ފުލުހުންނަކީ ޤާނޫނީ ސަރުކާރު ހިމާޔަތްކުރަން ތިބޭ ބައެއް ކަމަށާއި، ކޮންމެ ތަނަކުން ކޮންމެ އަމުރެއް ކުރި ނަމަވެސް ފުލުހުން ޤާނޫނީ ސަރުކަރު ހިމާޔަތްކުރަންޖެހޭނެ ކަމަށް ރައީސުލްޖުމްހޫރިއްޔާ އަބްދުﷲ ޔާމީން ވިދާޅުވެއްޖެއެވެ.
ފުލުހުންގެ 85 ވަނަ އަހަރީ ދުވަހުގެ ރަސްމީ ޖަލްސާގައި ވާހަކަދައްކަވަމުން ރައީސް ޔާމީން ވިދާޅުވީ މި ސަރުކާރުން ޤާނޫނާ ހިލަފު އަމުރެއް ނުކުރާނެ ކަމަށެވެ. އަދި ފުލުހުންނަކީ ޤާނޫނީ ސަރުކާރު ހިމާޔަތްކުރަން ތިބެންޖެހޭ ބައެއް ކަމަށާއި، ކޮންމެ އަމުރެއް އަޔަށް ޤާނޫނީ ސަރުކާރެއް ދިފާއުކުރުމަކީ ފުލުހުންގެ ޒިންމާއެއް ކަމަށް އެމަނިކުފާނު ވިދާޅުވިއެވެ. އެގޮތުން އެމަނިކުފާނު ވިދާޅުވީ، މުޅި ސަރުކާރަށް ލޮޅުން އަރާ ކަންކަމުގައި ކޮންމެ ދިމާލަކު އަމުރެއް އައި ނަމަވެސް އެ އަމުރަކާ މެދު ފުލުހުން ވިސަންނަޖެހޭ ކަމަށާއި، ޤާނޫނާ ހިލާފު އަމުރަކަށް ފުލުހުން ތަބާވެގެން ނުވާނެ ކަމަށެވެ.
ރައީސް ޔާމީން ވިދާޅުވީ ފުލުހުންގެ މައްޗަށް ޤައިރު ޤަނޫނީ އަމުރުކުރަނީ ހަމައެކަނި އެ މީހުންގެ މައްޗަށް ތިބޭ ވެރިން ނޫން ކަމަށެވެ. އަދި އެ ނޫން ދިމާލުން ވެސް ފުލުހުންގެ މައްޗަށް ޤައިރު ޤާނޫނީ އަމުރުކުރާ ކަމަށް ރައީސް ޔާމީން ވިދާޅުވިއެވެ. އަދި ކޮންމެ ފުލުހަކު ވެސް ހުވާކޮށްގެން ތިބީ ޤާނޫނު ނަގަހައްޓަން ކަމަށާއި، އެ ހުވަޔާ އެއްގޮތަށް ރައީސުލްޖުމްހޫރިއްޔާއަކީ ދައުލަތުގެ އެންމެ މަތީ ވެރިޔާކަން ފުލުހުން އަބަދުވެސް ހަނދާނުގައި ބަހައްޓަންޖެހޭ ކަމަށް އެމަނިކުފާނު ވިދާޅުވިއެވެ.
"ކުދިކުދި ކަންތައްތަކުގެ ވާހަކައެއް ނޫން މި ދައްކަނީ. މުޅި ސަރުކާރު ހިންގުމަށް ލޮޅޫއަރާ ފަދަ ކަންކަމުގައި ފުލުހުންނާއި ދިމާލަށް މި އަންނަ އަމުރުތައް ކޮންމެ ދިމާލަކުން އައި ނަމަވެސް އެއާ މެދު ވިސްނަންޖެހޭ."
ފުލުުހުންގެ މުއައްސަސާއަށް ވަރަށް ބޮޑަށް ފާޑުވިދާޅުވެ ވާހަކަދައްކަވަމުން ރައީސް ޔާމީން ވިދާޅުވީ ރައްޔިތުންގެ އިތުބާރު ހޯދުމަށް ފުލުހުންގެ މުއައްސަސާ އިން މަސައްކަތްތަކެއް ކުރަންޖެހޭ ކަމަށެވެ. އަދި ފުލުހުނަށް ރައްޔިތުން ކުރާ އިތުބާރު ގެއްލުނީ ފުލުހުންގެ އަމަލުތައް ހުރި ގޮތުގެ ސަބަބުން ކަމަށާއި، އެއީ އެންމެ ފުލުހަކު ކުރި ކަމެއް ނަމަވެސް މުޅި ފުލުހުންގެ މުއައްސަސާއަށް ރައްޔިތުން ކުރާ އިތުބާރު އެކަމުގެ ސަބަބުން ގެއްލިގެންދާ ކަމަށް ރައީސް ޔާމީން ވިދާޅުވިއެވެ.
މީގެ އިތުރުން ރައީސް ޔާމީން ވިދާޅުވީ، ގިނަ ރައްޔިތުންގެ ތައުރީފް ލިބުނެއް ކަމަކު ފުލުހުން އަބަދުވެސް ވަޒީފާ އަދާކުރަނީ އެ ތައުރީފް ހޯދަން ކަމަށް ދެކުމަކީ މައްސަލައެއް ކަމަށެވެ. އަދި ފުލުހުންނަކީ އެއަށް ވުރެ ބޮޑު މަސްއޫލިއްޔަތެއް ހަވާލުކޮށްފައިވާ ބައެއް ކަމަށް ވެސް އެމަނިކުފާނު ވިދާޅުވިއެވެ.