ހައްޔަރު ކޮށްފައިތިބި އެސްއޯ ފުލުހުން މާފުށީ ޖަލަށް ބަދަލު ކޮށްފި
ބަދަލު ކުރީ ހޮނިހިރު ދުވަހު
އެސްއޯ ފުލުހުން: ވެރިކަން ވައްޓާލަން އުޅުމުގެ ތުހުމަތުގައި އެސްއޯ ފުލުހުންތަކެއް ވަނީ ހައްޔަރުކޮށްފައި | ގޫގުލް
ޤާނޫނާއި ހިލާފަށް ސަރުކާރު ވައްޓާލަން އުޅުނު ކަމުގެ ތުހުމަތުގައި ހައްޔަރު ކޮށްފައި ތިބި އެސްއޯ ފުލުހުން ހޮނިހިރު ދުވަހު މާފުށީ ޖަލަށް ބަދަލު ކޮށްފިއެވެ.
ދޫނިދޫއިން ހޮނިހިރު ދުވަހު މާފުށީ ޖަލަށް ބަދަލު ކުރިނަމަވެސް ދޫނިދޫން އެމީހުން މާފުއްޓަށް ބަދަލުކުރި ސަބަބެއް ސާފެއް ނުވެއެވެ.
ސުޕްރީމް ކޯޓުގެ ފުލް ބެންޗުން ފެބްރުއަރީ 1ގައި ނެރުނު އަމުރު ތަންފީޒް ނުކޮށް ރައީސް ޔާމީން އިއުލާން ކުރެއްވި ކުއްލި ނުރައްކަލުގެ ހާލަތުގެ ދަށުން ހައްޔަރު ކޮށްފައިވާ ފުލުހުންގެ ތެރޭގައި އެސްއޯގެ ކުރީގެ ކޮމާންޑަރު އިނިސްޕެކްޓަ އޮފް ޕޮލިސް ސައިފު ހުސައިންއާއި، ސްޓޭޝަން އިނިސްޕެކްޓަ ފާއިޒު މުހައްމަދާއި ފުލުހުންގެ ސްވޮޓު ޓީމުގައި މަސައްކަތް ކުރި ސާޖަންޓު އަބްދުﷲ ރިޔާޒާއި ކޯޕްރަލް އަލީ ނަސީރާއި ކޯޕްރަލު ހަސަން ނަސީރާއި ކޯޕްރަލު މުހައްމަދު ޝާމިންއާއި ސާޖެންޓު އަހުމަދު އާސިމް ހިމެނެއެވެ. އެފުލުހުންނަކީ ސްޕްރީމް ކޯޓުން ނެރުނު އަމުރު ތަންފީޒު ކުރުމަށް މަސައްކަތް ކުރި ފުލުހުން ކަމަށް ބުނެއެވެ.
މައުލޫމާތު ލިބިފައިވާ ގޮތުގައި އެފުލުހުން މިހާރު ވަނީ ފުލުހުންގެ ވަޒީފާއިން ވެސް ވަކިކޮށްފައެވެ. ފުލުހުންގެ ވަޒީފާއިން ވަކިކުރި ބައެއް ފުލުހުން ވަޒީފާއިން ވަކިކުރަން ނިންމިކަން އަންގައި އެ ފުލުހުންނަށް ފޮނުވާފައިވާ ލިއުމުގެ ކޮޕީ ރާއްޖެއެމްވީއަށް ލިބިފައިވާއިރު، އޭގައިވާގޮތުން އެ ފުލުހުންގެ މައްޗަށް ތުޙުމަތު ކުރަނީ އެ ފުލުހުން އިތުރު ބަޔަކާއި ބައިވެރިވެގެން، ޤާނޫނީ ގޮތުން އުފެދިފައިވާ ސަރުކާރު ޤާނޫނާއި ޚިލާފަށް ބަދަލުކުރަން މަސައްކަތްކޮށް، ދިވެހިރާއްޖޭގެ ސަލާމަތީ ބާރުތަކާއި ދެކޮޅަށް ނިކުމެ، ޣައިރު ޤާނޫނީ އެއްވުންތަކުގެ ތެރެއިން އަމަން ބަލަހައްޓަން ތިބި ފުލުހުންނާއި މެދު މާރާމާރީ ހިންގައި ރައްޔިތުންގެ މެދުގައި ސަލާމަތީ ބާރުތަކާއިމެދު އިތުބާރު ގެއްލުވާލަން އުޅުނު ކަމަށެވެ.
މިމައްސަލާގައި ކުރީގެ ކޮމިޝަނަރ އޮފް ޕޮލިސް އަހުމަދު އަރީފު ވެސް މަޤާމުން ވަކިކޮށް ފަހުން ވަނީ ހައްޔަރު ކޮށްފައެވެ. މައުލޫމާތު ލިބިފައިވާ ގޮތުގައި އަރީފް އަދިވެސް އޮންނެވީ ދޫނިދޫ ގޮޅީގައެވެ.
