އިންތިހާބު މިނިވަން ވާނީ ޔާމީންގެ ނަން ނެތި އިންތިހާބު ބޭއްވިގެން: އަމީތު
އިލެކްޝަންސް ކޮމިޝަނުން ބުނެފައިވަނީ އިންތިހާބު ބާއްވަން ރަނގަޅު މާހައުލެއް އެބައޮތްކަމަށް
ރައްޔިތުންގެ މަޖިލީހުގެ ބައެއް މެމްބަރުނާއެކު މުހައްމަދު އަމީތު (މެދުގައި)
ކުރިއަށް އޮތް ރިޔާސީ އިންތިހާބު މިނިވަން، އިންސާފުވެރި އިންތިހާބަކަށްވާނީ އަބްދުﷲ ޔާމީންގެ ނަން ނެތި އިންތިހާބު ބޭއްވިގެންކަމަށް ރައްޔިތުންގެ މަޖިލީހުގެ މަޑުއްވަރީ ދާއިރާގެ މެމްބަރު މުހައްމަދު އަމީތު ވިދާޅުވެއްޖެ އެވެ.
ކުރިއަށް އޮތް ރިޔާސީ އިންތިހާބުގެ މިނިވަންކަމާއިމެދު ގިނަ ބަޔަކު ސުވާލު އުފައްދަމުން ގެންދާއިރު، އަމީތު ކުރެއްވި ޓުވީޓެއްގައި ވިދާޅުވީ ރިޔާސީ އިންތިހާބު އިންސާފުވެރި އިންތިހާބަކަށް ވެގެންދާނީ ވޯޓު ކަރުދާސްކޮޅުގައި އަބްދުﷲ ޔާމީންގެ ނަން ނެތި އިންތިހާބު ބޭއްވިގެންކަމަށެވެ. އަދި އެއީ މިވަގުތަށްވެސް، ފަހަށްވެސް ތަނަވަސްވާންޖެހޭ މާހައުލުކަމަށް އަމީތު ވިދާޅުވި އެވެ.
އަމީތު އެގޮތަށް ވިދާޅުވީ ރިޔާސީ އިންތިހާބު ބޭއްވޭނެ ފަދަ މާހައުލެއް މިވަގުތަށް އެބަ އޮތް ކަމަށް އިލެކްޝަންސް ކޮމިޝަންގެ ރައީސްގެ މަޤާމުގައި ހުންނެވި އަދި ޕީޕީއެމްގެ އިސް އެކްޓިވިސްޓެއްގެ ގޮތުގައިވެސް މަސައްކަތްކުރެއްވި އަހުމަދު ޝަރީފް ވިދާޅުވުމުން އެކަމަށް ރައްދުދެއްވަ އެވެ. ޝަރީފް ވިދާޅުވީ ރިޔާސީ އިންތިހާބު ފަސް ކުރުމާ ގުޅޭ ގޮތުން އެއްވެސް ކަހަލަ ވާހަކައެއް ނުދެކެވޭ ކަމަށެވެ.
