ޓެކްނޮލޮޖީ ބޭނުންކޮށް، ރައްޔިތުންނާ ވީހާ ވެސް ގާތުން ހިދުމަތް ފޯރުކޮށްދިނުން މުހިއްމު: ނާއިބު ރައީސް
ޖަޒީރާ ގައުމަކަށް ވުމުން ހިދުމަތް ދިނުމަށް ގޮންޖެހުން އެބަހުރި
ނާއިބު ރައީސް އަބްދުﷲ ޖިހާދު:
ސިވިލް ސަރވިސްގެ ހިދުމަތް ފޯރުކޮށްދިނުމުގައި ބަލަންވީ، ޓެކްނޮލޮޖީގެ ބޭނުންހިފައި، ވީހާ ވެސް ކަރުދާސް މަދުކޮށް، އާންމު ރައްޔިތުންނާ ވީހާ ވެސް ގާތުން ހިދުމަތް ފޯރުކޮށްދިނުމަށް ކަމުގައި ނާއިބު ރައީސް އަބްދުﷲ ޖިހާދު ވިދާޅުވެއްޖެއެވެ.
ހޮނިހިރު ދުވަހުގެ ހެނދުނު ދަރުބާރުގޭގައި ބޭއްވެވި "ސިވިލް ސަރވިސް ކޮންފަރެންސް 2018" ފެއްޓެވުމުގެ ރަސްމިއްޔާތުގައި ވާހަކަފުޅު ދައްކަވަމުން ޖިހާދު ވިދާޅުވީ ރާއްޖޭގެ ކޮންމެ ރަށެއްގެ ރައްޔިތުންނަށް ސަރުކާރުން ފޯރުކޮށްދޭންޖެހޭ ހިދުމަތްތައް ފޯރުކޮށްދިނުމުގައި، އެންމެ ބޮޑަށް ބޭނުންކުރެވިދާނެ އެއްޗަކީ ޓެކޮނޮލޮޖީ ކަމަށެވެ.
މީގެ އިތުރުން ޖިހާދު ވިދާޅުވީ ސިވިލް ސަރވިސްގެ ހިދުމަތުގައި ތިބި މުވައްޒަފުންގެ މަސައްކަތުގެ އަގު ވަޒަންކުރުމަކީ، އެ މުވައްޒަފުންގެ މަސައްކަތަށް ލިބޭނެ އިތުރު ކުރިއެރުމެއް ކަމަށާއި، ސަރުކާރުގެ ފުދުންތެރިކަން ހުރި މިންވަރަކުން މުވައްޒަފުންނަށް ދެވޭ އިނާޔަތްތައް އިތުރުކުރަމުން ގެންދަވަނީ ވެސް، މުވައްޒަފުންގެ މަސައްކަތުގެ އަގު ވަޒަންކުރުމުގެ ގޮތުން ކަމަށެވެ.
ރާއްޖެ ފަދަ، ކުދި ޖަޒީރާތަކަކުން އުފެދިފައިވާ ގައުމެއްގައި، ރައްޔިތުން ބޭނުންވާ މިންވަރަށް، އަދި ފެންވަރަށް ހިދުމަތް ދިނުމަކީ ބޮޑެތި ގޮންޖެހުންތަކެއް ހުރި ކަމެއް ކަމަށާއި، ބަވަނަވަމުން މިދާ ދުނިޔޭގައި، ޒަމާނީ ޓެކްނޮލޮޖީ ބޭނުންކޮށްގެން ރައްޔިތުންނަށް އެންމެ ފުރިހަމަ ހިދުމަތެއް ދިނުމަށް ސިވިލް ސަރވިސް އިން އަބަދުވެސް މަސައްކަތް ކުރަންޖެހޭ ކަމަށް ނާއިބު ރައީސް ވިދާޅުވިއެވެ.
ޖިހާދު ވިދާޅުވީ ސިވިލް ސަރވިސްގެ ހިދުމަތުގެ ފެންވަރު ރަނގަޅު ކުރެވޭނެ އެންމެ ބޮޑު އެއް އަސާސަކީ، ހިދުމަތާ ގުޅޭ މީހުންގެ ފެންވަރު ރަނގަޅު ކުރުން ކަމަށާއި މިގޮތުން، މަސައްކަތަށް އެކަށޭނަ، ހުނަރު ހުރި، އެންމެ ގާބިލު ފަރާތައް ވަޒީފާ ހަމަޖެހިގެންދިއުން ނުވަތަ "ކޮމްޕީޓެންސީ ބޭސްޑް ރެކްރޫޓްމަންޓް" ނިޒާމެއްގެ ދަށުން ވަޒީފާތަކަށް ބޭނުންވާ މީހުން އައްޔަން ކުރެވިގެން ދިއުން ވަރަށް މުހިއްމު ކަމަށެވެ.
މީގެ އިތުރުން ޖިހާދު ވިދާޅުވީ ސިވިލް ސަރވިސް މުވައްޒަފުންނަކީ، އެ ވަގުތަކު އޮތް ސަރުކާރަކުން ރައްޔިތުންނަށް ދޭންޖެހޭ ހިދުމަތްތައް ދޭން ތިބި ބައެއްކަމަށާއި، ތަފާތު ވިސްނުމުގެ މީހުން އަޅުގަނޑުމެންގެ ތެރޭގައި ތިބޭނެކަން ގަބޫލުކުރާހިނދު، ގައުމަށްޓަކައި، ނޫނީ ރައްޔިތުންނަށްޓަކައި ދެވޭ ހިދުމަތަކަށް އޭގެ އަސަރު ފޯރުމަކީ ގަބޫލުކުރެވޭނެ ކަމެއް ނޫން ކަމަށެވެ. އަދި، އޮފީސްތަކުގެ ތެރޭގައި ބައިބައިވުން އުފައްދައި، މަސައްކަތުގެ މާހައުލު ކިލަނބުކޮށް ހަދާ މުވައްޒަފުންނާ މެދު ފިޔަވަޅު އަޅަންޖެހޭ ކަމަށް ވެސް ޖިހާދު ވިދާޅުވިއެވެ.
