ޖޫނިއަރ އެންޑް ކެޑޭޓް ޓީޓީ މުބާރާތް ފަށައިފި

ދެކުނު އޭޝިއާގެ ޖޫނިއަރ އެންޑް ކެޑޭޓް ޓޭބަލް ޓެނިސް މުބާރާތް ރާއްޖޭގައި ފަށައިފިއެވެ. މިއީ މި ސަރަހައްދުގައި ބޭއްވޭ ޓޭބަލް ޓެނިސްގެ އެންމެ ވާދަވެރި މުބާރާތަށްވާއިރު މި މުބާރާތުގައި މި ސަރަހައްދުގެ ހަ ގައުމަކުން ބައިވެރިވެއެވެ. އެ ގައުމުތަކުގެ ތެރޭގައި ހިމެނެނީ ބަންގްލަދޭޝް، އިންޑިއާ، ޕާކިސްތާން، ސްރީ ލަންކާ އަދި ރާއްޖެއެވެ.

މި މުބާރާތުގެ ޖޫނިއާރ ކެޓަގަރީގައި 18 އަހަރުން ދަށުގެ ކުޅުންތެރިން ވާދަކުރާއިރު، ކެޑޭޓް ކެޓަގަރީގައި ވާދަކުރާނީ 15 އަހަރުން ދަށުގެ ކުޅުންތެރިންނެވެ. ހަމައެހެންމެ މިފަހަރުގެ މުބާރާތުގައި ހޯޕްސް ކެޓަގަރީ ކުރިޔަށްދާއިރު އެ ކެޓަގަރީގައި ވާދަކުރާނީ އުމުރުން 12 އަހަރުން ދަށުގެ ކުޅުންތެރިންނެވެ. މި މުބާރާތުގެ ހުރިހާ ކެޓަގަރީއެއްގައި ރާއްޖޭގެ ކުޅުންތެރިން ބައިވެރިވާއިރު މި މުބާރާތަށް ތައްޔާރުވުމަށް ރާއްޖޭގެ ކުޅުންތެރިން ވަނީ މިއަހަރުގެ ފެބްރުއަރީ މަހުން ފެށިގެން ތަމްރީންތަކެއް ފުރިހަމަކޮށްފައެވެ.

ރާއްޖެއެމްވީއަށް މައުލޫމާތު ދެއްވަމުން ޓޭބަލް ޓެނިސް އެސޯސިއޭޝަނުގެ ޖެނެރަލް ސެކްރެޓަރީ އިސްމާއިލް ސުޖާއު ވިދާޅުވީ މުބާރާތުގެ މެޗުތައް ކުރިޔަށްދަނީ ވަރަށް ވާދަވެރިކޮށް ކަމަށާއި ދިވެހި ޓީމުގެ ފަރާތުންވެސް ފެންނަމުންދަނީ ވަރަށް ރަނގަޅު ކުޅުމެއް ކަމަށެވެ. އޭނާ ވިދާޅުވީ ގައުމީ ޓީޓީ ޓީމު މި މުބާރާތުގައި ކުޅޭތީ ކުޅި ބަލަން ވަންނަ މީހުންގެ އަދަދުވެސް އިތުރު ކަމަށާއި ރާއްޖޭގެ ކުޅުންތެރިންގެ ފަރާތުން ފެންނަމުންދާ ކުޅުމާމެދު ވަރަށް ހިތްހަމަޖެހޭ ކަމަށެވެ.

މުބާރާތުގެ ފައިނަލް މެޗުތައް އާދިއްތަ ދުވަހު ކުރިޔަށްދާނެ ކަމަށް ސުޖާއު ވިދާޅުވިއެވެ.