭނާގެ ލަނޑުތަކުން 15 ޕޮއިންޓް ހޯދައިދީފައެވެ. ހަމައެހެންމެ ޕްރިމިއާ ލީގުގައި ލިވަޕޫލްއިން ޖެހި 76 ލަނޑުގައި އޭނާގެ 51 އިންސައްތަ ހިއްސާއެއް އެބައޮތެވެ.

މި އެވޯޑަށް ސަލާހުއާ އެންމެ ވާދަކުރި ކުޅުންތެރިޔަކީ މެންޗެސްޓާ ސިޓީގެ މިޑްފީލްޑަރު ކެވިން ޑެބްރައިންއެވެ. މެންޗެސްޓާ ސިޓީއިން ޕްރިމިއާ ލީގުގެ ތަށި ޔަގީންކޮށްފައިވާއިރު އެ ޓީމުގައި އޭނާ އަންނަނީ މޮޅު ކުޅުމެއް ދައްކަމުންނެވެ. އޭނާ ވަނީ މިހާތަނަށް މި ސީޒަނުގައި 12 ލަނޑު ޖަހައި 15 ލަނޑު ޖެހުމަށް އެހީތެރިވެދީފައެވެ. ހަމައެހެންމެ އޭނާވަނީ ހަމަލާ އުފެއްދުމަށް ސިޓީގެ ފޯވާޑުންނަށް 102 ފުރުސަތު ތަނަވަސްކޮށްދީފައެވެ.

ޑެބްރައިންއަށް މި އެވޯޑު ނުލިބުމާއި ގުޅިގެން ވާހަކަ ދައްކަމުން އޭނާގެ ކޯޗު ޕެޕް ގާޑިއޯލާ ބުނީ މިއީ ޑެބްރައިންއަށް ހައްގު އެވޯޑެއް ކަމަށާއި ފާއިތުވެދިޔަ 10 މަސް ދުވަހުގެ ތެރޭގައި އޭނާއާ އެއް ފެންވަރަކަށް އެހެން އެއްވެސް ކުޅުންތެރިޔަކަށް ކުޅުން ދެއްކިފައިނުވާ ކަމަށެވެ.

މިދިޔަ އަހަރު މި އެވޯޑު ހޯދީ މިދިޔަ ސީޒަނުގައި ޗެލްސީއަށް ޕްރިމިއާ ލީގު ހޯދައިދިނުމުގައި މުހިންމު ރޯލެއް އަދާކުރި ފްރާންސްގެ މިޑްފީލްޑަރު އެންގޯލޯ ކަންޓޭއެވެ.